Еркин Қарақалпақстан Вести Каракалпакстана 01:06:58, 22.05.2019
Хош келипсиз! | RSS
Сайт мазмуны

Кириў усылы

ЖӘМИЙЕТШИЛИК ПЕНЕН БАЙЛАНЫСЛАР ИТИБАРДА

Соңғы жылларда елимизде мәмлекетлик уйымлардың пуқаралар ҳәм ғалаба хабар қураллары менен бирге ислесиў механизми түп-тийкарынан өзгерип, жәмийетшилик пенен мүнәсибетлерди беккемлеўге айрықша итибар қаратылмақта.

Соны айрықша атап өтиў керек, елимизде «Халық мәмлекетлик уйым­ларға емес, ал, мәмлекетлик уйымлар хал­қымызға хызмет етиўи керек» деген принцип тийкарында жаңа система жаратылып, пуқараларымыздың мүрәжатлары, турмыслық машқалаларын шешиў сыяқлы ўазыйпалар белгилеп берилген.

Бул бағдарда Президентимиздиң басламасы менен физикалық ҳәм юридикалық шахслардың мүрәжатлары менен ислесиўде орынларда Халық қабыллаўханалары, мәмлекетлик хызметлер орайлары  шөлкемлестирилип, халық пенен ашық-айдын сөйлесиўлер жүргизилиўинде мәмлекетлик уйым­лардың пуқаралар менен мүнәсибетлери беккемленбекте. Соның менен бирге, ҳәр жылы қабыл етилетуғын мәмлекетлик бағдарламаның жойбарлары да кең жәмийетшиликке усынылып, олардың пикир-усыныслары тийкарында қабыл етилмекте. 

Халықтың пикир ҳәм дүньяқарасын кеңейтиўде елимизде жүргизилип атырған дөретиўшилик жумыслар, исбилерменлик орталығын жаратыўда оларға жаратылған қолайлы шараятларды, сондай-ақ, тынышлығымызды тәмийинлеўде «Қәўипсиз қала» ҳәм «Қәўипсиз аймақ» бағдарламалары шеңберинде алып барылып атырған жумысларды кең халық қатламына үгит-нәсиятлаўда раўажланған мәмлекетлер тәжирийбеси тийкарында «Паблик Рилейшнз» системасы енгизилмекте. Инглис тилиндеги «Pablik Relations» сөзи қарақалпақ тилине аўдарғанда «Жәмийетшилик пенен байланыслар», «Халық пенен мүнәсибетлер» деген мәнилерди аңлатады. Ол қысқаша ПР деп те аталады.  

Усы орында пиар ҳаққында атап өтетуғын болсақ, жаңа халықаралық «Уэбстер» түсиндирме сөзлигинде оған төмендегише анықлама берилгенF «Паблик Рилейшнз» ­ пуқаралар ҳәм шөлкемлер ортасында, улыўма жәмийетте өз-ара аўызбиршиликти жүзеге келтириў ҳәм бир-бирин түсиниўге  көмеклесиў, соның менен бирге, пайдалы ҳәм мазмунлы аналитикалық мақалаларды жәриялаў, мәлимлеме алмасыўын раўажландырыў, жәмийетшилик пикирин үйрениў ҳәм баҳалаў болып есапланады.

Мәмлекетимизде пиар системасын турмысқа енгизиў бойынша  Президентимиз Ш.Мирзиёевтиң усы жыл 17-январьда қабыл етилген «2017-2021-жылларда Өзбекстан Республикасын раўажландырыўдың бес тийкарғы бағдары бойынша Ҳәрекетлер стратегиясын «Жедел инвестициялар ҳәм социаллық раўажландырыў жылы»нда әмелге асырыўға байланыслы мәмлекетлик бағдарлама ҳаққында»ғы Пәрманында айрықша тоқтап өтилген. Усы бағдарлама шеңберинде Президентимиздиң 2019-жыл 2-февральда қабыл етилген «Өзбекстан Республикасы Президенти администра­циясы жанында мәлимлеме ҳәм ғалаба коммуникациялар агентлигиниң жумысын шөлкемлестириў ҳаққында»ғы қарары ҳәм «Мәлимлеме тараўын ҳәм ғалаба коммуникацияларды буннан былай да раўажландырыўға байланыслы қосымша илажлар ҳаққында»ғы Пәрманында пиар орайы жумысларын шөлкемлестириў ҳәм оны жетилистириў зәрүрлиги атап өтилген.  

Тийкарынан пиар хызмети мәмлекетлик уйымлардың халықаралық шөлкемлер менен бирге ислесиўинде, экономиканың түрли тармақларында, соның ишинде өндирис, санаат ҳәм қурылыс  тараўын раўажландырыўда сырт ел инвесторларын кеңнен тартыўда  әҳмийетли болып табылады.

Жуўмақластырып айт­қанда, пиар хызмети  журналистикада енди раўажланып киятырған тараў есапланады. «Пиар хызмети», «Баспасөз хызмети», «Баспасөз орайы» булар бир-бири менен синоним бол­ған сөзлер болып, атқаратуғын ўазыйпалары бир мақсетке қаратылған, яғный, жәмийетшилик пенен байланыслар орнатыў ҳәм бирге ислесиў болып табылады. Ол жәмийетте тынышлықты, абадан турмысты тәми­йинлеўде, үгит-нәсиятлаўда да үлкен әҳмийетке ийе. Сонлықтан мәмлекетлик уйымлардың жумысының жәрия­лылығын тәмийинлеўде ғалаба хабар қураллары менен менен өз-ара бирге ислесиў мәдениятын қәлиплес­тириўде баспасөз хызметлери  жумысын жетилистириў бүгинги күндеги ең әҳми­йетли мәселелерден бири болып табылады.

Абдиқадир ОРАЗОВ.

 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF