Еркин Қарақалпақстан Вести Каракалпакстана 04:09:41, 23.03.2019
Хош келипсиз! | RSS
Сайт мазмуны

Кириў усылы

ШЫҒЫНДЫЛАР УШЫН ТӨЛЕМЛЕРДИ ЎАҚТЫНДА ТӨЛЕЙИК

2018-жыл 22-ноябрь күни Өзбекстан Республикасы Президентиниң «Қатты турмыслық шығындыларды жыйнаў ҳәм алып шығып кетиў ушын төлемлерди төлеў системасын түп-тийкарынан жетилистириў илажлары ҳаққында»ғы  Пәрманы қабыл етилди.

Пәрманда атап көрсетилгениндей, быйылғы жылдың 1-январь сәнесинен баслап қатты турмыслық шығындыларды жыйнаў ҳәм оны алып шығып кетиў хызметлерин көрсетиў ушын пуқаралар тәрепинен төленетуғын мәжбүрий төлемлердиң толық ҳәм өз ўақтында жыйналыўын тәмийинлеў Мәжбүрий орынлаў бюросына жүклетилди. Бул төлемлерди әмелге асырыўдың жаңа тәртиби орнатылғанынан дерек береди.

Бүгинги күнде дүньяның барлық мәмлекетлеринде қатты турмыслық шығындылар жан басына есаплағанда артып, экологиялық турақлылыққа өзиниң унамсыз тәсирин тийгизип атыр­ғаны сыр емес. Бул шығындылар қоршаған орталықты патаслаўшы тийкарғы дереклердиң бирине айланып бармақта. Сонлықтан, Пәрманда қатты турмыслық шығындылардың белгиленген орынларға жыйналыўы, алып шығып кетилиўи ҳәм оны қайта ислеў системасын жолға қойыў нәзерде тутылған.

Буннан былай мәжбүрий төлемлер энергия ресурсларға болған талап сыяқлы пуқаралар тәрепинен ҳәр айдың 10 сәнесинен кешиктирмей әмелге асырылыўы шәрт.

Юридикалық шахслар ҳәм жеке тәртиптеги исбилерменлер болса төлемлерди тиккелей хызмет көрсетиўши шөлкемлерге 100 процент алдыннан ҳақы төлеў тийкарында әмелге асырады. Соның менен бирге, Мәжбүрий орынлаў бюросы қарыздарлықты айлық ис хақысынан услап қалыў, ҳәр айда мәжбүрий төлемлер бойынша қарыздарлықты өндириў ҳаққында ис бериўшиге талапнама бериў ҳуқықына ийе болады.

Пәрман менен әмелиятқа енгизилген және бир жаңалық, Экология ҳәм қоршаған орталықты қорғаў комитетиниң аймақлық бөлимлери жанында юридикалық шахс дүзбеген ҳалда санитариялық тазалаў хызметлери шөлкемлестирилмекте.

Жуўмақ орнында айтатуғын болсақ, пуқараларымыз шығындылар ушын төлемди ўақтында төлеў арқалы қоршаған орталықты, ана-тәбиятты қорғаўға, халықтың саламатлығын тәмийинлеўге өз үлесин қосқан болады.

 П.ҚОШИМОВ,

Мәжбүрий орынлаў бюросы Қарақалпақстан Республикасы Басқармасы

шөлкемлестириў-қадағалаў ҳәм талқылаў бөлиминиң инспекторы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF