Еркин Қарақалпақстан Вести Каракалпакстана 11:02:59, 23.01.2019
Хош келипсиз! | RSS
Сайт мазмуны

Кириў усылы

МАҚСЕТИ АНЫҚ, ЖЕТИСКЕНЛИКЛЕРИ ЖОҚАРЫ МЕКТЕПТЕ

Тахтакөпир районындағы 3-санлы қәнигелестирилген мәмлекетлик улыўма орта билим бериў мектеби усы аймақтағы ең үлгили билимлендириў мәкемеси болып табылады.

748 оқыўшы тәлим алып атыр­ған мектепке 2011-жылдан берли Өзбекстан Республикасы Халық билимлендириўи ағласы, Халық депутатлары районлық Кеңесиниң депутаты Г.Сейтназарова басшылық етип келмекте.

Жумыстағы тәлим-тәрбия процесиниң дурыс жолға қойылыўы ҳәм педагог хызметкерлердиң пидайы мийнетлериниң нәтийжесинде мектеп оқыўшылары билимлер беллесиўи, пәнлер олимпиадасы ҳәм ҳәр қыйлы таңлаў ҳәм спорт жарысларында белсене қатнасып, республикалық көлемде де сыйлы орынларды ийелеп жүр. Атап айтқанда, өткен оқыў жылында «Ана тилим — мақтанышым» таңлаўында 8-класс оқыўшысы Камила Сағынбаева, 9-класс оқыўшысы Нилуфар Бекмурзаева «Конституция — бахтымыз тийкары» таңлаўында, республикалық пәнлер олимпиадасында география пәни  бойынша 9-класс оқыўшысы Байрам Салиев республикада үшинши орынды ийелеўге миясар болған болса, «Жас қутқарыўшылар» жарысында мектеп оқыўшылары районда жеңимпаз атанып, республикада «Ең шаққан команда» номинациясы бойынша сыйлықланыўға миясар болды. Ал, «Жыл муғал­ли­ми — 2018» таңлаўына қатнасқан қарақалпақ тили ҳәм әде­бияты пәни муғаллими Гүлнара Әлиеваның республикалық басқышта биринши орынды ийелеп, 10 миллион сум ҳәм жеңиллетилген турақ жай кредитин жеңип алыўы мийнет жәмәәтин шексиз қуўанышқа бөлеп, олардың ертеңги күнге деген исенимин беккемлемекте.

Әлбетте, оқыўшылар ҳәм жас қәниге муғаллимниң усындай жоқары көрсеткишлерди қолға киргизиўинде тәжирийбели педагоглардан «Дослық» ордениниң ийеси Сарыгүл Султанова, Қарақалпақстан Республикасы Халық билимлендириўи ағлалары — Зухра Қыдырбекова, Сара Қаниязова, Бахтыгүл Есжанова, Жайна Бердимуратова, Медет Қосекеев, Галия Сейдаметова, Лиза Тилеўова ҳәм Алым Нысановлардың ат­қарып атырған хызметлери айрықша болмақта.

Ҳәзирги ўақытлары мектеп жәмәәти өзлериниң руўхый ҳәм ҳуқықый жақтан билимлерин еле де жетилис­тирип барыў мақсетинде республикамызда басылып шығатуғын газета-журналларға жазылыў мапазын шөлкемлескенлик пенен алып бармақта.

Ә.ОРАЗОВ, арнаўлы хабаршымыз.

Тахтакөпир районы.

СҮЎРЕТТЕ: Мектеп директоры, Өзбекстан Республикасы Халық билимлендириў ағласы Г.Сейтназарова бир топар муғаллимлер менен газетада шыққан материаллар бойынша пикирлеспекте.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF