Еркин Қарақалпақстан Вести Каракалпакстана 11:01:55, 23.01.2019
Хош келипсиз! | RSS
Сайт мазмуны

Кириў усылы

ЭНЕРГИЯ РЕСУРСЛАРЫН ҮНЕМЛЕЎ ­ ҲӘММЕНИҢ ЎАЗЫЙПАСЫ

Ҳәзирги заманда техноло­гияның раўажланыўы, экономиканың өсиўи энергия жумсалыўының артыўына себеп болмақта. Бул электр энергетика системасын модернизациялаў, оны үнемли пайдаланыў илажларын көриўди талап етеди.

Хал­қымыздың жасаў шараятын жақсылаўды электр энергиясыз әмелге асырыўдың имканияты жоқ. Сонлықтан да, ҳәр бир кәрхана, мәкемелерде, ҳәр бир шаңарақта электр энергиясын үнемлеп, ақылға уғрас пайдаланса мақсетке муўапық болар еди. Буннан елимиз ҳәм халқымыз мәп көреди.

Республикамыз бойынша халық хожалығын ҳәм халықты электр энергиясы менен тәми­йинлеў ушын бир суткада электр қуўатын пайда етиўши станция­ларда 40 миллион кубметрден зыят тәбийғый газ ҳәм 15 мың тоннадан аслам көмир сарпланады. Мине, усындай көлемде қәрежетлер жумсалатуғынын түсинген адам үнемлеўдиң  қаншелли зәрүрлигине әҳмийет берери анық. Қалаберсе, электр тармақларындағы үзилисти сапластырыўда үнемлеў ең жақсы имканият. Тилекке қарсы, электр энергиясынан нәтийжесиз пайдаланыў яки ысырапгершиликке жол қойыў жағдайлары ушырасып турады.

Бундай жағдайларды ҳеш қандай себеп пенен ақлап болмайды. Ең әўеле, өним таярлаў бирлигине жумсалатуғын энергия ҳәм қәрежетлерди азайтатуғын, үнемлеўге бағдарланған илажларды қоллаған мақул. Атап айтқанда, кәрхана ҳәм мәкемелерде, ислеп шығарыў цехларын жақтыландырыўда, шаңарақларда ҳәзирги пайдаланылып киятырған лампалар орнына заманагөй светодиод лампалардан пайдаланыў арқалы керекли электр энергиясын үнемлеў мүмкин.

Егер де, ҳәр бир шаңарақ 1 данадан 100 Ваттлы әпиўайы лампаны 10 Ваттлы энергия үнем­леўши светодиод лампаға алмастырса, суткасына шама менен 8 саат светодиод лампасынан пайдаланылса бир жылда 262,8 кВт. саат электр энергиясын үнемлеў имканиятына ийе боламыз.

Тағы бир артықмашлық тәрепи, светодиод лампалардың пайдалы ис коэффициенти ҳәм ислеў мүддети бир неше есе жоқары.

Елимизде экономиканы нәтийжели басқарыў, халқымыздың абаданлығын жақсылаў жолындағы реформалар көлеми жыл сайын кеңеймекте. Бул бағдарда тәбийғый байлықлардан үнемли пайдаланыўға айрықша әҳмийет қаратылыўы тосыннан емес. Себеби, тәбийғый байлықларымыз — газ, көмир, мазут жанылғыларының тежелиўи экономикамыздың турақласыўына үлесин қосады.

 С.АЯПОВ,

«Ўздавэнергоназорат» инспекциясы Қарақалпақстан Республикасы

аймақлық бөлиминиң аға инспекторы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF