Еркин Қарақалпақстан Вести Каракалпакстана 04:54:13, 27.06.2019
Хош келипсиз! | RSS
Сайт мазмуны

Кириў усылы

АГЕНТЛИККЕ  БИР  ЖЫЛ

Ҳүрметли Президентимиз Ш.Мирзиёев өз лаўазымына кирискен дәслепки күннен баслап-ақ тийкарғы итибарды халық пенен пикирлесиўге, олардың турмысындағы ҳәр қыйлы тәшўиш ҳәм машқалаларды нәтийжели шешиў системасын жаратыўға қаратып келмекте.

Өзбекстан Республикасы Президентиниң 2017-жыл 12-декабрьдеги «Мәмлекетлик хызметлерди көрсетиў системасын түп-тийкарынан реформалаў илажлары ҳаққында»ғы Пәрманына муўапық, буннан былай «Пуқаралар емес, ҳүжжетлер ҳәрекетленеди» принципин әмелде орынлаў ҳәм халқымыздың мәмлекетлик уйымлар ҳәм олар тәрепинен көрсетилетуғын хызметлерге болған исенимин арттырыў мақсетинде усы күни Президентимиздиң «Өзбекстан Республикасы Әдиллик министрлиги жанында Мәмлекетлик хызметлер агентлигин шөлкемлестириў илажлары ҳаққында»ғы қарары кабыл етилип, физикалық ҳәм юридикалық шахсларға мәмлекетлик хызметлерди көрсетиўши Мәмлекетлик хызметлер орайлары шөлкемлестирилген еди.

Мәмлекетлик хызметлер орайлары 2018-жылдың январь айынан өз жумысын 37 түрдеги мәмлекетлик хызметлерди көрсетиўден баслады. 2018-жыл 11-апрельде Өзбекстан Республикасы Президентиниң «Мәмлекетлик хызметлерди көрсетиў системасын жедел раўажландырыў бо­йынша қосымша илажлар ҳаққында»ғы қарары қабыл етилди. Бул қарарда мәмлекетлик хызметлерди көрсетиўдеги тәртип-қағыйдаларды ҳәм олардың мүддетлерин түптен қыс­қартыў, бланка, формаларды сезилерли дәрежеде оптималластырыў, келешекте мәмлекетлик хызметлерди енгизиўди және де жеделлестириўди тәмийинлеў мақсетинде халықтың мүтәжлигинен келип шыққан ҳалда, талап жоқары болған ең әҳми­йетли 70 тен 100 ге шекемги мәмлекетлик хызметлердиң 2018-жылдың 1-июнь сәнесинен тәжирийбе сыпатында айырым мәмлекетлик хызметлер орайлары тәрепинен көрсетилиўи жол­ға қойылды.

Ҳәзирги күнге келип, Нөкис қаласы мәмлекетлик хызметлер орайында 100 ден аслам хызметлер көрсетилип келмекте.

2018-жылдың 1-январынан усы күнге шекем орайымыз тәрепинен физикалық ҳәм юридикалық шахсларға 105 мыңнан артық мәмлекетлик хызметлер көрсетилди. Соннан 100 мыңнан асламы физикалық шахсларға көрсетилген хызметлер болды. Сондай-ақ, орай тәрепинен Юридикалық шахсларға мәмлекетлик хызметлер көрсетилип, 2018-жылдың усы дәўирине 1500 ге жақын пуқаралар жеке исбилермен сыпатында, 690 юридикалық тәреплер мәмлекетлик дизимнен өткерилди.

Жақында Мәмлекетлик хызметлер агентлигиниң шөлкем­лестирилгенлигине бир жыл толыўы республикамыздың барлық мәмлекетлик хызметлер орайларында кең түрде белгиленип өтилди. Нөкис қаласы мәмлекетлик хызметлер орайында усы сәне мүнәсибети менен илаж шөлкемлестирилип, онда орайға бириншилерден болып мәмлекетлик хызметлерден пайдаланған пуқараларға Мәмлекетлик хызметлер агентлиги Қарақалпақстан Республикасы басқармасы баслығы К.Артықов тәрепинен байрам саўғалары тапсырылды.

А.ИХЛАСОВ,

Нөкис қаласы мәмлекетлик хызметлер орайы директоры.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF