Еркин Қарақалпақстан Вести Каракалпакстана 11:35:07, 23.01.2019
Хош келипсиз! | RSS
Сайт мазмуны

Кириў усылы

ҚОРҒАНЫЎ ҲӘМ ИШКИ ИСЛЕР МИНИСТРЛИКЛЕРИ, МИЛЛИЙ ГВАРДИЯ—ҚАРАҚАЛПАҚСТАН ТӘЖИРИЙБЕСИ

Өзбекстан Республикасы Президентиниң «Қарақалпақстан Республикасында жәмийетлик тәртипти сақлаў ҳәм ҳуқықбузарлықлар профилактикасы системасы нәтийжелилигин арттырыў бойынша ис-илажлар ҳаққында»ғы бийлигиниң орынланыўы бойынша Қарақалпақстанда әмелий жумыслар басланып кетти.

Усы бийлик ишки ислер органлары хызметкерлериниң мәнаўий-Ўатансүйиўшилик тәрбиясы нәтийжелилигин және де асырыў, елимизде тынышлық ҳәм парахатшылықты тәмийинлеў бо­йынша ўазыйпаларды шешиўде олардың әскерлер менен тығыз бирге ислесиўин шөлкемлестириў, жәмлескенлик пенен ўазыйпаларды орынлаўда жаңаша қатнас сезимлерин қәлип­лестириў системасын жетилистириўге қаратылған.

Қарақалпақстан Реcпу­б­ликасында тәжирийбе сыпатында жынаятшылыққа қарсы гүресиў искерлигин тиккелей әмелге асыратуғын хызметкерлерди Қорғаныў минис­трлигиниң Арқа-Батыс әскерий округына қараслы әскерий бөлим базасында қәнигелестирилген оқыў-әмелий курсларында турақлы оқытыў системасын енгизиўге кирисилди.

Сондай-ақ, бийлик тийкарында ислеп шығылған жол картасына көре Нөкис қаласы ҳәм районларда жәмийетлик тәртипти сақлаў, ҳуқықбузыўшылық профилактикасы ҳәм де халықты мәнаўий-Ўатансүйиўшилик руўхында тәрбиялаўда Ишки ислер министрлиги ҳәм Миллий гвардияның Қорғаныў министрлиги менен бирге ислесиўи жолға қойылды.

Усы мүнәсибет пенен болып өткен илажда Қарақалпақстан Республикасы Минис­трлер Кеңесиниң Баслығы Қ.Сариев, Қарақалпақстан Республикасы Ишки ислер министри А.Темирханов, Арқа-Батыс әскерий округы жаўынгерлери командири, полковник Ф.Артықов, мәмлекетлик ҳәм жәмийетлик шөлкемлер ўәкиллери, нураныйлар, жаслар қатнасты.   

Бул шөлкемлестирилген илажлар Қарақалпақстанды социал-экономикалық раўажландырыўға, пуқаралардың пәраўан ҳәм тыныш турмыс кешириўин тәмийинлеўге, ҳуқықбузарлыққа кескин шек қойыўға, әсиресе, халықты, соның ишинде жасларды әскерий-патриотизм руўхында тәрбиялаўға хызмет етеди. 

ЖАСЛАР ӘСКЕРИЙ БӨЛИМДЕ

Арқа-Батыс әскерий округ бөлимлериниң биринде Нөкис қаласындағы улыўма билим бериў мектеплери, академиялық лицей ҳәм кәсип-өнер колледжлериниң жүзден аслам оқыўшылары ушын Ашық есиклер күни болып өтти.

Өзбекстан Республикасы Президентиниң «Қарақалпақстан Республикасында жәмийетлик тәртипти сақлаў ҳәм ҳуқықбузарлықлар профилактика системасы нәтийжелилигин арттырыў бойынша ис-илажлар ҳаққында»ғы бийлигине тийкар өткерилген илажда оқыўшы жаслар әскерий бөлим китапханасы, жатақхана, шынығыў бөлмелери, әскерий-техника ҳәм қурал жарақлар менен танысып ғана қалмай, әскерий хызметтеги адамлар менен сәўбет­лести.

— Әскерий хызметке меҳрим және де күшейди. Бүгин көргенлерим, еситкенлерим маған күш-қуўат берди. Келешекте усы ағаларым сыяқлы Ўатаныма садық перзент болыўға умтыламан, -дейди 34-санлы улыўма билим бериў мектебиниң 9-класс оқыўшысы Әлибек Жумамуратов.

«Темур тузуклери» темасында өткерилген сәўбетлесиў ўақтында оқыўшылар тек ғана Әмир Темур емес, соның менен бирге, уллы сәркарда бабаларымыз, бүгинги күнде пидайы хызмет етип атырған мәрт жигитлер ҳаққында да жаңа мағлыўматқа ийе болды.

Ашық есиклер илажлары даўамында спорт жарыслары да өткерилди. Оқыўшылар әскерлердиң асханасында болып, олар менен бирге аўқатланды.

ӘСКЕРЛЕР ПИДАЙЫ ЖАСЛАР ҚУРАМЫНДА

Нөкис қаласы Жаслар орайында Қарақалпақстан Республикасы Министрлер Кеңеси, Арқа-Батыс әскерий округы әскерлери командирлиги, Миллий гвардия ҳәм Ишки ислер минис­трлиги менен биргеликте «Жынаятшылықтың алдын алыўдың әҳмийетли мәселелери: машқала ҳәм шешимлер» деп атал­ған әнжуман өткерилди. 

Өзбекстан Республикасы Президентиниң «Қарақалпақстан Республикасында жәмийетлик тәртипти сақлаў ҳәм ҳуқықбузарлықлар профилактикасы системасы нәтийжелилигин арттырыў бойынша ис-илажлар ҳаққында»ғы бийлиги талапларын орынлаўға қаратылған әнжуманда жәмлеспеген жаслар, меҳрибанлық үйлери тәрбияланыўшылары ҳәм тыныш емес шаңарақларда балалардың профилактикалық есапта турған шахсларды тәрбиялаўға, оқытыўға ҳәм жумыс пенен тәмийинлеўге қаратылған анық мақсетли комплекс ис-илажлары белгилеп алынды.

Жаслар арасында саламат турмыс қәлпин ҳәм белсенди спортты кең ен жайдырыў мақсетинде шөлкемлестирилген спорт жарыслары, ғалаба спорт фестивальлары ҳәм спартакиадалар, сәўбет-тренинглерин өткериўде «Пидайы жаслар» жәмийетшилик топарларына ең белсенди әскерий хызметкерлер, хызметтеги жаўынгерлер киргизилиўи белгиленди. Ҳуқықбузарлық профилактикасы илажларын әмелге асырыўда Арқа-Батыс әскерий округ жаўынгерлери командирлиги имканиятлары ҳәм де офицер-сержантлардың әскерий-патриотизмди шөлкемлестириў жөнелисиндеги алдынғы тәжирийбелерден үнемли пайдаланыўға итибар берилди.

Усы күнниң өзинде Мойнақ районы оқыўшы жаслары менен «Жынаятшылық бизден жырақта, Ўатанды қорғаў — бәршемиздиң миннетимиз!» сүрени астында илажлар өткерилди. Район Қорғаныў ислери бөлими баслығы, майор Ҳуршид Тошев, «Тоқпақ ата» жомеъ мешити имам хатиби Рахимжан Тилеўбаев, район ишки ислер бөлими баслығы, подполковник Жамбул Арзуев ҳәм басқалар қатнасқан ушырасыўда оқыўшы жаслардың қызыққан сораўларына жуўаплар ҳәм зәрүрли усыныслар берилди.

***

Ҳүрметли Президентимиздиң усы жыл 28-ноябрьдеги видеоселектор мәжилисиндеги тапсырмалардың орынланыўы бойынша Қорғаныў министрлиги әскерий хызметкерлери шаңарақ ағзаларының бәнтлигин тәмийинлеў бойынша Қарақалпақстан Республикасы Ҳаял-қызлар комитети ҳәм Қарақалпақстан Бәнтлик ҳәм мийнет мүнәсибетлери министрлиги менен бирликте Нөкис гарнизоны Мәнаўият ҳәм маърифат орайында «Мийнет ярмаркасы» ҳәм «Китап ярмаркасы» өткерилди.   

Илажда Өзбекстан Республикасы Қорғаныў минис­трлиги тәрбиялық ҳәм идеологиялық ислер Бас бас­қармасы баслығы ўазыйпасын атқарыўшы подполковник Х.Халилов, Арқа-Батыс әскерий округы басшылығы, Нөкис әскерий прокурорының аға жәрдемшиси,  әдиллик подполковниги Ш.Қудайбергенов, республика Ҳаял-қызлар комитетиниң баслығы З.Ибрагимова ҳәм басқалар шығып сөйледи.

«Мийнет ярмаркасы»нда Қарақалпақстан Республикасы ҳәм Нөкис қаласында жайласқан 165 кәрхана ҳәм шөлкемлер өзлериниң 686 бос орынлары менен қатнас­ты. Илажда әскерий бөлим ҳәм мәкемелерде хызмет етип атыр­ған әскерлер, Қураллы Күшлер хызметкерлериниң жумыс пенен тәмийинленбеген ҳәм ҳәзирги күнде жумыс ислеўге зәрүр шаңарақ ағзалары, колледж питкериўши жаслары қатнасып, оларға өз қәнигеликлери бойынша ти­йисли мәсләҳәт ҳәм жолламалар берилди.

«Мийнет ярмаркасы» илажынан соң гарнизонның офицерлер Мәнаўият ҳәм маърифат орайында Өзбекстан Республикасы әскерий прокуратурасы тәрепинен Нөкис гарнизонында жай­ласқан әскерий бөлим ҳәм мәкемелерде хызмет етип атырған әскерий хызметкерлердиң шаңарақ ағзалары ҳәм пенсионерлер менен қабыллаў өткерилди. 

Илаж қатнасыўшылары өзлерин қызықтырған барлық сораўларына жуўаплар алды.

Г.ХАБИБУЛЛАЕВА,

Қорғаныў минис­трлиги баспасөз хызмети,

Арқа-батыс әскерий округы ҳаял-қызлар ҳәм әскерий хызметкерлердиң

шаңарақ ағзалары менен ислесиў бойынша жетекши қәниге.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF