Еркин Қарақалпақстан Вести Каракалпакстана 09:12:15, 04.07.2020
Хош келипсиз! | RSS
Сайт мазмуны

Кириў усылы

ЖАС ӨСПИРИМЛЕРИМИЗ ДЕ,

ҚЫЗЛАРЫМЫЗ ДА ҮРГЕНИШТЕ ОЙНАЙДЫ

Спортта «өз үйиңде дийўаллар да жәрдем береди» деген ибара бар. Оның қаншелли дәрежеде дурыс екенлигин өткен ҳәптеде пайтахтымызда қол тобы бо­йынша быйыл «Үмит нәлшелери» спорт ойынларының Хорезм­де болып өтетуғын финаллық беллесиўлерине жоллама алыў ушын шөлкемлестирилген таңлап алыў ойынлары және бир мәрте дәлилледи. Тамашагөйлердиң тынымсыз қоллап-қуўатлаўы арқасында жас өспиримлеримиз де, қызларымыз да өзлериниң барлық ойынларын жеңис пенен жуўмақлап, Үргениште ойнаў ҳуқықын қолға киргизди.

1-санлы балалар ҳәм жас өспиримлер спорт мектебинде шөлкемлестирилген соңғы ойын­да қарақалпақстанлы қызлар Жиззақ командасын 21:14 есабында жеңилиске ушыратты. Командамыздың бул табысына Гүлназ Өтәмбетова, Гүлмийра Абыллаева, Шаҳсәнем Шарапова, Айшолпан Жуманиязовалар өзлериниң шебер ойынлары менен салмақлы үлеслерин қосты.

Ал, Нөкис Олимпия резервлери колледжиниң спорт залында болып өткен соңғы ойында Қарақалпақстан Республикасының ер балалар командасы да исенимди ақлады. Олар сурхандәрьялы теңлеслерин 19:16 есабында утып, шешиўши басқыш­қа жоллама алды.

— Нөкисте болған күнлеримиз бир өмирге есимизде қалады деп ойлайман, - дейди жарыс қатнасыўшысы, қашқадәрьялы Фаррух Журамурадов. ­ Бизлер бул жерде тек ойнап ғана қоймай, жарыстан тысқары ўақытларымызды ҳәр тәреплеме кеўилли өткердик. Нөкистиң дыққат­қа ылайықлы орынларын тамашаладық. Қулласы, барлығы әжайып тәризде шөлкемлестирилген...

Ҳақыйқатында да, Нөкисте өткерилген бул таңлап алыў ойынлары оған қатнасқан жас өспиримлер ҳәм қызлардың қәлбинде бир өмир есте қалатуғынына гүман жоқ.

С.ЖАНИЕВ,

арнаўлы хабаршымыз.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF