Еркин Қарақалпақстан Вести Каракалпакстана 07:30:33, 27.09.2020
Хош келипсиз! | RSS
Сайт мазмуны

Кириў усылы

Акобир ҚУРБАНОВ:

«ТӘСИРЛЕРИМ ӨЗ АЛДЫНА»

Биз чемпионат барысында самбо ҳәм миллий гүрес бойынша жәҳән ҳәм Азия чемпионы, халықаралық дәрежедеги спорт шебери, Өзбекистан Республикасы Ишки ислер министрлиги Академиясы «Физикалық таярлық» кафедрасының баслығы, «Өзбекистон ифтихори» көкирек нышанының ийеси Акобир Қурбанов пенен қысқаша сәўбетлескен едик.

— Акобир, Нөкис сизде қандай тәсир қалдырды?

— Шынын айтсам, Нөкиске биринши мәрте келиўим. Соған қарамастан, бир дүнья тәсирлер менен қайтаман деп ойлайман. Қаладағы қурылыслар, бой тиклеп атырған шырайлы имаратлар ҳәм спорт объектлери кимниң болса да ҳәўесин келтиретуғыны тур­ған гәп.

 

Әсиресе,   И.В.Савицкий атындағы мәмлекетлик көркем өнер музейи, ондағы халқыңыздың өтмишинен сөйлейтуғын бийбаҳа экспонатлар менде айрықша тәсир қалдырды. Солай екен, имканият туўылса бул жерге және келиўди кеўлиме түйип қойдым.

— Чемпионатта беллесип атырған палўанлардың шеберлиги жөнинде не айтасыз?

— Жарысты бақлаў даўамында сол нәрсеге көзим жетти, самбо мәмлекетимиздиң барлық ўәлаятларында жоқары дәрежеде раўажланған. Чемпионатта жеңип шыққан самбошылар және де көбирек изленип, шынығыўларды күшейтсе, дүньяның қәлеген елиниң палўанлары менен теңбе-тең беллесе алады деп биймәлел айта аламан. !сиресе, қарақалпақстанлы спортшылардың улыўма командалық есапта биринши орынды алыўы тосыннан емес. Бүгинги чемпионат бул журттан Сансызбай Юсупов, Азамат Турдановтай әжайып палўанлардың бийкарға шықпағанын көрсетти. 100 килограмман аслам салмақ категориясында алтын медальды қолға киргизген Мийирбек Абдихалиқов та өзиниң жақсы перс­пективаға ийе спортшы екенлигин дәлилледи.

— Жарыстың шөлкем­лестирилиўи бойынша пикирлериңиз бенен ортақ­лас­саңыз?

— Мәмлекетимиздиң барлық орынларында өткерилип кия­тыр­ған бундай жарыслардан жуўмақ шығарған ҳалда сол нәрсени айтыўым керек, бул чемпионат оғада әжайып тәризде шөлкемлестирилген. Мийман спортшыларды, олардың тренерлерин, төрешилерди күтип алыў, жайластырыў, қаланың дыққатқа ылайық орынларын көрсетиў, жаратылған шараятлар — барлығы да айрықша дәрежеде. Буның ушын Қарақалпақстан Республикасы Жоқарғы Кеңеси ҳәм Министрлер Кеңесине, Мәденият ҳәм спорт ислери министрлигине, Қарақалпақстан Самбо ассоциациясы ўәкиллерине миннетдаршылығымыз шексиз.

Сәўбетлескен:

С.ЖАНИЕВ,

арнаўлы хабаршымыз.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF