Еркин Қарақалпақстан Вести Каракалпакстана 09:07:35, 04.07.2020
Хош келипсиз! | RSS
Сайт мазмуны

Кириў усылы

ҲАҚЫЙҚЫЙ МӘРТЛЕР БЕЛЛЕСИЎИ

Бурын хабар еткенимиздей, усы жылдың 10-11-апрель сәнелеринде пайтахтымыздағы спорт манежинде жаўынгерлик самбо бойынша ересеклер арасында ҳәм спорт самбосы бойынша ветеранлар арасында Өзбекистан чемпионаты болып өтти. Еки күн даўамында манежди толтыр­ған спорт ықласбентлери әжа­йып беллесиўлердиң, палўанлардың күши, шаққанлық ҳәм шеберликлериниң, жеңиске деген умтылысларының гүўасына айланды.

Спорттың қайсы түринде болса да күшли таярлансаң, тренериңниң көрсетпелерин булжытпай орынласаң ҳәм өзиңниң алдыңа белгили бир мақсет қойсаң, мәрре сеники. Бул сапары да солай болды. Чемпионат­қа жақсы таярлықлар менен келген палўанлар өз қарсыласларын бирим-бирим тәслим етип, шешиўши басқышларға жетип барды ҳәм жарыс жуўмағында сыйлы орынларды ийелеўге миясар болды. Қуўанышлы тәрепи, олардың басым көпшилигин қарақалпақстанлы самбо шеберлери қурады. Атап айтқанда, көп жыллық тәжирийбеге ийе нураный палўанларымыз 11 алтын, 7 гүмис ҳәм 1 қола — жәми 19 медальды қолға киргизип, командалық есапта биринши орынды ийеледи. Олардан өзлериниң жас ҳәм салмақ категорияларында барлық қарсыласларынан басым келип, чемпионлық атақты жеңип алған Руслан Реймов, Зарип Жақсымов, Алаўатдин Саитов, Азамат Юсупов, Бахтияр Ешимбетов, Дәўлет Ешниязов, Жийен­бай Қалжанов, Назарбай Атабаев, Олжас Өтемуратов, Өтебай Ибрагимов ҳәм Зарапатдин Заитовлардың атларын атап өткен орынлы.

Өзлериниң тәжирийбели устазлары ҳәм ағаларының табысларынан руўхланған жас палўанларымыз да бос келмеди. Жарыс­тың қурамалы ҳәм қыйынырақ болған жаўынгерлик самбо түринде беллескен олар 2 алтын, 2 гүмис ҳәм 5 қола ­ барлығы болып 9 медальды қолға киргизип, республикамыз сайланды командасының улыўма есапта биринши орынды ийелеўин тәмийинледи. 100 килограммнан артық салмақ категориясында беллескен Мийирбек Абдихалиқов ҳәм 57 килограммға шекемги салмақта Ислам Искендеровлар Өзбекистан чем­пионы атақларын жеңип алған болса, Аман Ғаниев (52 кг.) пенен Азамат Ҳакимов (82 кг.) лар екинши орынды ийеледи. Сондай-ақ, А.Оразымбетов, Д.Жоллыбаев, Р.Рейпназаров, А.Ибрагимов ҳәм А.Рузматовлар чем­пионаттың қола медальлары менен сыйлықланды. Улыўма командалық есапта екинши орын әндижанлы самбо шеберлерине несип еткен болса, үшинши орынды самарқандлылар ийеледи.

Чемпионат жуўмағында жеңимпазларды ҳәм сыйлы орын ийелерине медальларды ҳәм естелик саўғаларын тапсырыў мәресими болып өтти. Мәресимде Қарақалпақстан Республикасы Жоқарғы Кеңесиниң комитет баслығы Б.Нурабуллаев, Өзбекистан Самбо ассоциациясы президенти Р.Ахмаджанов ҳәм бир топар спорт ветеранлары жарыс жеңимпазларын қутлықлап, алдағы беллесиўлерде олар­ға табыслар тиледи.

С.ЖАНИЕВ,

арнаўлы хабаршымыз.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF