Еркин Қарақалпақстан Вести Каракалпакстана 18:46:21, 02.07.2020
Хош келипсиз! | RSS
Сайт мазмуны

Кириў усылы

ИНСПЕКТОР ТОҚТАТҚАНДА...

Ҳақыйқатында қала иши ҳәм тысқарыдағы рәўан жолларда техникалық қуралларды басқарып киятырған айдаўшыларын тоқтатқан мәмлекетлик автоинспекция хызметкерлери нызамлы рәўиште олардың ҳүжжетлериниң дурыслығын, автомобильлердиң техникалық сазлығын тексериўлери тийис. Тилекке қарсы, тараўда ислеўши айы­рым қәнигелер өзине тапсырылған ўәкилликтен нызамға қылап, ғәрезгөй мақсетлерде пайдаланып, шофёрлардың ҳүжжетлерине емес, «қолына» қараўға өткен.

Қараң, 1987-жылы Нөкис қаласында туўылған, «Жийдели байсын» мәкан пуқаралар жыйыны, Кегейли көшеси №11 жайда жасаўшы Сейтназаров Ерполат Бахытбаевич те «шайтан азғырған» жолға түскен. Ол Қарақалпақстан Республикасы Ишки ислер министрлиги Жол ҳәрекети қәўипсизлиги басқармасы айрықша жол-патруль хызмети отряды үшинши мобилизациялық топарының жол-патруль хызмети аға инспекторы лаўазымында ислеп келип, бекитилген маршрутлар кестесине  тийкар Қоңырат районы аймағындағы «Жаслық» қорғаны постында өз хызмет ўазыйпасынан қасттан пайдаланып, дәмегөйлик пенен материаллық байлық арттырыўға урынған. Атап айтқанда, өткен жылы май айының басларында «Қоңырат-Каракалпакия» жөнелиси бойынша ҳәрекетленип киятырған «Исузи» маркалы, мәмлекетлик белгиси 95 Т  110 DA болған автобус шофёры Нуралы Атажановтан 50 мың сум пулды ҳүжжетлерин тексерместен өткерип жибериў есесине алып, жеке мәп көрген. Буннан тысқары, усы нызамсыз ҳәрекет 18-май күни     Н.Атажановқа тәкирар қайталанады. Сондай-ақ, усы күни «Қоңырат-Бейнеў» жөнелиси бойынша ҳәрекетленип киятырған «Мерседес-Бенц» маркалы, мәмлекетлик белгиси 95 892 JAA болған жолаўшы тасыўшы автобусты тоқтатып, жоқарыдағы нызамсыз ҳәрекетин даўам еттиреди. Лекин, бул сапары шофёр жәрдемшиси Ақылбек Жолмановтан 100 мың сум алып атырғанда ҳуқық қорғаў уйымы хызметкерлери тәрепинен оның ҳәрекетлерине шек қойылады.

Әлбетте, ҳәрқандай нызамсыз ҳәрекетке күни келип шек қойылатуғынлығын умытпаўымыз тийис. Е.Сейтназаровтың нызамсыз ҳәрекетлерине суд тәрепинен нызамлы жаза тайынланды.

Б.ҚУРБАНОВ.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF