Еркин Қарақалпақстан Вести Каракалпакстана 00:28:03, 17.10.2018
Хош келипсиз! | RSS
Сайт мазмуны

Кириў усылы

НЫЗАМ ҲҮЖЖЕТЛЕРИНИҢ ОРЫНЛАНЫЎЫНА БАҒЫШЛАНДЫ

Жақында Өзбекстан Республикасы Олий Мажлиси жанындағы жәмийетлик фонд қаржыларын басқарыў бойынша парламент комиссиясының «Социаллық шериклик ҳаққында»ғы Нызам ҳәм Президентимиздиң 2018-жыл 4-май сәнесиндеги «Мәмлекетти демократиялық жаңалаў процесинде пуқаралық жәмийети институтларының ролин түп-тийкарынан арттырыў илажлары ҳаққында»ғы Пәрманында белгиленген ўазыйпалардың нәтийжели орынланыўына бағышланған илаж болып өтти. Оған мәмлекетлик емес коммерциялық емес шөлкемлер ҳәм пуқаралық жәмийетиниң басқа да институтларының ўәкиллери, сондай-ақ, ғалаба хабар қураллары хызметкерлери қатнасты.

Илажды Қарақалпақстан Республикасы Жоқарғы Кеңесиниң комитет баслығы Сағындық Турманов басқарып барды. Онда, Өзбекстан Республикасы Олий Мажлиси жанындағы жәмийетлик фонд директоры Отабек Хусанов, Қарақалпақстан Республикасы Әдиллик минстири Жаңабай Садықов ҳәм басқалар сөзге шығып, жоқарыда атап өтилген нызам ҳәм пәрманның мазмун-әҳмийети, соның менен бирге, республикамызда мәмлекетлик емес коммерциялық емес шөлкемлер ҳәм пуқаралық жәмийетиниң басқа да институтлары менен өз-ара бирге ислесиўдеги жумыслардың  нәтийжелери бойынша айрықша тоқтап өтти.

Атап өтилгениндей, елимиздиң ҳәр тәреплеме ҳәм жедел раўажланыўында мәмлекетлик емес коммерциялық емес шөлкемлер ҳәм пуқаралық жәмийети институтларының мәмлекетлик ҳәкимият ҳәм басқарыў уйымлары менен бирге ислесиўди беккемлеў,  2017-2021-жылларда Өзбекстан Республикасын раўажландырыўдың бес тийкарғы бағдары бойынша Ҳәрекетлер стратегиясында белгилеп берилген ўазыйпаларды әмелге асырыў мақсетинде Өзбекстан Республикасы Президенти жанында пуқаралық жәмийетин раўажландырыў бо­йынша мәсләҳәт Кеңеси шөлкемлестирилип, оның тийкарғы ўазыйпалары белгилеп берилди.

Пәрман талапларынан келип шығып, Қарақалпақстан Республикасы Жоқарғы Кеңесиниң 2018-жыл 8-июнь сәнесиндеги Президиум қарары менен Жоқар­ғы Кеңес жанынан мәмлекетлик емес коммерциялық емес шөлкемлер ҳәм пуқаралық жәмийетиниң басқа да институтлары мәселелери бойынша турақлы комиссиясы ҳәм оларды қоллап-қуўатлаў жәмийетлик фонды шөлкемлестирилди. Оның тийкарғы ўазыйпалары, мәмлекетлик емес коммерциялық емес шөлкемлер ҳәм пуқаралық жәмийетиниң басқа да институтларының жумысын раўажландырыў, сондай-ақ, олардың материаллық-техникалық базасын беккемлеў, ҳуқықый мәсләҳәт бериў және грант жойбарлары ҳәм басқа да бағдарламаларды әмелге асырыўда көмеклесиў екенлиги бойынша түсиниклер берилди.

Илаж соңында қатнасыўшылар өзлерин қызықтырған сораўлары бойынша қәнигелерге мүрәжат етип, тийисли жуўаплар алды.

 А.ОРАЗОВ.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF