Еркин Қарақалпақстан Вести Каракалпакстана 05:56:13, 26.06.2019
Хош келипсиз! | RSS
Сайт мазмуны

Кириў усылы

ҮЙРЕНГЕН  ӘДЕТ...

Жынаят ислери бойынша Нөкис қалалық суды тәрепинен Өзбекистан Республикасы атынан шығарылған бул ҳүкимди оқып отырып ашынамыз. Болмаса, 1986-жылы Хорезм ўәлаяты, Үргениш районында туўылған Бабажанов Темурбек Рузметович алдын Бухара ўәлаяты, Жынаят ислери бойынша Ромитан районы судының 14.08.2009-жылғы ҳүкими менен 6 жыл мүддетке еркинен айырыў жазасына судланған. Соң Жынаят ислери бойынша Қоңырат районы судының 21.03.2012-жылғы уйғарыўы менен жазаның өтелмеген үш жылға шамаласы ҳәр ай сайын мийнет ҳақысының 20 процентин услаў жолы менен дүзетиў жазасына алмастырылған ҳәм Үргениш районы судының 25.01.2013-жылғы  уйғарыўы менен Амнис­тия акти қолланылып, жаза мүддети үштен бир бөлегине қысқартылып, Үргениш қаласы «Спорт фарм» жуўапкершилиги шекленген жәмийетинде 2013-жыл 1-февральдан 1-апрель күнине шекем ўақтынша ис жүритиўши болып ислеген.

 

Қараң, қанша жеңиллик, қанша кеширимлилик. Буннан тийисли жуўмақ шығарғанда, әттең... Алдынғы жазасын өтеп болмай атырып, және «үйренген әдет қалама, көтере бер мушыңды»ға барды.

Судланыўшы Т.Бабажанов алдын судланып, жазасын «Спорт фарм» жуўапкершилиги шекленген жәмийетине қараслы аўшылық ҳәм балықшылық дүканында ислеп өтеп жүргенине қарамастан өзине тийисли жуўмақ шығармай, ис жүритиўши лаўазымынан ғәрезгөй мақсетте пайдаланып, өзлестириў, растрата етиў жолына өткен. Атап айтқанда, өзиниң ийелигинде болған, исенип тапсырылған 23 дана пластмасса қутыларға салынған 5 килограмм 750 грамм муғдарындағы «Сунар-35» маркалы аўшылық ушын арналған оқ дәрилерди (порох) аўшылық билети жоқ екенлигин биле тура танысы О.М.Абдуллаевқа 1200000 сумға нызамға қылап рәўиште сатқан. Бул жына­йый ҳәрекетин жасырыў мақсетинде дүканның кирим-шығым етилген оқ атар қурал, оқ дәрилер ҳәм аўшылық, балықшылық әнжамлары жазылған дәптердиң 1040-санлы тәртип номеринен дизимнен өткен Хазарасп районында жасаўшы пуқара У.Қурбанбаев ҳақыйқатында 1 қуты «Сунар-35» атамасындағы оқ дәрилер (порох) шығым етилгенлигине қарамастан оған 15 қуты, ал 1 қуты алған Ш.Бабажановқа 10 қуты сатылған етип, ҳүжжетлерди қәлбекилестирген. Буннан басқа, ол өзине исенип тапсырылған 72 дана пластмасса қутыға салынған 18 килограмм «Сунар-35» атамасындағы оқ дәрилерди нызамға қылап рәўиште сатыў жолы арқалы өткизип, кирим-шығым дәптерине қәлбекилестириў жолы менен киргизген. Сатылған товар пуллары қадағалаў-касса аппаратынан өткерилмеген. Т.Бабажановтың бундай жынайый ҳәрекетлерине Төрткүл районы пуқарасы Отабек Абдуллаев ҳәм Тахтакөпир районы пуқарасы Ақантай Сақтағановлар шерик болып, аўшылық билетлери жоқ болыўына қарамастан оқ дәрилерди алып, қымбатырақ сатыў арқалы мәп көрип отырған.

«Баспақтың жуўырғаны сабанханаға шекем». Олардың да бул нызамсыз жуўырып-жортыўларына ҳуқық қорғаў уйымы хызметкерлери тәрепинен шек қойылып, әдил суд тәрепинен ҳәрқыйлы жылларға еркинен айырыў жазасы тайынланды.

Б.ҚУРБАНОВ.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF