Еркин Қарақалпақстан Вести Каракалпакстана 00:52:16, 17.10.2018
Хош келипсиз! | RSS
Сайт мазмуны

Кириў усылы

КИТАПҚА КЕЎИЛ БӨЛГЕН МЕКТЕПТЕ

Китап — ең садық дос ҳәм ең жақсы сырлас. Китап оқыў адамның ақыл-ойын, көзқарасын өсиреди ҳәм сөз байлығын, шешенлигин арттырады.

Ҳәзирги күнде елимизде адамның китап оқыўына барлық шараятлар жетерли. Қала ҳәм ра­йонларда китап дүканлары, китапханалар, мәлимлеме-ресурс орайларынан дүнья әдебияты классиклериниң өлмес шығармаларына қоса өзимиздиң жазыўшы-шайырларымыздың китапларын табыўға болады. Сондай-ақ, мектеп китапханалары да бай шығармаларға толыспақта. Елликқала районындағы 22-санлы улыўма билим бериў мектебинде оқыўшылардың китап пенен досласыўына айрықша кеўил бөлинген. Б.Аллабергенов басшылық етип атырған мектепте 1826 оқыўшы тәлим-тәрбия алмақта.

­ Бүгинги күнде жаслардың китапқа болған мүнәсибетин, зәрүрликлерин қаплаў биз үлкенлердиң ўазыйпамыз. Оқыўшыларымызға китап оқыў адамға руўхый күш, билим ҳәм қуўаныш кеңлигин саўға етиўин нәсиятлап келемиз. Бүгинги күнде мектебимиз китапханасында 5 мыңнан зыят көркем-әдебий, илимий китаплар бар. Келешегимиз ийе­лерин Ўатансүйиўшилик руўхында тәрбиялаў, түрли мәнаўий қәўиплерден қорғаўда китаптың орны айрықша, - дейди мектеп директоры Баҳрам Аллабергенов китапхана менен таныстыра жүрип.

Ҳақыйқатында да, перзентлеримизди жақсылыққа жетелеўши китапқа балалығынан үйретсек, көп нәрседен утамыз. Бүгинги күни китап дүньяның сегизинши әжайыбаты деп тән алынбақта. Ал, китап ушын бул таптырмас теңеў.

Дүньядағы қәстерли кәсип ийелери — муғаллимлери елимизде қәдирленген байрамда, оқыўшылардың ақыл-санасын китап арқалы толықтырып барыўды мақсет еткен мектептиң үлгили ислерин қағазға түсиргенди мақул көрдик.

Қ.РЕЙМОВ, өз хабаршымыз.

Елликқала районы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF