Еркин Қарақалпақстан Вести Каракалпакстана 01:29:30, 20.09.2019
Хош келипсиз! | RSS
Сайт мазмуны

Кириў усылы

АЛДАЎШЫЛЫҚТЫҢ

АҚЫБЕТИ

Халқымыз арасында сондай адамлар бар, сениң оң жағыңа бир, шеп жағыңа бир шығып, исенимиңе кирип алады да «шалқаңа» салып кетеди. Бундай «шаққан» инсанларға «шайтанға сабақ береди» деп баҳа береди. Усындай баҳаны 1969-жылы Қоңырат районында туўылған, алдын жынаят ислери бойынша Қоңырат районы  судының 2013-жыл 30-декабрь күнги уйғарыўы менен амнистия актине тийкар жуўапкершиликтен азат етилген Дощанова Роза Мәтжановнаға да бериўге болады. Өйткени, ол кимге балаңды яки қызыңды, кимге өзиңди жумысқа орналастырып беремен деп исенимине кирип, алдаўшылық жолы менен бирнеше пуқараның мүлкин қолға киргизиўге ерискен.

Атап айтқанда, Р.Дощанова Қоңырат темир жол емлеўханасының поликлиника бөлими балалар ханасы мийирбийкеси болып ислеп жүрип, алдаўшылық жолы менен өзгелердиң мүлкин қолға киргизиў мақсетинде 2013-жыл 6-июнь күни өзиниң қол телефоны арқалы усы райондағы Абдуллаев көшеси 31-жайда жасаўшы танысы Тәңирбергенова Генжегүлдиң уялы телефонына қоңыраў етип, оның баласы Сапарбаев Рахаттың жумыссыз жүргенлигинен хабар таўып: «Әжапа, балаңды Қоңырат темир жол емлеўханасына жумысқа киргиземен, балаң яки өзиң 3 (үш) миллион сум пулды бүгин район ора­йындағы «Туран» кафеси алдына алып келиң. Пул менен бирге балаңның паспорт ҳәм диплом копиялары да болсын» деп оны қызықтырып ҳәм исенимине кирип пара бериўге көндирген. Нәтийжеде айтылған кафе жанында пуқара Р.Сапарбаев пенен ушырасып, жумыс­ты питкеретуғын адамға беремен деп 3 миллион сумды алдаўшылық жолы менен алып, өзиниң жеке мәпине жумсаған.

«Айналайын сәллем сеннен, ҳешким гүман етпес меннен» деген ибараға сүйенген      Р.Дощанова өзиниң жынайый ҳәрекетлерин даўам еттирип, 2013-жыл 16-август күни Қоңырат темир жол узелине «праводник» етип жумысқа киргиземен деп Р.Айт­жановтан 1500 АҚШ долларын, келеси күни усындай жол менен Р.Қәлимбетовтан 1000 АҚШ долларын алдаўшылық жолы менен алып, өз мәпине жумсаған.

Негизинде қолымыздағы суд ҳүкиминдеги топланған материаллар менен танысар екенбиз, оның жигирмадан аслам абзацы «Буннан басқа Р.Дощанова өзиниң жынайый ҳәрекетлерин тоқтатпастан» деген сөзлерден ибарат қатар менен басланады. Демек, бул абзацлардың ҳәр бириниң бир жынайый ҳәрекет екенлигин оқыўшыларға түсиндирип отырыўдың қәжети жоқ шығар, деп ойлаймыз.

«Албыраған үйрек арты менен де, алды менен де сүңгийди» деген гәп бар. Албыраған адам ше..? Р.Дощанова да өзин өрге-ыққа урып, 2013-жыл июнь-декабрь айлары аралығында бирнеше пуқаралардан алған ҳәм өз мәпине жумсап жиберген миллионлап пулларды өзгеден өндириў ҳәм жынайый жуўапкершиликтен қутылып қалыў мақсетинде реже дүзеди.

Усы жынайый режеге тийкар 2013-жыл 20-декабрь күни темир жол регионаллық тармағы ПМС-279 кәрханасында крановщик болып ислеўши Өтепбергенов Хамид Қуўатбаевичти поликлиникаға шақыртып, көпшиликтиң көзинше «мына балаға 6 (алты) мың доллар бердим, пулды қайтарып бересең» деп жала жаўады ҳәм өзгелерден алған пулларын пара сыпатында Хамидке берген болып, пуқараларға жеткизген зыянды оннан өндирмекши болады. Бул бойынша кәрхана баслығы К.Рабаевқа арыз етип, Х.Өтепбергенов адамларды жумысқа киргизип бериў есесине пара сыпатында 6 мың АҚШ долларын алып қайтып бермей жүргенлигин айтады. Бундай жала-дөҳметти темир жол мәкемесинде жүк тасыў бөлими инструкторы болып ислеўши Ағатаев Султан Парахатовичке де қолланып, темир жол узели баслығы К.Ш.Нурыллаевтың алдына барып: «Ағатаев Султан инимниң баласын ДЕПОға жумысқа киргиземен деп меннен темир жол тармағы мәкемесиниң кирер есиги алдында 10 мың АҚШ долларын алды» деп жала жабады. Оның пуқараларға жеткизилген зыян ҳәм жынайый жуўапкершиликтен қутылып қалыў мақсетиндеги бундай жалғанлары ҳеш қандай тасты­йығын таппады.

Бүгингидей тыныш, абадан турмысымызда барына қанәәт, жоғына шүкиршилик етип бала-шағаңның алдында күлип-ойнап күн кеширгенге не жетсин. Қам сүт емген бенде, базы да өзимизди ўақтында тоқтатып қала алмай сүрнигемиз. Соңғылығында ислеген исимизден қатты пушайман болып, орны толмас өкинишке қаламыз. Мине, ислеген жынайый ҳәрекетлеринен қаншелли пушайман болмасын, Р.Дощанова да қылмысларына жараса тийисли жазаға ҳүким етилди.

Б.ҚУРБАНОВ.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF