Еркин Қарақалпақстан Вести Каракалпакстана 01:10:35, 17.10.2018
Хош келипсиз! | RSS
Сайт мазмуны

Кириў усылы

ЖАМАН ИЛЛЕТЛЕРДЕН САҚЛАНАЙЫҚ

Мәмлекетимизде жасларды Ўатанды сүйиўшилик, руўхый дүньясы жетик ҳәм физикалық жақтан бәркамал әўладты камал­ға келтириў, олардың ҳуқықлары менен мәплерин қорғаў бойынша бир қатар жумыслар әмелге асырылып келинбекте.

Жақында Ташкент мәмлекетлик Аграр университети Нөкис филиалында Өзбекстан Республикасы Ишки ислер министрлиги халықаралық аэропортлар қәўипсизлигин тәмийинлеўши әскерлери бөлимине қараслы «Н» санлы әскерий бөлиминиң әскерий хызметкерлер, қатардағы әскерлер ҳәм филиалдың профессор-оқытыўшылары ҳәм студент-жаслары қатнасыўында «Диний экстремизм ҳәм фундаментализм идеясы — миллий қәўипсизликке қәўип» атамасында семинар шөлкемлестирилди.

Илажда қалалық ҳаял-қызлар комитети баслығы Г.Абибуллаева, ТашМАУ Нөкис филиалы директорының орынбасары А.Жумамуратов, әскерий бөлим басшысы, подполковник Х.Палванов ҳәм Мухаммад ибн Ахмад ал-Беруний атындағы Нөкис орта арнаўлы ислам билим журтынан келген қәнигелер қатнасыўшыларға бүгин дүньяның түрли мүйешлеринде, әсиресе, жақын шығыста муқаддес ислам дини атынан әмелге асырылып атыр­ған терроршылық ҳәрекетлери, ислам түсиниги ҳәм идеяларын бузып түсиндириў ар­қалы сада адамларды алжастырыў жағдайлары динимиздиң кеңпейиллик, әпиўа­йылық ҳәм инсаныйлыққа бағдарланған сап таза тәлийматын халқымыз, әсиресе, жасларымызға дурыс түсиндириў зәрүрлиги жөнинде түсиниклер берип өтти.

— Бүгинги күнде дүньяның түрли аймақларында ҳәўиж алып атырған қарама-қарсылықлар, қанлы урыслар, мусылман дүньясындағы түрли  ағымлардың арасында күшейип баратыр­ған экстремизм ҳәм терроризм сыяқлы жаман ағымлардың ис-ҳәрекетлери нәтийжесинде бийгүна адамлардың қурбан болып атыр­ғаны бәршемизди тәшўиш ҳәм қәўетерге салмай қоймайды. Мине, бүгинги өткерилип атырған илажда қатардағы әскерлер ҳәм студент-жаслар усындай жаман иллетлерге қарсы гүресиў керек екенлиги және бир мәрте атап өтилди,-дейди бөлимниң жаслар аўқамы жетекшиси, капитан О.Салимов.

Илаж соңында қатнасыўшыларға «Үйдеги қараңғылық» ҳәм «Өз Ўатанын сатып Сирияға кетген Ўатан қыянетшилери» атамасындағы видеофильмлер қойып берилди.

Ж.ИСКЕНДЕРОВ,

ҚМУ журналистика қәнигелигиниң 4-курс студенти.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF