Еркин Қарақалпақстан Вести Каракалпакстана 06:31:17, 26.06.2019
Хош келипсиз! | RSS
Сайт мазмуны

Кириў усылы

ДИНИЙ ӘДЕБИЯТЛАРДЫ САҚЛАЙМАН ДЕП...

Өзбекистан Республикасы Конституциясы ҳәм «Ҳүждан еркинлиги ҳаққында»ғы Өзбекистан Республикасы Нызамына муўапық, елимиз пуқаралары өзлери қәлеген динге исениўге ямаса ҳеш қандай динге исенбеўге ҳақылы. Бирақ, сол нәрсени умытпаў керек, бул еркинлик тийисли шөлкемлерден дизимнен өтпеген диний әдебиятларды нызамсыз сақлаў ямаса оларды шегара-бажыхана постларынан алып өтиў ҳуқықын бермейди. Тилекке қарсы, күнделикли баспасөз, телевидение ҳәм радио арқалы усындай нызамсыз ҳәрекетлерди ислеген заманласларымыз ҳаққында оқып-билип, көрип ҳәм еситип жүрмиз. Олардың биразлары ҳаққында газетамыз бетлеринде де жазылып атыр.

Беруний қаласындағы «Тоқымашы» мәҳәллесинде жасаўшы, 1959-жылы туўылған пуқара Камал Ибрагимов та усындай заманласларымыздың бири болып шықты. «Үргениш аэропорт» бажыхана постынан өтип атырған оның «Samsung» маркалы ноутбугиниң ядындағы 15 дана ҳәм «Nokia Xpress Music» маркалы уялы телефоны аппаратының ядындағы 17 дана диний мазмундағы аудио ҳәм видео файллар бул пикиримизди тастыйықлайды.

Ҳуқық қорғаў уйымлары хызметкерлериниң қырағылығы нәтийжесинде бундай нызамсыз ҳәрекетке шек қо­йылды ҳәм Жынаят ислери бойынша Үргениш қалалық судында болып өткен суд мәжилисинде судланыўшы К.Ибрагимов ҳәм гүўалардың көрсетпелери, тергеў материалларының жуўмақлары бойынша оның айыбы мойнына қойылып, бул пуқара Өзбекистан Республикасы Жынаят Кодексинде көрсетилген тийисли статьялар тийкарында жазаға тартылды.

«Тек жүрген тоқ жүреди» дейди халқымыз. Сол айтқандай, К.Ибрагимов та бундай нызамсыз ислерге қол урмағанда, жақынларының алдында да, жәмийетшиликтиң алдында да жүзи жарқын болып жүрер еди.

М.АЛИЕВ.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF