Еркин Қарақалпақстан Вести Каракалпакстана 00:30:13, 17.10.2018
Хош келипсиз! | RSS
Сайт мазмуны

Кириў усылы

КОРЕЯЛЫ ШЫПАКЕРЛЕР  ҚАРАҚАЛПАҚСТАНҒА  КИЯТЫР

Қарақалпақстан Республикасы Денсаўлықты сақлаў министрлиги Қубла Корея Республикасының мәмлекетлик емес коммерциялық емес «FRIENDS» шөлкеми менен 2017-жыл май айында дүзилген меморандумға ҳәм Қарақалпақстан Республикасы Жоқарғы Кеңесиниң Баслығы тәрепинен 2017-жыл 25-июльде тастыйықланған 24-санлы баянламаның орынланыўына тийкарланып, усы жылдың 24-30-сентябрь күнлери аралығында Қубла Корея Республиканың шыпакерлери республикамызға келип, наўқасларды медициналық тексериўлерден өткереди ҳәм зәрүр жағдайларда хирургиялық операцияларды ислеў нәзерде тутылған.   

Қарақалпақстан Республикасы Денсаўлықты сақлаў министрлигине Қубла Корея Республикасы Сеул қаласындағы мәмлекетлик емес коммерциялық емес «FRIENDS» шөлкеминиң жойбар баслығы Ким Мёнг Динниң  2018-жыл 16-август 14-0хх-санлы жоллаған хатында көрсетилиўинше, сентябрь айының 24-сәнесинен 30-сәнесине шекем Қарақалпақстан халқына медициналық жәрдем көрсетиў бойынша қайырқомлық акциясын өткериў ушын арнаўлы топары Нөкиске келеди.

Кореялы шыпакерлер топары қурамында бет-жақ хирурглери, пластик операция ислеўши хирурглер, стоматологлар, педиатрлар, терапевтлер, фармацевтлер, орта медицина хызметкерлери ҳәм басқа да жәрдемшилерден ибарат 46 қәниге бар.

Ислениўи күтилип отырған операцияларF туўма қоян жырық, мурын бослығының зыянланыўы ҳәм басқа да жақ хирургиясына байланыслы нуқсанларды емлеўден ибарат.

Наўқаслардың санына қарай операциялар 6-7 күн даўам етеди. Операциялардың қурамалылығына қарап 70-90 операция ислениўи мүмкин. Жергиликли емлеўхана тәрепинен операция столларының тәмийинлениўине қарай бир ўақыттың өзинде 3-4 операцияларды ислеў мүмкиншилигине ийе.

Айтып өтиў тийис, топар ағзалары медициналық әсбап-үскенелерди өзлери менен алып киятыр. Хожалық дуз еритпелери ҳәм дезинфекциялаўшы қураллар ҳәм басқа да еритпелер менен усы жерде тәмийинлениўи керек. Себеби, олар багажда көп орынды алады.

Қалалық ҳәм районлық медицина бирлеспелеринде диспансерлик есапта турған медициналық тексериўге (операцияға) зәрүрлиги бар наўқас балалар Республикалық көп тармақлы балалар медицина орайы тәрепинен дизимге алынбақта.

Еслетип өтемиз, Республикалық көп тармақлы балалар медицина орайының хирургия бөлиминде операция ислениўи тийис балалар ушын орынлар ажыратылып, операциядан кейинги емлерин алыўы ушын барлық шараятлар жаратылған.

Кореялы шыпакерлердиң республикамызда болған  сапар барысы менен келеси санларымыз арқалы мағлыўматлар беремиз.

Г.ЖҮГИНИСОВА,

арнаўлы хабаршымыз.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF