Еркин Қарақалпақстан Вести Каракалпакстана 00:53:02, 17.10.2018
Хош келипсиз! | RSS
Сайт мазмуны

Кириў усылы

КЕҢ ИМКАНИЯТЛАР ОРАЙЫ

2017-2021-жыллары Өзбекстан Республикасын раўажландырыўдың бес тийкарғы бағдары бойынша Ҳәрекетлер стратегиясының ўазыйпаларына муўапық, жаслардың бизнес басламалары, идеялары менен жойбарларын жүзеге шығарыўға жәрдемлесиў ҳәм қоллап-қуўатлаў, жумыссызларды мийнет базарында талап жоқары бол­ған қәнигеликлерге ҳәм бизнес жүргизиў көнликпелерине оқытыў, сондай-ақ, улыўма жаслардың социаллық-экономикалық белсендилигин арттырыў арқалы олардың бәнтлигин тәмийинлеўге қаратылған «Жаслар — келешегимиз» Мәмлекетлик бағдарламасы усы жылдың 1-июль сәнесинен баслап республикамыздың барлық қала ҳәм районларында әмелге асырылмақта.

«Жаслар — келешегимиз» Мәмлекетлик бағдарламасының орынланыўын тәмийинлеў мақсетинде Хожели районында да бир қатар унамлы жумыслар әмелге асырылмақта. Атап айтқанда, Өзбекстан Жаслар аўқамы жанындағы «Жаслар — келешегимиз» қорының Хожели районлық филиалы шөлкемлестирилип, оған бүгинги күнде жас исбилермен Айдос Балтамуратов басшылық етпекте.

Усы жылдың август айы­ның ақырында район ора­йындағы «Абат» МПЖ аймағынан Мәмлекетлик бағдарлама тийкарында жаңадан саўда турмыслық ҳәм киши өндирис майданларын шөлкемлестириў ушын «Жаслар мийнет гүзары» комплекси иске түсти. Жеке меншик инвестор Айбек Оразбаев бул районлық «Жаслар мийнет гүзары»н 750 млн. сум муғдарындағы өз қаржысы есабынан үлги-жойбарға муўапық сапалы етип қурып, пайдаланыўға тапсырды. Бүгинги күни имараттың биринши қабатында китап, оргтехника ҳәм парфюмерия саўда орайлары, екинши қабатында гөззаллық салоны ҳәм мебель саўда дүканы ислеп тур. Бул жерде 20 жастың жумыс пенен бәнтлиги тәмийинленген.

Быйылғы жылда Өзбекстан Жаслар аўқамы жанындағы «Жаслар — келешегимиз» қорының Хожели ра­йонлық филиалына Мәмлекетлик бағдарламадағы илажларды қаржыландырыў ушын 3 млрд. 116 млн. сум муғдарында қаржы ажыратылып, бул қаржылар жыллық 7 процентлик ставка бо­йынша 31 жойбар ийелерине берилмекте.

Усы қаржылар тийкарында келешекте районда форумлар, мастер-класслар ҳәм семинарлар шөлкемлестириў ушын жаңадан бир «Жас исбилерменлер» коворкинг орайы ҳәм саўда-турмыслық ҳәм киши өндирислик майданларын шөлкемлестириў ушын алты «Жаслар мийнет гүзары» комплекслери иске түседи ҳәм жасларға 136 жаңа жумыс орынлары жаратылады.

 Сағынбай  ОРАЗЫМБЕТОВ,  өз хабаршымыз.

Хожели районы.

СҮЎРЕТЛЕРДЕ: жеке меншик инвестор Айбек Оразбаев тәрепинен

жаңадан пайдаланыўға берилген «Жаслар мийнет гүзары»

комплексиниң бүгинги турмысынан көринислер.

Автордың түсирген сүўретлери. 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF