Еркин Қарақалпақстан Вести Каракалпакстана 01:40:51, 17.10.2018
Хош келипсиз! | RSS
Сайт мазмуны

Кириў усылы

«ӨРКЕНЛИ»ЛЕРДИҢ ҚУЎАНЫШЫ

Бөршитаў етеги, Қаратерең жағасында жайласқан «Өркенли» аўылының хал­қы Өзбекстан Республикасы Ғәрезсизлигиниң 27 жыллық байрамы ҳәм жаңа оқыў жылын көтериңки кейпиятта күтип алды.

Әсиресе, аймақтағы 14-санлы улыўма орта билим бериў мектебиниң педагогикалық жәмәәти ҳәм оқыўшыларының жүзиндеги қуўанышын тил менен айтып жеткизиў қыйын. Олар менен сөйлессең кеўлиңди әжайып сезимлер бийлеп, буннан көп жыл бурын өткен балалықтағы шийрин демлериңди аңсайсаң.

— Усы мектептиң 10-класында тәлим аламан, -дейди Жупаргүл Өтебаева. Кишкенелигимнен Лондон, Париж, Москва, Рим, Токио сыяқлы гөззал қала­ларға барып, саяхат етиўди арзыў етемен. Сол ушын инглис тилин қунт пенен үйренип атырман. Бунда маған муғаллимимиз Ақшагүл Жийемуратова устазлық етпекте. Сондай-ақ, қолы гүл қурылысшылар тәрепинен мектебимиз имаратының жаңадан қурып берилиўи бизлер ушын кең қолайлылықлар жаратты. Буның ушын Президентимиз Шавкат Мирзиёев ҳәм республика басшыларына шексиз миннетдаршылық билдиремиз. Келешекте олардың билдирген үмит ҳәм исенимин ақлаў ушын бар интамыз бенен үлгили оқыўға ҳәрекет етемиз.

Ҳақыйқатында да, бай тәбият көринислерине ийе бул аўылда усындай көркем ҳәм заманагөй имараттың бой тиклеўи жүзикке қас қондырғандай жарасыпты.

— Муғаллимшиликтеги дәслепки жылым, -дейди математика пәни оқытыўшысы Адий Әўезов. — Өзим де усы дәргайда тәлим алдым. Бизлер оқыған дәўирлерде мектебимизде бундай қолайлы шараятлар жоқ еди. Усындай кең ҳәм жақтылы арнаўлы кабинетлерге ийе мектепте сабақ өтип атырғанымнан күтә қуўанышлыман...

Мине, жоқарыда атап өткенимиздей, «Өркенли»лердиң қуўанышын кишкене мақалаға сыйдырыў мүмкин емес. Себеби, олардың ҳәр бириниң келешектен күткен арзыў-үмитлери үлкен бир дүнья.

Ә.ОРАЗОВ.

Тахтакөпир районы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF