Еркин Қарақалпақстан Вести Каракалпакстана 05:39:29, 26.06.2019
Хош келипсиз! | RSS
Сайт мазмуны

Кириў усылы

НЫЗАМСЫЗ ҲӘРЕКЕТ

ЖАЗАСЫЗ ҚАЛМАЙДЫ

Бүгинги күни республикамыздағы қурылыс тараўында алып барылып атыр­ған ислер, жаңадан-жаңа бой тиклеп атырған имаратларды көрип көзиң қуўанады. Лекин, бес бармақтың бирдей болмағанындай, усындай ийгиликли ислерде мәмлекет мүлкине көз алартып, өзлериниң жеке мәпин гөзлеўшилер де табылып қалады.

Усындай қурылыс тараўының «қаҳарман»лары қатарында «Қишлоқ қурилиш инвест» жуўапкершилиги шекленген жәмийети  Инжиниринг компаниясы Қарақалпақстан Республикасы филиалының директоры болып ислеп келген Өтегенов Бахтыяр Есбергенович, усы филиалдың бас есапшысы лаўазымында ислеп келген Хожаниязов Жаңабай Дәўлетбаевич, фил­иалдың жойбарларды бас­қарыў ҳәм қурылысты техникалық тексериўден өткериў бөлиминиң баслығы болып ислеп келген Дошымов Еденбай Әсенбаевич ҳәм усы бөлимниң бас қәнигеси лаўазымында ислеп келген Сүлайманов Жиемурат, Төрткүл районы «Янги замон бунёдкори» ЖШЖ менеджери болып ислеген Ныязымбетов Баҳадыр Әметбаевич ҳәм усы жәми­йеттиң бас есапшысы болып ислеген Худайбергенов Казах Аллабергеновичлер менен өз-ара жынайый тил бириктирип, бир неше жыллар даўамында мәмлекет мүлкин талан-тараж етиў арқалы көп муғдарда зыян келтирген.

Мақаламыздың «қаҳарман»лары өзлериниң хызмет дәўиринде республикамыздың бир неше районларындағы аўыллық жерлерде үлги жойбарлар тийкарында жеке тәртиптеги турақ-жайлардың қурылыс жумысларында  өз-ара жынайый тил бириктирип, қурылыс жумыслары ҳаққындағы ҳүжжетлерге жалған мағлыўматлар киргизип, потолоклаў, суў өлшегишлер ҳәм шкафларды орнатыў, дийўал өриў, сыбаў, суўағарлар, «Аристон»­лар орнатыў ҳәм басқа да жумысларды сапасыз ислеген болса да, сапалы етип көрсетип, рәсмий ҳүжжет есапланған форма-2 актлерин ҳәм форма-3 есап бетлерин биле тура қәлбекилестирип, өз-ара жынайый тил бириктирип, көп муғдардағы мәмлекет мүлкин өзлестириў арқалы талан-тараж еткен.

«Айды етек пенен жаўып болмайды» дегениндей, «қаҳарман»ларымыз «ислеген қылмысларымызды ҳеш ким билмейди» деп ойлағаны менен олардың бул нызамсыз ҳәрекетлери ҳуқық қорғаў уйымлары хызметкерлери тәрепинен өз ўақтында анықланып, олар Өзбекистан Республикасында белгиленген нызамшылық тийкарында тийисли жазаларға тартылды.

«Қыңыр истиң қыйығы қырық жылдан соң да шығады» деген. Сол айтқандай, исленген ҳәр қандай нызамсыз ҳәрекет жуўапсыз қалмайтуғынын бәрқулла ядта тутыўымыз лазым.

А.АРЫСЛАНОВ.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF