Еркин Қарақалпақстан Вести Каракалпакстана 17:24:32, 18.12.2018
Хош келипсиз! | RSS
Сайт мазмуны

Кириў усылы

ЖАСЛАР МАҚТАНЫШЫНА АЙЛАНҒАН КӘРХАНА

Пайтахтымыздағы «Қызкеткен» елатына кире беристеги өндирис кәрханаларының иске қосылғаны көрген көзди қуўандырады. Соны айрықша атап өтиўимиз керек, Өзбекстан Республикасы Президентиниң 2017-жыл 13-июньдеги «Нөкис қаласында электротехника өнимлерин ислеп шығарыўды шөлкемлестириў ҳаққында»ғы қарары тийкарында өндириске қосылған «NUKUSELECTROAPPARAT» жуўапкершилиги шекленген жәмийети қоспа кәрханасы қысқа ўақыт ишинде өз өнимлери менен халқымыз мақтанышына айланды.

Бул жердеги Италияның «Prima Power», «Taiss», Германияның «Gema», сондай-ақ Швейцария, Қытай, Россия еллериниң абырайлы компанияларының ең соңғы инновациялық технологиялары жәрдеминде ислеп шығарылып атырған  6-10 ҳәм 110кВ  қуўатлылығына ийе трансформатор подстанцияларына елимиз халық хожалығының барлық тараўларында талап артып бармақта.

— Кәрханамызда барлық түрдеги электр үскенелери ислеп шығарылмақта, - дейди ислеп шығарыў цехы баслығы Жасур Жаббаров. — Жаңа технологиялар менен үскенеленген заводта  170 адам беккем аўызбиршилик пенен  жумыс ислеп атыр.  Солардың ярымынан көбисин жаслар қурайды. Бул жерде жумысшылардың нәтийжели мийнет етиўи ушын барлық қолайлылықлар жара­тыл­ған. Ҳәзир өз өнимлеримиз бенен ишки базарды толық тәмийинлеп атырмыз ҳәм алдағы ўақытлары сырт еллерге экспорт етиўди режелестиргенбиз...

— Бундай өндирис кәрханасында жумыс ислеп атырғанымнан қуўанышлыман, - дейди оператор Нурдәўлет Рахманов. — 2013-жыл Нөкис мәлимлеме ҳәм хабар технологиялары кәсип-өнер колледжин питкерген едим. Өткен жылдан баслап өз қәнигелигим бойынша жәмәәт қатарына қосылдым ҳәм өз ис тәжирийбемди  арттырыў ушын Ташкент қаласындағы «Өзэлектроаппарат-Электрощит» заводында өндирис технологиясын үйренип қайттық. Соңғы заманагөй технологиялар жәрдеминде таярланған өнимлеримизди ишки базарға өз ўақтында жеткерип бериўде үлесимди қосып атырғанымнан мақтанышлыман. Мине, Ўатанымыздың ең уллы ҳәм ең әзиз байрамы саналған Ғәрезсизлигимиздиң 27 жыллық қутлы сәнеси менен пүткил халқымызды байрам менен қызғын қутлықлайман...

Әлбетте, бундай санаат кәрханаларының көбейиўи жергиликли базарларымызды импорт орнын басатуғын сапалы өнимлер менен тәми­йинлеў, экспорт көлемин кеңейтиў, ең тийкарғысы, ғәрезсиз елимиздиң гүллеп-раўажланыўында хызмет ете береди.

 А.ОРАЗОВ,

арнаўлы хабаршымыз.

 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF