Еркин Қарақалпақстан Вести Каракалпакстана 10:11:41, 15.10.2018
Хош келипсиз! | RSS
Сайт мазмуны

Кириў усылы

ӨЗБЕКСТАН РЕСПУБЛИКАСЫ ҒӘРЕЗСИЗЛИГИНИҢ 27 ЖЫЛЛЫҒЫ АЛДЫНАН

Биз ҳәрдайым сырт елдиң өнимлерине жоқары баҳа берип келемиз. Әсиресе, күнделикли тутыныў бу­йымларын сатып алғанымызда олардың қайсы сырт ел фирмасында шыққанлығына қызықсынамыз.

Телевизор сатып алғанымызда оның дүньяға белгили «SAMSUNG» яки «LG» фирмалары өнимин алыўға тырысамыз. Ал, бундай телевизорлардың өзимизде ислеп шығарылып атырғанлығынан болса, көпшилигимиздиң хабарымыз бола бермейди. Сырт елдиң өнимлеринен қалыспайтуғын, пайтахтымыздағы «Нөкис-Реммаш» жуўапкершилиги шекленген жәмийетине қараслы Кореяның «SAMSUNG» бренди астында ислеп шығарылып атырған техника қуралларының сапасы ҳәттеки, сырт ел өнимлери менен бәсекиге шыдамлы десек асыра айтқан болмаймыз.

 Мәмлекетимиз Президенти Ш.Мирзиёевтиң 2017-жыл 21-январьдағы республикамызға сапары даўамында «Нөкис-Реммаш» жуўапкершилиги шекленген жәмийетинде бир қатар көрсетпе ҳәм тапсырмалар бергенинен соң, кәрханада 2017-жылдың апрель-октябрь айларында қайта қурылыс ҳәм реконструкция жумыслары әмелге асырылды. Нәтийжеде кәрхана жаңа көриниске ийе болды.

— Бүгинги күни кәрханада бир күнде 4 түрдеги 400 телевизор ҳәм 13 түрдеги 900-1000нан аслам шаңжутқыш (пылесос), жылына 80 мың телевизор, 120 мың шаңжутқыш ислеп шығарылмақта,-дейди жәми­йет директоры Қозимбек Яминов. — Ҳәзирги ўақытта ислеп шығарып атырған өнимлеримиз бенен шекленип қалмастан, келеси жылдан шаңжутқышқа керекли болған шланга ҳәм щҢткаларын да ислеп шығарыўды алдымызға мақсет етип қойғанбыз. Дәслепки ўақытлары өним ислеп шығарыўға керекли болған полипропилен шийки затын сырттан алып келер едик. Бул өз гезегинде бизлерге артықша қаржы ҳәм қыйыншылық жаратар еди. Ал, ҳәзирги ўақытта бул шийки зат түри өзимиздеги «Уз-Кор Газ Химикал» кәрханасынан жеткерилип тур. Бул бизлерге бир қанша жеңиллик жаратып берди...

Бүгинги күни кәрханада 200 ден аслам хызметкерлер ислеп атыр­ған болса, соның көпшилик бөлегин кәсип-өнер колледжлерин питкерген жаслар қурайды. Кәрханада исши хызметкерлердиң өнимли жумыс ислеўин тәмийинлеўге, олардың бос ўақтын мазмунлы шөлкемлестириўге де айрықша итибар қаратылған. Китапхана, медициналық хана, футбол, волейбол, баскетбол майданшалары олардың хызметинде. 

— Мен өткен жылы пайтахтымыздағы Нөкис хабар технологиялары кәсип-өнер колледжин тамамлап, кәрханаға жумысқа кирдим. Тәжирийбе-сынаў мүддетлеринен өтип, бул кәсип сырларын тез өзлес­тирип алдым. Бул жерде ислеп жумыс орны менен тәмийинленгениме жүдә қуўанышлыман. Келешекте өз кәсибимди терең меңгерип, елимизде инновациялық технологияларды раўажландырыўға үлесимди қосаман,-дейди кәрхана хызметкери Дамир Қаллыбеков.

Бүгинги күнде ислеп шығарған өнимлери Өзбекстанның барлық жерлерине жеткерилип турған «Нөкис-Реммаш» жуўапкершилиги шекленген жәмийетине қараслы Кореяның «SAMSUNG» бренди астында ислеп шығарылып атырған телевизор ҳәм шаңжутқышларға талап күшли. Усындай өзимизде ислеп шығарылған өнимлер бәрқулла халқымыздың ийгилигине хызмет етип “әрезсизлигимизди беккемлеўге үлес қосады.

 Р.АРЗИЕВарнаўлы хабаршымыз.

С.ЖОЛДЫБАЕВ.

СҮЎРЕТЛЕРДЕ: кәрхананың жумыс процесинен көринислер.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF