Еркин Қарақалпақстан Вести Каракалпакстана 16:37:27, 23.10.2018
Хош келипсиз! | RSS
Сайт мазмуны

Кириў усылы

ЕЛЛИКҚАЛАЛЫ  ЭНЕРГЕТИКЛЕРДИҢ  ЖУМЫСЛАРЫ  КӨЗ  ҚУЎАНДЫРАДЫ

«Абат аўыл» бағдарламасының қабылланыўы қысқа ўақыт ишинде аўыл-аймақлардың турмысын жақсы тәрепке өзгерткенлиги бүгинги күнниң ҳақыйқаты.

Бул бағдарламаға муўапық Елликқала районындағы «Ақшакөл» аўыл пуқаралар ҳәм де «Чайка» мәҳәлле пуқаралар жыйынларында қурылыс жумыслары жедел түрде шөлкемлескенлик пенен жүргизилмекте. Аўыл халқының қурылыстың барысынан кеўиллери көтериңки. Аўылларының көркейиўинен, абаданластырыў ҳәм азадалықтағы жаңаланыўлар, аймақ турғынларының көзқарасын унамлы тәрепке өзгерткен. Буны олардың аўылларының тазалығына жумыла кирискенлигинен көрсек болады.

Электр энергиясы күнделикли турмысымыздың ажыралмас бөлегине айланды. Онысыз жасаў шараятымыз әдеўир машқалаға айланарын бәршемиз жақсы түсинемиз. Айта кетерлик жағы, аўылларымызға бағдарлама бойынша заманагөй трансформаторлар қурылып, бетон бағаналар орнатылып, кабель линияларының тартылыўы халықты үзликсиз электр энергиясы менен тәмийинлеўге қосентин тийгизип атыр.

Елликқала районлық электр тәмийинлеўши кәрханасы жәмәәти ағзалары өзлерине исенип тапсырыл­ған жуўапкершиликли ўазыйпаны сапалы орынлаўға айрықша итибар қаратпақта. Атап айтқанда, «Ақшакөл» АПЖ аймағында 3 дана трансформатор жаңадан қурылып, ал, 3 данасы реконструкцияланды. 2 километр 900 метр аралыққа «СИП» кабель линия­сы тартылды. Сондай-ақ, 4 километр 700 метр аралықтағы тозыўы жеткен линиялар тазасына алмастырылды. Район аймағынан қашықлаўда жайласқан «Чайка» мәҳәллесинде жасаўшылардың электр энергиясына болған машқалалары унамлы шешимин тапты. Жаңадан трансформатордың қурылыўы, 1 километр 140 метр аралыққа кабель линиясы тартылғаны аўыл турмысына өзгерис алып кирди.

Бундай ири көлемдеги жумыслардың сапалы жүргизилиўинде участка усталары А.Сейдахметов,    А.Төремуратовлар басқар­ған бригада ағзалары шөлкемлескенликтиң үлгисин көрсетип келмекте. Аўылларымыздағы жаңаланыўлар, өзгерислер ой-қыялымызды «қәнекей, усындай аўылларымыз жақтылық нурларына тола берсе екен» деген жақсы ни­йетке ерксиз жетеледи. Елимиздеги реформалардың тийкарғы мақсети — халқымызды разы етиў, оларға мүнәсип турмыс шараятын жаратыў екенлигин ҳәр биримиз ядымыздан шығармасақ, «жүзикке қас қондыр­ғандай» болар еди...

Қ.РЕЙМОВ, өз хабаршымыз.

Ш.МАДРАИМОВА.

Елликқала районы.

СҮЎРЕТТЕ: участка устасы А.Абдирахманов ҳәм электромонтёр А.Халмуратовлар жумыс басында.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF