Еркин Қарақалпақстан Вести Каракалпакстана 21:38:23, 20.11.2018
Хош келипсиз! | RSS
Сайт мазмуны

Кириў усылы

ҲУҚЫҚБУЗАРЛЫҚТЫҢ  АЛДЫН АЛҒАН ЖАҚСЫ

Бүгинги күнде ең көп ушырайтуғын ҳуқықбузарлықлардан бири бул автотранспорт қуралларында жүз беретуғын урлық жынаяты десек қәтелеспеймиз.

Бундай жынаятлардың алдын алыўда аймақ профилактика инспекторларының хызмети айрықша. Сонлықтан да, бундай жынаятлардың алдын алыўда профилактика инспекторларының қолда бар техникалық, байланыс қуралларынан өнимли ҳәм нәтийжели пайдаланыў талап етиледи. Яғный, олардың улыўма ҳәм жеке тәртиптеги профилактикалық илажларды дурыс қолланыўы ҳәм пайдаланыўы жынаяттың ашылыўына унамлы тәсирин тийгизеди.

Автомобильлерде жүз беретуғын жынаятлардың келип шығыўына жәбирлениўшиниң өзи айыплы. Көп жағдайларда пуқаралар өзлериниң автомобилин қараўсыз қалдырады. Машинаның ишинде қымбат баҳалы буйымларын, ақшасын қалдырып кетеди ҳәм усындай бийпәрўалықтың арқасында жынаят жүз бериўине имканият жаратады. Усылардан келип шығып, профилактика инспекторлары биринши нәўбетте халық арасында түсиндириў жумысларын шөлкемлестириўи шәрт. Автомобиль ийелерин машиналарын қараўсыз қалдырмаўы бойынша ескертиўи ҳәм соның менен бирге, аймақта қадағалаў жумысларын алып барыўы лазым.

Ҳәр қашан да аймақта ҳәр дайым автомобиль ийелерин ескертиў ҳәм үгит-нәсият жумысларының жүргизилиўи бул түрдеги жынаятлардың кемейиўине алып келеди. Сондай-ақ, бундай урлық жынаятлардың алдын алыўда аймақтағы объектлер ҳәм көп қабатлы үйлер әтирапында қараўсыз қалдырылған автомобильлердиң ийелерин ескертиў, жол ҳәрекети қәўипсизлик хызмети инспекторлары менен биргеликте аймақта жайласқан кәрхана, мәкемелерде, сондай-ақ, пуқаралар арасында түсиндириў жумысларын алып барыў ҳәм де кең жәмийетшилик пенен тығыз бирге ислесиў унамлы нәтийже береди.

Жоқарыда атап өтилген бир қатар ис-илажларды аймақ профилактика инспекторлары тәрепинен турақлы әмелге асырылыўы усы түрдеги жынаятлардың кемейиўин тәмийинлейди.

 А.КАБУЛОВ,

Өзбекстан Республикасы ИИМ академиясының курсанты.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF