Еркин Қарақалпақстан Вести Каракалпакстана 21:18:44, 20.11.2018
Хош келипсиз! | RSS
Сайт мазмуны

Кириў усылы

ПӘРМАН ҲӘМ ОНЫҢ ОРЫНЛАНЫЎЫ ӘПИЎ ЕТИЎ—КЕҢПЕЙИЛЛИК КӨРИНИСИ

Бүгинги күнде елимизде әмелге асырылып атырған инсаныйлық сиясатының тийкарғы мақсети, адамлар арасында халқымызға тән кеңпейиллик, бир-биреўге кеширимли болыў, мийрим-шәпәәт көрсетиў пазыйлетлерин қәлиплестириўге қара­тыл­ған.

Бул мәселелер Президентимиздиң усы жыл 8-майдағы «Өзбекстан Республикасында әпиў етиўди әмелге асырыў тәртиби ҳаққындағы режени тастыйықлаў ҳаққында»ғы ҳәм 12-июньдеги «Еркинен айырыў жазасын өтеп атыр­ған, қылмысына шын кеўилден пушайман болған ҳәм дүзелиў жолына беккем байлаған бир топар шахсларды әпиў етиў ҳаққында»ғы Пәрманларында өзиниң әмелий көринислерин таппақта.

Атап айтқанда, Президентимиздиң 2018-жыл 8-майдағы ПП-5439-санлы Пәрманына қосымша «Өзбекстан Республикасында әпиў етиўди әмелге асырыў тәртиби ҳаққындағы Реже»де әпиў етиў ҳаққындағы өтиниш хатларды усыныў, рәсмийлестириў ҳәм көрип шығыў, сондай-ақ, Өзбекстан Республикасы Президенти жанындағы Әпиў етиў мәселелери бойынша комиссияның жумысын шөлкемлестириў тәртибин белгилейтуғыны көрсетилип өтилген.

Режениң 2009-жылы 13-мартта қабыл етилген Режеден өзгешелиги сонда, бурын­ғы Режеде «Әпиў етиў ҳаққындағы өтиниш хаты қағыйда ретинде судланған шахс тәрепинен жазба түрде Өзбекстан Республикасы Президенти атына бериледи» деп белгиленген болса, жаңа Режеде усы өтиниш хаты судланған ямаса жазаны өтеп шыққан шахс, сондай-ақ, нызам тәрепинен өтиниш хат киргизиў ҳуқықына ийе болған басқа шахс (уйым) тәрепинен киргизилиўи мүмкин екенлиги келтирилген. Солай етип, жаңа редакцияда қабыл етилген Режениң бурынғысынан айырмашылығы, бириншиден әпиў етиў ҳаққындағы өтиниш хатын киргизиў ҳуқықына ийе субъектлердиң дизими бир қанша айқынлас­тырылды. Екиншиден, Өзбекстан Республикасы Президенти жанындағы әпиў етиў мәселелери бойынша комиссияның қурамына кимлер киретуғыны анық көрсетилип берилди. Үшиншиден болса, әпиў етиў ҳаққындағы өтиниш хатқа қосымша етилетуғын ҳүжжетлер саны артты. Соның ишинде, өтиниш хаты дәслепки тәризде көрип шығатуғын Президент жанындағы әпиў етиў мәселелери бойынша комиссия секторына өтиниш хат пенен бирге жиберилетуғын ҳүжжетлер дизиминде жазаны өтейтуғын мәкеме ҳәкимшилиги тәрепинен тастыйықланған судланғанның шахсын тастыйықлайтуғын ҳүжжеттиң нусқасы қосылады.

 Сондай-ақ, Президентимиздиң «Еркинен айырыў жазасын өтеп атырған, қылмысына шын кеўилден пушайман болған ҳәм дүзелиў жолына беккем байлаған бир топар шахсларды әпиў етиў ҳаққында»ғы Пәрманына муўапық биринши мәрте мүбәрек Рамазан ҳайыты мүнәсибети менен билип-билмей жынаят ислеген, ҳәзирги ўақытта қылмысына шын кеўилден пушайман болған ҳәм дүзелиў жолына беккем бел байлаған еркинен айырыў жазасын өтеп атыр­ған 226 пуқараның әпиў етилгени, адамгершилик сиясатының, биреўге мийрим-шәпәәтли, кеңпейил ҳәм кеширимли болып, жоқары ҳүрмет көрсетиў сыяқлы жақсы пазыйлетлердиң әмелий көриниси болып есапланады.

Усы пәрманның орынланыўын тәмийинлеў мақсетинде республикамыздағы жазаны өтеў орынларынан 9 пуқара әпиў етилип, бул пуқаралар шаңарағы ҳәм жақынлары қушағына қайт­ты.

Халқымыздың тыныш-татыў ҳәм абадан турмысын беккемлеў, елимизде нызам үстинлигин тәмийинлеў, инсан ҳуқықлары менен еркинликлерин, нызамлы мәплерин қорғаў бағдарында әмелге асырылып атырған бундай ийгиликли ислер адамлардың келешекке исенимин арттыратуғынына исенемиз.

 Дәўлетбай  Елмуратов,

Жазаны өтеў колония­ларында нызамлардың орынланыўы үстинен

бақлаў бойынша Қоң­ырат районы прокуроры.  

 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF