Еркин Қарақалпақстан Вести Каракалпакстана 03:36:03, 16.12.2018
Хош келипсиз! | RSS
Сайт мазмуны

Кириў усылы

БАСЛЫ ЎАЗЫЙПА —  ҚӘЎИПСИЗЛИКТИ  ТӘМИЙИНЛЕЎ

Көпшиликке мәлим, Өзбекстан Республикасы Президентиниң 2017-жыл 23-май күнги қарарына муўапық ҳәр ҳәптениң сәршемби сәнеси «Өртлер профилактикасы күни» етип белгиленген еди.

Усы қарардың орынланыўын тәми­йинлеў мақсетинде «Қоңырат сода заводы»  унитар кәрханасын өрттен қорғаў бойынша биринши дәрежели 10-санлы әскерийлестирилген өрт қәўипсизлиги бөлимшеси тәрепинен кең көлемли профилактикалық илажлар әмелге асырылмақта. Атап айтқанда, аймақтағы санаат кәрханалары, сондай-ақ, пуқаралардың турақ жайларына бирме-бир кирип, өрттиң алдын алыў бойынша үгит-нәсият жумыслары жүргизилмекте.

Жақында усы бөлимше тәрепинен жеке қурам хызметкерлериниң кәсиплик ҳәм жаўынгерлик таярлығын арттырыў, жүз бериўи мүмкин болған өртлердиң алдын алыўға ерисиўде «Қоңырат сода заводы» унитар кәрханасы хызметкерлери қатнасында әмелий-тактикалық шынығыў өткерилди. Онда тараў хызметкерлери өрттиң аўыр ақыбетлери, ол пайда болған ўақытта  қандай әмеллерди қолланыў кереклиги бойынша түсиник берип өтти. Буннан соң «Ел­абад» посёлкасы турғынлары менен сәўбетлесиў өткерип, газ ҳәм электр үскенелеринен пайдаланыўда итибарлы болыў ҳәм өрттиң алдын алыўда белсене қатнасыўға  шақырды.

— Өртлер профилактикасын өткериўден гөзленген тийкарғы мақсет — өрт қәўипсизлиги қағыйдаларын сақлаў ҳәм кеўилсиз жағдайлардың алдын алыў болып табылады, - дейди 10-санлы ӘӨҚБ баслығы С.Нийетуллаев. — Бөлимимизде ҳәр бир хызметкер өз ўазыйпаларына жуўапкершилик пенен қараўы нәтийжесинде аймағымызда өрт жүз бериў жағдайлары кескин азайды. Әлбетте, бундай көрсеткишлер менен шекленип қалмақшы емеспиз. Пуқараларымыздың өмирин, турақ жайы ҳәм мал-мүлкин, санаат кәрханаларын өрттен қорғаў бойынша жумысларымызды алдағы ўақытлары да күшейтип бара беремиз...

Әлбетте, тилсиз жаў болған өрттиң алын алыў тек тараў хызметкерлериниң емес, ал, пуқаралардың да жуўапкерли ўазыйпасына айланыўы тийис.

 

А.ОРАЗОВ,  арнаўлы хабаршымыз.

Қоңырат районы.

СҮЎРЕТТЕ: илаждан көринис.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF