Еркин Қарақалпақстан Вести Каракалпакстана 09:00:20, 18.07.2018
Хош келипсиз! | RSS
Сайт мазмуны

Кириў усылы

ЖУМЫСЛАР  РЕЖЕГЕ САЙ  ЖҮРГИЗИЛМЕКТЕ

Экономикамыздың тийкарғы тиреклериниң бири саналған электр энергиясына талап еле жоқары. Себеби, мәлимлеме технологиялары жедел раўажланып атырған бүгинги күнде халықты электр энергиясы менен тәми­йинлеўде заманагөй әсбап-үскенелер жәрдеминде сапалы хызмет көрсетиўди ўақыттың өзи талап етип атыр.

Елимизде бул бағдарда унамлы жумыслар исленип атыр. Бизиң «Қарақалпақ аймақлық электр тармақлары кәрханасы» акционерлик жәми­йетиниң Хожели районлық электр тәмийинлеўши кәрханасы тәрепинен халқымыздың электр энергиясына болған талабын жақсылаў бағдарында бир қатар илажларды әмелге асырмақта. Атап айтқанда, 2018-жыл 27 дана трансформаторларға оңлаў жумыслары белгиленген болса, бүгинги күнге 20 дана трансформатор сапалы оңланды. Ал, 7 данасын оңлаў жумыслары даўам етпекте.

Буннан тысқары, Өзбекстан Республикасы Президентиниң 2016-жыл 23-ноябрь күнги «2017-2021-жылларда пәс кернеўли тармақларды модернизациялаў ҳәм жаңалаў бағдарламасы ҳаққында»ғы қарары бойынша «Бунёдкор» мәкан пуқаралар жыйыны аймағында 4 километр 200 метр аралыққа жәми «СИП» кабель линиясы тартылып, 2 дана трансформатор жаңадан қурылды.

Мәмлекетимиздеги жаңаланыў ҳәм өзгерислер халқымыздың ертеңги күнге исенимин арт­тырмақта. Президентимиздиң 2018-жыл 29-марттағы «Абат аўыл бағдарламасы ҳаққында»ғы Пәрманы тийкарында районымыздағы «Саманкөл» аўыл пуқаралар жыйынында халықтың турмыс шараятын жақсылаўға бағдарланған қурылыс жумыслары жүргизилмекте.

Аўыл аймағындағы «Байжап» ҳәм «Қамыс шалы» мәҳәллелери турғынларына электр энергиясын үзликсиз жеткерип бериў мақсетинде ескирген электр сымлары, бағаналар жаңасына алмастырылмақта. Усы мақсетте «Байжап» мәҳәллесинде 2 километр 700 метр аралықта электр тармағы тартылды.

«Қамыс шалы» мәҳәллесинде бүгинги күнге 21 километр 600 метр аралықта заманагөй «СИП» кабель электр тармағы тартылып, жаңадан 3 дана трансформатор орнатылды. Сондай-ақ, 3 дана трансформаторға ири оңлаў жумыслары исленди. Жаңадан 6 кВ жоқары кернеўли ҳаўа линия­сы тартылды, 2 километр аралыққа бетон бағаналар қурылды. Әлбетте, бундай көлемли қурылыс жумысларын сапалы жүргизиў аңсатлық пенен қолға киргизилмейди. Бир дана автокран ҳәм трактор аўырымызды жеңиллетти. Жыллар даўамында тәжирийбе топлаған участ­ка устасы С.Джанашев, электромонтёрлар М.Нурманов, Ш.Есемуратов, Ж.Қутлымуратовлар басқаларға үлги болды.

Биз, хызметкерлеримиз арасында техника ҳәм өрт қәўипсизлиги қағыйдаларына итибарлы болыўды үгит-нәсиятлап келемиз. Сонлықтан да, тәжирийбели қәнигелер, хызметкерлеримизди техника ҳәм өрт қәўипсизлиги қағыйдалары бойынша оқыў-шынығыўларды арнаўлы полигонларда өткерип келмекте. Усындай илажлар өткерилиўи бахытсыз ҳәдийселердиң алдын алыўда унамлы тәсирин тийгизбекте. Жуўмақластырып айт­қанда, тараўдағы бундай ири көлемдеги модернизациялаў жумыслары унамлы тәрепке өзгермекте. Буның арқасында тәбий­ғый байлығымыз электр энергиясынан үнемли пайдаланып, сарпланыўдың азайыўына ерисип атырмыз. Алдымыздағы ўазыйпамыз хал­қымызға сапалы хызмет көрсетиў болып табылады.

Икрам АБДУЛЛАЕВ,

«Қарақалпақ аймақлық электр тармақлары кәрханасы» АЖниң Хожели районлық электр тәмийинлеўши кәрханасы баслығы. 

СҮЎРЕТТЕ: жумыс пайытынан көринис.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF