Еркин Қарақалпақстан Вести Каракалпакстана 05:59:00, 21.09.2018
Хош келипсиз! | RSS
Сайт мазмуны

Кириў усылы

БЫЙЫЛҒЫ ЖЫЛДЫҢ   БЕЛСЕНДИ ЖУРНАЛИСТИ

Ҳәр жылы дәстүрий түрде өткерилип киятырған биз журналистлердиң кәсиплик байрамы күни «быйыл белсендиликти ким алар екен» деп кәсиплеслер бир-биримизге сораў таслаймыз.

Байрам мүнәсибети менен өткерилген жыйналыста бул сораўымызға жуўап таўып, «Устаз жолы» газетасының бөлим баслығы Гүлжәҳән Тәжетдиноваға несип еткенлигин еситтик. Ташкент қаласында өткерилетуғын сыйлықлаў мәресимине кеткенликтен оның менен телефон арқалы байланысып, табысына қутлы болсын айт­тық.

— Билимлендириў тараўындағы жаңалықлар, жетискенликлер, жаңа талаплар, оқытыўшылардың ҳәм оқыўшылардың билим дәрежеси, тәрбия саатлары, соның менен бирге еле шешимин таппай атырған маш­қалалы мәселелерди оператив түрде талқылап, үлкен изленислер менен таярлаған мақалаларым ушын Өзбекстан Журналистлери дөретиўшилик аўқамы тәрепинен «Жылдың ең белсенди журналисти» таңлаўының жеңимпазы деп табылып, баҳалы саўға менен сыйлықландым.

Әйне кәсиплик байрам күни Президентимиздиң баспасөз хызметкерлерине жоллаған байрам қутлықлаўын еситип, жүрегимде қуўаныш, кеўлимде тол­қынла­ныў­шылық сезимлери тасқынлап кетти. Жигирма жылға шамалас ўақыттан берли баспасөз тараўында, соның ишинде «Устаз жолы» газетасында 13 жылдан аслам ўақыт журналистлик хызмет көрсеткен мийнетлерим өз баҳасын алғанынан шексиз қуўаныштаман. Бул маған үлкен жуўапкершилик жүгин артып, жаңадан-жаңа изленислерге тийкар жаратады, - дейди Гүлжәҳән.

 Рети келгенде Г.Тәжетдинованың дөретиўшилик жылларына да шегинис жасайтуғын болсақ, ол  Бердақ атындағы ҚМУ ниң журналистика қәнигелигинде билим алып, өзиниң дәслепки мийнет жолын «Қарақалпақстан» баспасында редактор болып ислеўден баслады. Соң «Қарақалпақстан» киностудиясында редактор болып ислеген жылларында 20 ға шамалас ҳүжжетли фильмлерге авторлық етти.

2006-жылдан баслап ҳәзирги күнге шекем «Устаз жолы» газетасында бөлим баслығы болып хызмет етип атыр. Оның авторлығында «Кеўил жийегинде атқан таң», «Әдираспан моншақлары» китаплары жарық көрди. Ол көркем әдебияттың, поэзияның да бир ўәкили сыпатында қәлем тербетип, өзиниң жаңа қосықлары менен телеэкран арқалы да жийи-жийи көринип келмекте.

Талантлы журналист, шайыр тәбиятлы кәсиплесимиз өзиниң сыпайылығы ҳәм ағла адамгершилик қәсийетлери менен өз орнына, өз стилине ийе.

Кәсиплесимизге табысыңыз табысларға уласа берсин деп, оннан жаңадан-жаңа дөретпелер күтип қаламыз. 

Г.ЖҮГИНИСОВА.

CҮЎРЕТТЕ:  Г.Тәжетдинова.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF