Еркин Қарақалпақстан Вести Каракалпакстана 18:17:26, 18.07.2018
Хош келипсиз! | RSS
Сайт мазмуны

Кириў усылы

ЛИНЕКЕР ЖӘНЕ ҲАҚ

1990-жылы Италияда өткерилген жәҳән чемпионатының ярым финалында Германиядан жеңилген Англия сайланды командасының ҳүжимшиси Гарри Линекер соңғылығында афоризмге айланып кеткен мынадай гәпти айтқан еди: «Футболда 22 адам ойнайды, бирақ, ақырында немислер жеңип шығады».

Линекердиң бул гәпи Мексикаға қарсы кешкен дәслепки турда тастыйықланбаған болса да, шемби күни шведлер менен болған ойында өз көринисин тапты. Биринши таймда өз дәрўазасынан топ өткерип алған немислер ойын­ның екинши ярымында есапты теңлестире алған болса да, ушырасыўдың соңына шекем олардың тәғдири қыл үстинде турды. Теңбе-теңлик те оларды қанаатландырмайтуғын еди. Тек ойынға қосып берилген ўақыттың соңғы секундларында ғана Тони Кросс жәрийма тобын әжайып тәризде жоллап, Германияны қутқарып қалды.

Улыўма алғанда, чем­пионаттың екинши тур ойын­лары оғада қызықлы өтти. Жоқарыда тилге алынған ойыннан тысқары, Сербия — Швейцария ушырасыўы да гүреслерге бай болды. Ойынның дебютинде-ақ есапты ашқан серблер жеңисти сақлаў былай турсын, теңбе-теңликти де услап қала алмады. Бул беллесиўдиң де тәғдири соңғы минутларда шешилди. Швейцариялы Джердан Шакири жеңис тобын жоллап, өз командасының жеңисин тәмийинледи.

Казанда болып өткен Польша — Колумбия ушырасыўы менен екинши тур ойынларына жуўмақ жасалды. Бул ойында дәслепки турдағы сәтсизликтен тийисли жуўмақ шығар­ған колум­биялылар Войцех Щенсны дәрўазасына жуўапсыз үш топ жоллап, гүрести даўам еттириў имканиятын қолға киргизген болса, ҳәр еки турда да жеңилиске ушыраған поляклар үйине қайтатуғын болды. «H» топарынан орын алған Япония — Сенегал ушырасыўы болса 2:2 есабында жуўмақланды.

Екинши турдағы ең ири есап Англия — Панама ушырасыўында жүз берди. Қарсыласларын 6:1 есабында тәслим еткен инглислер өз упайларының санын алтаўға жеткерди. Олардың ҳүжимшиси Гарри Кейн болса хет-трикке ерисип, улыўма голларының санын бесеўге жеткерди ҳәм топ урарлар бәсекисинде биринши орынға шықты.

Кеше Россия — Уругвай, Сауд Аравиясы — Египет, Иран — Португалия ҳәм Испания — Марокко жуплықларының беллесиўлери менен соңғы, үшинши тур ойынларына старт берилди.

С.ЖАНИЕВ.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF