Еркин Қарақалпақстан Вести Каракалпакстана 21:19:08, 20.11.2018
Хош келипсиз! | RSS
Сайт мазмуны

Кириў усылы

ИННОВАЦИЯЛЫҚ ЖОЙБАРЛАР АНЫҚЛАНДЫ

Мәмлекетлик емес, коммерциялық емес шөлкемлерде инновациялық идеяларды қоллап-қуўатлаў бағдары бойынша мәмлекетлик грант ушын төрт таңлаў жәрияланған еди.

Соның биринши, екинши таңлаўлары жуўмағы бойынша жеңимпазлар анықланып оның сыйлықлаў мәресими Нөкис қаласындағы Жаслар орайы мәжилислер залында болып өтти.  Онда «Ҳәрекетлер стратегиясының Жедел исбилерменлик, инновациялық идеялар ҳәм технологияларды қоллап-қуўатлаў жылы Мәмлекетлик бағдарламасының әмелге асырылыўын тәмийинлеўде мәмлекетлик емес коммерциялық емес шөлкемлердиң инновациялық идеяларын қоллап-қуўатлаў» темасындағы биринши таңлаўда Өзбекстан майыплар жәмийетиниң Қарақалпақстан бөлиминиң «Ҳаял-қызлар, жаслар, майыплар ҳәм кекселердиң машқалаларын шешиўге арналған биргеликтеги бағдарлама ҳәм режелерди әмелге асырыў», Өзбекстан шыпакерлер ассоциациясы Қарақалпақстан бөлиминиң «Қарақалпақстан Республикасында инновациялық технологияларды қолланыў жолы менен туўысқанлар арасындағы ҳәм ерте турмыс қурыў нәтийжесинде туўылған балалардың туўма аномалиясының медициналық-генетикалық профилактикасы», Өзбекстан пуқаралық басламаларды қоллап-қуўатлаў орайы Қарақалпақстан бөлиминиң «Балалығынан майыплығы бар шахслардың шаңарақ ағзалары перзентлерин турақлы реабилитация ҳәм жәмийетке бейимлестириў илажларына үйретиў» ҳәм «Шымбай шайхана» мәкан пуқаралар жыйыны «Ҳаял-қызлардың исбилерменлик хызметин раўажландырыў бойынша өзин-өзи басқарыў уйымларының қатнасыўын ҳәм әҳмийетин үйрениў» атамасындағы жойбарлары жеңимпаз деп табылды.

Сондай-ақ, «Сырт ел ҳәм жергиликли ғалаба хабар қуралларында жоқары ҳуқықый ой-пикирди, инсан ҳуқықлары мәдениятын жәмийетшилик қадағалаўының инновациялық форма ҳәм механизмлерин кең үгит-нәсиятлаў» темасындағы екинши таңлаўында республикамыздан «Шыпакер» газетасының «Уллы мақсетлерге умтылыўшылар», «Қанлыкөл хабарлары» газетасының «Саналы ҳәм ҳуқықый саўатлы адам — жәмийет тиреги», «Тараққиёт кўзгуси» газетасының «Нызам жойбарлары жәмийетшилик итибарында», «Саза» шаңарақлық журналының «Күш билимде» атамасындағы жойбарлары жеңимпаз деп табылды.

Жойбарларды усы жылдың 10-12 айы даўамында әмелге асырыўы режелестирилген ҳәм бул ушын 27 миллион сумнан 30 миллион сумға дейин қаржы ажыратылды.

Жеңимпазларға сертификатлар тапсырыў мәресимине Өзбекстан Республикасы Олий Мажлиси комитет баслығы, сенатор Б.Мәтмуратов, Өзбекстан Республикасы Олий Мажлиси жанындағы Мәмлекетлик емес коммерциялық емес шөлкемлерди ҳәм пуқаралық жәмийетиниң басқада институтларын қоллап-қуўатлаў жәмийет фонды баслығы О.Хусанов ҳәм Қарақалпақстан Республикасы Жоқарғы Кеңеси комитет баслығы С.Турмановлар қатнасты ҳәм салтанатлы жағдайда жеңимпазларға сертификатлар тапсырди.

Қ.ПЕРДЕБАЕВА,

ҚМУдың Қарақалпақ филологиясы факультети

журналистика бөлиминиң 3-курс студенти.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF