Еркин Қарақалпақстан Вести Каракалпакстана 06:11:48, 21.09.2018
Хош келипсиз! | RSS
Сайт мазмуны

Кириў усылы

ТЕАТР — МИЛЛИЙ ҚӘДИРИЯТЛАР МӘКАНЫ

Бүгин республикамызда қайсы бир тараўды алып қарамайық, онда раўажланыўларды, алға илгерилеўлерди, қолға киргизилген табысларды, жаслардың белсендилигин ҳәм ғайратын көрип қуўанамыз.

Усындай тараўлар ишинде көркем-өнеримиз бенен мәдениятымыз жолында сәтли қәдемлерин басып, жоқары шоққыларға ерискен айрықша талант ийелериниң халқымыздың абырай-мәртебесин, елимиздиң даңқын көклерге көтериўдеги орны гиреўли болмақта.

Қарақалпақ көркем-өнер­иниң барлық түр ҳәм жанрларын өзинде қамтыған Бердақ атындағы Қарақалпақ мәмлекетлик академия­лық музыкалы театрының миллий мәдениятымыз ҳәм көркем-өнеримиздиң раўажланыўында тут­қан орны айрықша гиреўли.

Ҳәммеңиздиң хабарыңыз бар, усы жылдың 3-февраль сәнесинде Өзбекстан Республикасы Президентиниң «Өзбекстан Республикасының туризм потенциалын раўажландырыў ушын қолайлы шараятлар жаратыў бойынша қосымша шөлкемлестириў илажлары ҳаққында»ғы Пәрманы ҳәм 7-февраль күни «Ишки  туризмди жедел раўажландырыўды тәмийинлеў  илажлары ҳаққында»ғы Президент қарары қабыл етилген еди. Мине, солардан келип шыға отырып партия хызметкерлери, депутатлар, партия белсендилери ҳәм олардың шаңарақ ағзалары менен биргеликте мәдений жақтан дем алыўы ушын Савицкий атындағы Қарақалпақ мәмлекетлик музейи ҳәм Бердақ атындағы Қарақалпақ мәмлекетлик академия­лық музыкалы театрына сая­хат шөлкемлестирилди. Мәдений саяхатты Өзбекстан «Миллий тикланиш» демократиялық партиясы Қарақалпақстан Республикасы Кеңеси ҳәм «Мәҳәлле» қайырқомлық жәмийетлик фонды Қарақалпақстан Республикасы бөлими биргеликте  шөлкемлестирди. Саяхатты шөлкемлестириўден мақсет — мине усы Пәрман ҳәм қарардың орынланыўын тәмийинлеў, сондай-ақ, ишки туризмди жедел раўажландырыў, пуқараларды мәмлекетимиздиң мәдений-тарийхый мийрасы, миллий үрп-әдетлер ҳәм дәстүрлери менен таныс­тырыўдан ибарат.

Өзбекстан «Миллий тикланиш» демократиялық партиясы сайлаўалды Платформасында партия мәмлекетимиздиң халықаралық унамлы имиджин қәлиплестириўде туризмди нәтийжели қурал деп биледи ҳәм оны раўажландырыўға айрықша итибар қаратады.

Туризм — Өзбекстан хал­қының бийбаҳа мәнаўий байлығы ҳәм тарийхый мийрасты үгит-нәсиятлаў, бул байлықтың дүнья жәмийетшилиги тәрепинен улыўма инсаният тарийхый мийрасының ажыралмас бөлеги сыпатында тән алыныўы жолында нәтийжели хызмет етеди, сондай-ақ, пуқараларды миллий мақтаныш ҳәм де Ўатансүйиўшилик руўхында тәрбиялаўда туризмниң орны ҳәм әҳмийети ылайықлы екенлигин үгит-нәсиятлайды деп көрсетилген.

Илаж соңында қатнасыўшыларға Қарақалпақ хал­қының миллий мийрасы болған «Ғәрип ашық» дәстаны тийкарында таярланған әжайып спектакль қойып берилди.

Тәжибай Романов.

ӨзМТДП ҚР Кеңеси баслығы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF