Еркин Қарақалпақстан Вести Каракалпакстана 06:56:38, 21.09.2018
Хош келипсиз! | RSS
Сайт мазмуны

Кириў усылы

АЙРЫҚША  ИТИБАР  ҲӘМ ЖУЎАПКЕРШИЛИК

Бүгин турмысымызда қайсы бир тараўды алып қарамайық, ерлер менен бир қатарда мийнет етип атыр­ған белсенди ҳаял-қызларымызды ушыратамыз. Олар нәзик мо­йынларына шаңарақ аталмыш муқаддес дәргайдың машқалаларына қоса, турмысымыздың жақсыланыўы жолында ҳәр бир тараўда белсендилик пенен хызмет етип кия­тыр.

Әлбетте, биз ең дәслеп, ҳаял-қызларымызды өмиримиздиң шамшырағы болған перзентлеримизди камалға келтириўши ғамқор ана, шаңарақтың уйтқысы сыпатында көз алдымызда сәўлеленеди. Мәмлекетимизде оларды ҳәр тәреплеме қоллап-қуўатлаў бағдарында кең көлемли жумыслар әмелге асырылмақта. 

Ҳаял-қызларды ҳәр тәреплеме қоллап-қуўатлаў ҳәм шаңарақ институтын беккемлеў мәселелерине бағышлан­ған мәжилис баянатында: «Ҳаял-қызларға итибар барлық ўақытта ис-ҳәрекетлеримиздиң орайында болыўы, бәршемиздиң ўазыйпамызға айланыўы керек. Шаңараққа итибар — негизинде бул өзлигимизге итибар дегени» деп атап өткен еди, Президентимиз Ш.Мирзиёев.

Ҳақыйқатында да ҳаял-қызларға көрсетилип атырған бүгингидей итибар ҳәм ғам­қорлықлар негизи, бизлерге күш-жигер бағышлаў менен бирге үлкен жуўапкершиликли ўазыйпаларды жүклемекте. 

Әсиресе, 2018-жыл 2-февральдағы «Ҳаял-қызларды қоллап-қуўатлаў ҳәм шаңарақ институтын беккемлеў тараўындағы жумысты түп-тийкарынан жетилистириў илажлары ҳаққында»ғы Пәрманының қабыл етилиўи, елимизде ҳаял-қызлардың жәмийетлик-сиясий белсендилигин арттырыўға, ҳуқықлары менен нызамлы мәплерин тәмийинлеўде аналықты ҳәм балалықты ҳәр тәреплеме қоллап-қуўатлаў ҳәм шаңарақты беккемлеўге, сондай-ақ, оларды түрли тараўларда қәбилетлерин жүзеге шығарыўында имканиятлар жаратпақта десек қәтелеспеймиз.

Соның менен бир қатарда Республикалық «Мәҳәлле» қайырқомлық жәмийетлик қоры ҳәм «Нураный» қоры белсендилериниң халқымызға қарата жоллаған мүрәжаты, келешек әўладлар тәрбияшысы болған ҳаял-қызларымызға мәмлекетимиздиң киши буўыны болған шаңарақтағы жуўапкершилигин еле де арттырыўда әҳмийетли ўазыйпаларды қоймақта. Туўры, халқымыз перзентиниң ығбал-бахты ушын оның барлық кемшиликлерин толтырыўға, кеўлин өкситпеўге ҳәрекет ететуғын балажанлы халық. Соның ушын да өмир бойы жыйған тергенин тойға жумсайын деп нийет етеди. Деген менен бир күнлик той ушын барыңды сарплаў, әтираптағыларға еликлеў де жақсылық алып келмейтуғынлығын турмыстан көрип, еситип  жүрмиз. Қуранда: «Жең, ишиң, бирақ ысырапгершиликке жол қоймаң. Аллатаала ысырап ететуғынларды сүймейди» деп буйырыл­ған. Солай екен, бул мүрәжаттың мақсети де той-мерекелерди ҳәм мәресимлерди ықшам ғана өткериўде бәршемизди биргеликте машқаланың алдын алыўда бирлесип ҳәрекет етиўге шақырады. 

 Нөкис қалалық ҳаял-қызлар комитети тәрепинен жоқарыда келтирилген пәрман ҳәм мүрәжат бойынша барлық оқыў орынларында барлық мәкан пуқаралар жыйынлары белсендилери,  қалалық кеңес депутатлары менен биргеликте илажлар, үгит-нәсият жумыслары алып барылмақта.

Әлбетте, бундай өткерилип атырған илажлар жәмийеттеги унамсыз иллетлерди сапластырыўға, ҳаял-қызлардың шаңарақтағы жуўапкершилигин асырыўға хызмет етеди.

 Ж.ШАРАФАТДИНОВА,

Нөкис қаласы ҳаял-қызлар комитетиниң бас қәнигеси. 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF