Еркин Қарақалпақстан Вести Каракалпакстана 21:19:11, 20.11.2018
Хош келипсиз! | RSS
Сайт мазмуны

Кириў усылы

ҚУТЛЫНЫҢ ҚУТЛЫ ҚӘДЕМЛЕРИ

Мәмлекетлик шегарамыз арқалы кесип өткен жолаўшылар дәслепки қәдем атқан жери, аўыл-қалаларымыздың турмыс шараятына қарай тутас елге баҳа берери сөзсиз. Үстиртке тумлы-тустан адамлар жыйналған ўақытлары шар­ўа, темир жолшылар менен геологлардың елаты, арқа-батыс шегарамыздағы «Қарақалпақстан» посёлкасы Қазақстан Республикасы менен тутасып атыр.

Ҳәр жыллардағы өзин-өзин басқарыў уйымлары арасында өткерилген таңлаўларда сыйлы орынларды ийелеп киятырған, заманагөй үлгидеги бул посёлка «Абат аўыл» бағдарламасына киргизилиўи социал-экономикалық жақтан және де гүллеп раўажланыўына кең жол ашылды.

Өткен әсирдиң сексенинши жыллары өмирлик жолдасы, темир жол қурыўшысы Абдулла Есенов пенен көкиреклери жеделге тола, қолға қол усласып келгенде бул үлкеде өмир бойы жасап қаламыз деп ойламаған еди. Таза қонысының ыссысына күйип, суўығына тоңды, иргели шаңарағында ул-қыз сүйди. Таңлаған кәсиби билимлендириў тараўында жалықпастан ислеп, 2011-жылы мектеп директорлығынан посёлка пуқаралар жыйыны баслығы лаўазымына усынылады. Устаз атанғаннан соң аўылласларын жақсы көрип жасап, ел бирлигине уйытқы болғысы келди. Тынымсыз мийнетлери өз ўақтында ылайықлы баҳаланып «Жаслар устазы» атағы, «Шуҳрат» медалы менен сыйлықлан­ған. Быйылғы жылы алыс жолын жақынлатып, Президентимиз Шавкат Мирзиёев пенен видеоселекторде сөйлесиўден кейин «Нексия-3» машинасы саўғаға берилген еди.

Столындағы дәсте-дәсте қағазлар, газета-журналлардан бас алмай отырған посёлка пуқаралар жыйыны баслығы Қутлы Қошымбетовадан жумыс жөниңиз қалай басланады деген  сораўы­мызға терең  ойға шүмди.

— Посёлкамыз шегара бойына, тоғыз жолдың дәрбентине жайласқанлықтан сырттың барыўшы-келиўшилери көплиги себепли «Тынышлық па!» деп тәртип-интизамды жуўапкершиликли адамлардан сорап билгенше асыққанымды билсеңиз еди.

Посёлкамыздың «Абат аўыл» бағдарламаға киргенин турғынларымыз үлкен қуўаныш пенен күтип алыс­ты. Бурынғысындай ким қәлегенинше жасап-турмай, биринши гезекте көклемзарластырыў, абаданластырыў сыяқлы жумыслар баслы бағдар етип алынды. Турақ жайларға ири ҳәм жеңил оңлаў жумыслары жүргизилип, қора-қопсыларын тәртиплестириў, шығындылардан тазалаў сыяқлы мыңсан-еки жумыслар көлемин орынлаў тек айтар аўызға жеңил. Ҳәр бир шаңарақ ийеси менен тил табысып сөйлесиўлерде жағдайға бола барымына бар­ғанымыз бенен ретине қарай «қатты қол»лық етиўге туўра келмекте.

Дәрья-каналы жоқ, жаплар қазып ҳәлекке қалмайтуғын, көктен қар, жаўын-шашын тилеп жасаған үстиртшилер тамшы суўдың қәдир-қымбатына жетип, тийимли пайдаланыўдың жолларын қарас­тырса керек? 

— Әлбетте, тамшы суў таңлайымызға татыйды. Үстирттиң жери қунарлы, суўы болса не ексең де көгереди. Аўыз суўымыз жеткиликли, үй алды қыйтақ жерлерине ерте писер овощ-палыз егинлеринен ҳәм мийўе бағларынан жемис жеп отырған шаңарақлар  саны 780 ге жетти. Солардың бири, нураный анамыз Қызларгүл Сапарбаева «ой»дағы аўыллық жерде туўылып өскенликтен бар билгенлерин жас шаңарақ ийелерине үйретип  отырады. Жаслығында трактор айдап, пахта териў машинасын меңгерген. Он бармағы ойылған шебер тигиўши. Атамыз Бегмурза бағман, ағаш пенен темирден түйме түйген уста еди. Қыйтақ жеринде 258 түп ерик, алма, алмурт бар. Жүзимниң ең өнимдарлы сортларын излегенлер оның үйине излеп барады. Мал, қой-ешки сақлаған соң бос жерлерине жоңышқа егип, ең кеми 2-3 орғаны жақсы көрсеткиш.

— Өткен жылы исбилерменлик пенен шуғылланғысы келген бес пуқарамызға банклерден аз өсимдеги кредитлер әпердик. Аймағымызда 628300 гектарлық бес бөлимге бөлинген «Сайғақлар» қорықханасы 2016-жылы ашылды. Бүгинги күнде қорықханада ислеўшилер саны 13 ке жетип, аз сандағы сайғақларды өршитип көбейтиў менен қатар қорықлаў хызметин  атқарыўға киристи. Мектеплер менен балалар бақшаларында болса экоклублар дүзип, экобағлар жаратып, келешекте экотуризмди раўажландырыўға негиз салынбақта. Ҳәзирги күнде посёлка турғынлары ушын китапхана ашыўдың жолларын қарастырып, китаплар жыйнаўды баслап жибердик,-деген Қутлының қутлы қәдемлеринен кеўлимиз толып, дөретиўшилик сапарымыздан кеўилли қайттық. 

 Ө.ӨТЕЎЛИЕВ, өз хабаршымыз.

Қоңырат районы, «Қарақалпақстан» посёлкасы.

 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF