Еркин Қарақалпақстан Вести Каракалпакстана 08:52:43, 18.07.2018
Хош келипсиз! | RSS
Сайт мазмуны

Кириў усылы

ҒӘЛЛЕ ОРЫМ — ЖЫЙЫНЫ  БАСЛАНДЫ

Республикамызда бириншилерден болып Нөкис районында быйылғы жылдың ғәлле орым-жыйын жумыслары шөлкемлескенлик пенен басланды.

Усы мүнәсибет пенен райондағы «Қырантаў» аўыл пуқаралар жыйыны аймағындағы Есенгелди Хожамуратов басқарған «Хожамурат Ақманғыт» фермер хожалығында көргизбели семинар болып өтти.

Онда Қарақалпақстан Республикасы Жоқарғы Кеңесиниң Баслығы М.Ерниязов шығып сөйлеп, орым-жыйын жумысларында алда турған жуўапкерли ўазыйпаларға тоқтап өтти ҳәм ғәллекешлеримизге бәлент қырман тиледи.

Өткен жылы районда 401 фермер хожалығы тәрепинен 5800 гектар жерге ғәлле егилген еди. Ҳаўа райының қолайсыз келиўине қарамастан, агротехникалық қәделерге сай тәрбия берилиўиниң нәтийжесинде бүгинги күни дийдиленген өним алыўға ерисилди.

— Дийқанларымыздың пидәкерлик мийнетлери нәтийжесинде жетистирилген ғәллени қысқа мүддетте сепситпей жыйнап алыўдың барлық илажлары көрилди,-дейди район ҳәкиминиң орынбасары Ислам Бекжанов. — Бул бойынша 9 отряд шөлкемлестирилип, оларға 15 комбайн бириктирилди. Орым-жыйын жумысларына қатнасып атырғанларға барлық шараятлар жаратылып берилмекте.

Ғәлле орым-жыйыны жумысларының басланыўына бағышланған усындай көргизбели семинар республикамыздың басқа районларында да болып өтти.

Д.АБИБУЛЛАЕВ,

Қарақалпақстан хабар агентлигиниң хабаршысы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF