Еркин Қарақалпақстан Вести Каракалпакстана 08:13:31, 22.10.2018
Хош келипсиз! | RSS
Сайт мазмуны

Кириў усылы

ХАЛЫҚТЫҢ АБАДАНЛЫҒЫ УШЫН

2017-жыл 8-августта Өзбекстан Республикасы Президенти тәрепинен қабыл етилген «Аймақлардың жедел социал-экономикалық раўажланыўын тәмийинлеўге байланыслы тийкарғы илажлар ҳаққында»ғы Қарарының орынланыўын тәмийинлеўде  Шымбай районында да 4 сектор шөлкемлестирилди.

Ра­йонлық мәмлекетлик салық инс­пекциясы басшылығындағы 2-секторға 6 мәкан пуқаралар жыйынлары бекитилген. Сектор ағзалары тәрепинен ҳәр күни халық пенен сәўбетлесиўлер өткерилип, анықланған маш­қалаларды шешиў илажлары көрилмекте. Үйрениўлер нәтийжесинде жәми 315 хожалықларда машқалалар анықланып, соннан, 211и сектор тәрепинен шешилиўине ерисилди. Ал, қалған 104 машқала бойынша тийисли уйымларға мүрәжат етилип, қадағалаўға алынды. Бул мәселелер тийкарынан бәнт­ликти тәмийинлеў, жәрдем пул алыў, турақ-жай, жолларды оңлаў, газ, ишимлик суў, жеңиллетилген кредит алыў мәселелери болып табылады.

Өткен жылы аймақта кем тәмийинленген шаңарақлар саны 179 ды қураған болса, көрсетилген жәрдемлер нәтийжесинде 28 и жәрдемге мүтәж шаңарақлар қатарынан шығарылды. Және 3 пуқара майыплық арбашасы, 9 пуқара ҳаса таяқ, 2 пуқара болса қолтық таяқлар менен тәмийинленди. Ал, қалған майып ҳәм жалғыз баслы кекселерден хабар алынып, оларға медициналық жәрдемлер көрсетилмекте. Аймақтағы кем тәмийинленген шаңарақлардан «Бердақ» мәкан пуқаралар жы­йынынан 4 шаңарақ, «Абат» МПЖ 4 шаңарақ, «Оржап» МПЖ 3 шаңарақ, «Жипек жолы» МПЖ 4 шаңарақ, «Шахтемир» МПЖ 4 шаңарақ, «Дослық» МПЖ 4 шаңарақ турмыслық техникалар менен тәмийинленди. Кәсиплик аўқамы тәрепинен «Бердақ» көшеси турғыны Алмагүл Ҳәкимниязова, «Х.Жумамуратов» көшеси тур­ғыны Клара Аманжолова, «Дослық» көшеси турғыны Дүйсенбай Қадировлардың шаңарақларына 10 миллион сумнан ақша ажыратылып, турақ-жайларын оңлаў жумыслары  әмелге асырылмақта. Сондай-ақ, сектор ағзалары тәрепинен тутыныў базарындағы баҳалардың турақлылығын тәмийинлеў мақсетинде аймақтағы «Шымбай дийқан базары»нда аўыл хожалығы өнимлери, сондай-ақ, халықтың биринши дәрежели тутыныў товарлары ярмаркалары шөлкемлестирилди.

Сектор тәрепинен исбилерменликти раўажландырыў бо­йынша да бир қанша илажлар әмелге асырылмақта. Атап айтқанда, аймағымызда 322 киши бизнес субъектлери ҳәм 13 санаат кәрханалары бар болып, усы жылдың биринши шерегинде булардың қатары 32 ге көбейди. Өз жумысларын тоқтатқан 6 исбилерменлик субъектлериниң жумыслары қайта тикленди.

Халықтың жасаў шараятын жақсылаўда аймағымыздағы көп қабатлы турақ жайларды оңлаў жумысларына Миллий банктың Шымбай районы филиалы тәрепинен жәми 85,0 миллион сум кредит ажыратылып, ҳәзирги ўақытта «К.Абдиреймов» ҳәм «Қырыққыз» көшелериндеги көп қабатлы турақ  жайлардың подъездин ҳәм сыртқы фасадларын оңлаў жумыслары алып барылмақта. Буннан тысқары аймақтағы «Абат» мәкан пуқаралар жыйыны турғынларын суў ҳәм тәбийғый газ бенен тәмийинлеўде жаңадан суў ҳәм газ трубалары тартылды. Сондай-ақ, аймағымызда жынаят ҳәм ҳуқықбузарлықлардың алдын алыў мақсетинде район ҳәкимияты, ҳуқық қорғаў уйымлары, өзин-өзи бас­қарыў уйымлары ҳәм жәмийетлик шөлкем ўәкиллери қурамында исши топар дүзилип, ҳәр бир мәкан пуқаралар жыйыны кесиминде жынаят ислеўге ме­йил болған пуқаралар, жумыссызлар, жалғыз баслы пуқаралар, тынышсыз шаңарақлар, алдын судланғанлар ҳәм де узақ мүддетке шет еллерге кеткен пуқаралар дизимге алынды. Ҳәзирги ўақытта олардың үйлеринен хабар алынбақта. Үйрениўлер даўамында олардың көпшилиги ҳәзирги ўақытта жумыс пенен тәмийинленгенлиги, сондай-ақ, шаңарағында тыныш-татыў жасап атырғанлығы анықланды.

 Жуўмақластырып айтқанда, халықтың тыныш ҳәм абадан турмысын тәмийинлеўде, хал­қымыздың ертеңги күнге бол­ған исенимин арттырыўда  бар күш жигеримизди аянбай мийнет ете беремиз.

 А.РАХМЕТУЛЛАЕВ,

Шымбай районлық Мәмлекетлик салық инспекциясы баслығы.    

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF