Еркин Қарақалпақстан Вести Каракалпакстана 07:19:59, 22.10.2018
Хош келипсиз! | RSS
Сайт мазмуны

Кириў усылы

ЖУЎАПКЕРШИЛИК ЖӘНЕ ДЕ АРТАДЫ

Ғәрезсизлик жылларында Өзбекстан Республикасында экономикалық реформаларды әмелге асырыўдың дерлик барлық басқышларында мәмлекетимиз тәрепинен аўыл хожалығын реформалаўға айрықша әҳмийет берилип келинбекте.

Республика санаатының көп ғана тармақларын, атап айт­қанда, пахта тазалаў, тоқымашылық, жеңил санаатты, азық-аўқат, химия санаатын, аўыл хожалығы, машина қурылысы ҳәм басқаларды раўажландырыў перспективалары, олардың финанс-экономикалық аўҳалы тиккелей аўыл хожалығына байланыслы. Әйне аграр сектор Өзбекстанда экономикалық турақлылықтың қүдиретли факторы болды десек, асыра айтқан болмаймыз. Ең тийкарғысы, мәмлекетте азық-аўқат қәўипсизлигин тәмийинлеў ушын беккем тийкар жаратылды.

Өзбекстан Республикасы Президентиниң усы жыл 7-майдағы «Өзбекстан Республикасы Бас прокуратурасы жанындағы агросанаат комплекси ҳәм азық-аўқат қәўипсизлигиниң тәмийинлениўи үстинен қадағалаў инспекциясының жумысын шөлкемлестириў илажлары ҳаққында»ғы Қарары  шын мәнисинде елимизде азық-аўқат қәўипсизлигин тәмийинлеў, қадағалаў ҳәм бул бағдардағы кең көлемли реформаларды әмелге асырыўға қаратылған әҳмийетли ҳүжжет болып хызмет етеди.

Қарар тийкарында 2018-жылдың 1-августынан баслап Өзбекстан Республикасы Министрлер Кабинети жанындағы Мәмлекетлик дән, Машина ҳәм әсбап-үскенелердиң техникалық жағдайын қадағалаў бас мәмлекетлик, Шар­ўашылықта нәсилшилик жумыслары бас мәмлекетлик, «Ўзсувназорат» республикалық суў инспекциялары, «Ўздавуруғназоратмарказ» аўыл хожалығы егинлери туқымын сертификациялаў ҳәм сапасын қадағалаў мәмлекетлик орайы ҳәм де «Ўзстандарт» агентлигиниң Өзбекстан пахта өнимлерин сертификатлаў, «Сапа орайы» мәмлекетлик кәрханасы сапластырылып, олардың орнында Өзбекстан Республикасы Бас прокуратурасы жанындағы Агросанаат комплекси ҳәм азық-аўқат қәўипсизлигиниң тәмийинлениўи үстинен қадағалаў инспекциялары шөлкемлестирилди. Бул ҳуқықый ҳүжжет тийкарында сапластырылған алты ири шөлкем ҳәм мәкемелердиң ўазыйпаларының бир шөлкемниң жуўапкершилигине жүклениўи тараўда жумыс өнимдарлығының артыўына ҳәм азық-аўқат қәўипсизлигин тәмийинлеўге хызмет етеди.

Бас прокуратура жанында шөлкемлестирилип атырған бул инспекцияның тийкарғы ўазыйпалары ­ аўыл ҳәм суў хожалығы, азық-аўқат қәўипсизлиги тараўындағы нызам ҳүжжетлери ҳәм норматив ҳүжжетлердиң талапларына әмел етиў жағдайы, пахта ҳәм дән егинлериниң туқымларына мәмлекет тәрепинен буйыртпа бериў, таярлаў, аўыл-хожалығы ҳәм азық-аўқат өнимлериниң запасларын мәмлекетлик буйыртпаның режели әмелге асырылыўына муўапық көлемлерде қәлиплестириў бо­йынша талапларды орынлаўдан ибарат.

Бас прокуратура ҳәм оның орынлардағы бөлимлери қарарда белгиленген талапларды орынлаў мақсетинде бир қатар илажларды белгилеп алды. Солар қатарында Қанлыкөл районы прокуратурасы жанында да агросанаат комплекси ҳәм азық-аўқат қәўипсизлигиниң тәмийинлениўи үстинен қадағалаў инспекциясы шөлкемлестирилип, инспекция хызметкерлери жоқарыда атап өтилген қарарда көрсетилген ўазыйпаларды талап дәрежесинде орынлаў ушын бар билими менен күш-жигерин жумсамақта.

 Б.УТЕМУРАТОВ,

Қанлыкөл районы прокуратурасы жанындағы агросанаат комплекси

ҳәм азық-аўқат қәўипсизлигиниң тәмийинлениўи үстинен қадағалаў инспекциясы баслығы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF