Еркин Қарақалпақстан Вести Каракалпакстана 07:31:20, 22.08.2018
Хош келипсиз! | RSS
Сайт мазмуны

Кириў усылы

МАШҚАЛАЛАР ҮЙРЕНИЛИП,  ШЕШИМИН ТАППАҚТА

2017-жыл 8-августта Өзбекстан Республикасы Президенти  тәрепинен қабыл етилген «Аймақлардың жедел социал-экономикалық раўажланыўын тәми­йинлеўге байланыслы тийкарғы илажлар ҳаққында»ғы қарары тийкарында Қараөзек  районында да 4 сектор шөлкемлестирилди.

Соннан 1-секторға «Есим» мәкан пуқаралар жыйыны ҳәм «Бердақ», «Мәденият» аўыл пуқаралар жыйынлары бириктирилген. Сектор аймағында 1 кәсип-өнер колледжи, 1 мектепке шекемги билимлендириў мәкемеси, 8 мектеп ҳәм 1 аўыллық шаңарақлық поликлиникасы бар. Өткен дәўир ишинде 1-сектор ағзалары менен биргеликте аймақта жасап атырған 2509 шаңарақ толығы менен үйренилип шығылып, соннан 94 шаңарақтың машқалалары анықланды. Соннан жәми 86 машқаланың шешими табылып, ал, қалған 8 машқала «Жол картасына» киргизилип, басқышпа-басқыш орынланып келинбекте.

Сондай-ақ, сектор аймағында 190 кем тәмийинленген шаңарақлар бар болып, оларды социаллық қоллап-қуўатлаў мақсетинде 34 шаңараққа хожалық бу­йымлары, 112 шаңараққа 1216 түп мийўе нәллери бийпул тар­қатылды ҳәм де 7 шаңараққа тигиў машиналары ҳәм қара мал алыўы ушын кредит қаржыларын ажыратыў бойынша әмелий жәрдемлер көрсетилди. Ал, 198 жумыссыз болған пуқараларымыздан 32си турақлы жумыс орынлары менен тәмийинленип, 2 пуқараға майыплар арбашасы алып берилди.

Буннан тысқары, сектор аймағында жерлердиң мелиоратив жағдайын жақсылаў мақсетинде «Мәденият» аўыл пуқаралар жыйыны аймағындағы «КС-4» хожалықлараралық коллекторының 12,0 км узынлықтағы аралығына реконструкциялаў, 105,2 км аралыққа оңлаў-тиклеў жумыслары ҳәм де усы жыйындағы 36,1 км аралыққа оңлаў жумыслары алып барылды. Сондай-ақ, бағдарлама тийкарында сектор аймағындағы «Марқаөзек» каналы ҳәм «Маңғыт жарған» хожалықлараралық коллекторына оңлаў-тиклеў жумысларын әмелге асырыў жобаластырылған.  Соның менен бирге, сектор аймағындағы ишки хожалықлар­аралық жолларды оңлаў жумысларында «Есим» мәкан пуқаралар жыйыны аймағындағы көшелердиң 900 метр узынлықтағы бөлимине, «Бердақ» аўыл пуқаралар жыйыны аймағындағы «Ақкөл», «Тажек» ҳәм «Майшы» елатлы пунктлерине баратуғын 3,3 км узынлықтағы жолларға қурылыс-оңлаў жумыслары исленди.

2018-жылдың биринши шереги даўамында сектор аймағындағы «Нукус экстракт», «Қара­өзек агроимпекс», «Агрофирма Радикс», «Қараөзек Рутс» жуўапкершилиги шекленген жәмийетлери ҳәм «Элъёр Анна» кәрханалары тәрепинен 85,1 мың АҚШ долларлық өнимлер экспортқа шығарылды. Соның менен бир қатарда халықтың мөлдек жерлеринен нәтийжели пайдаланыўын шөлкемлестириў мақсетинде жерлерге палыз егинлери ҳәм мийўе нәллерин егиў бойынша аймақтағы  шаңарақлар менен тығыз байланыста халық депутатлары районлық Кеңес депутатлары ҳәм де сектор ағзалары биргеликте жумыслар алып бармақта.

Ҳүрметли Президентимиз Ш.Мирзиёевтиң 2017-жыл 15-16-декабрь күнлери Қарақалпақстан Республикасына болған сапары даўамында 2018-жылды мектепке шекемги билимлендириў мәкемелери жылы деп белгилеп бериўи мүнәсибети менен район аймағынан 10 мектепке шекемги билимлендириў мәкемелерин, соннан 1-сектор аймағында ноллик баҳада, 1,2 шериклик тийкарындағы жәми 3 балалар бақшасын шөлкемлестириў нәзерде тутылған.

Буннан тысқары, Өзбекстан Республикасы Президентиниң 2018-жыл 29-марттағы «Абат аўыл» бағдарламасы ҳаққындағы Пәрманы талапларының орынланыўын тәмийинлеў мақсетинде сектор аймағындағы «Мәденият» аўыл пуқаралар жыйынында 4 миллиард 427 миллион сумлық қурылыс ҳәм абаданлас­тырыў ислерин алып барыў бо­йынша мәнзилли бағдарламаға киргизилип, абаданластырыў жумыслары алып барылмақта.

Елбасшымыз тәрепинен белгилеп берилген ўазыйпаларды орынлаў, сектор жумысларын еле де жетилистириў, пуқараларымызды ҳәр тәреплеме қоллап-қуўатлаў, олардың нызамлы мәплерин қорғаўдағы жумысларымызды алдағы ўақытлары да даўам еттиремиз.

 Д.Утемуратов,

Қараөзек районы ҳәкими.

 СҮЎРЕТТЕ: Сектор ағзалары И.Қосыбаев ҳәм Д.Атажанов «Мәденият»

АПЖ аймағында  алып барылып атырған жумысларды көзден өткермекте.   

 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF