Еркин Қарақалпақстан Вести Каракалпакстана 04:17:59, 19.08.2018
Хош келипсиз! | RSS
Сайт мазмуны

Кириў усылы

НЫЗАМШЫЛЫҚТАҒЫ  ӨЗГЕРИСЛЕРГЕ БАҒЫШЛАНДЫ

2017-2021-жылларда Өзбекстан Республикасын раўажландырыўдың тий­карғы бес бағдары бойынша Ҳәрекетлер стратегиясында экспорт жумысын либералластырыў ҳәм әпиўайыластырыўға айрықша итибар қаратылған.

 Өзбекстан Республикасы Президенти ҳәм Ҳүкимети тәрепинен исбилерменлик субъектлерине жаратып берилген қолайлылықлар ҳәм преференциялар, сондай-ақ, оларды қоллап-қуўатлаў, мәмлекетимиздиң экспорт потенциалын раўажландырыўға қаратылған жумыслардың орынланыўын тәмийинлеў мақсетинде  Қарақалпақстан Республикасы Бажыхана басқармасы тәрепинен ғалаба хабар қураллары ўәкиллериниң қатнасында семинар болып өтти. Илажды Қарақалпақстан Республикасы Бажыхана басқармасы баслығының биринши орынбасары И.Казаков басқарып барды. Онда бас­қарманың бөлим баслықлары У.Қасимов, С.Алланазаров, Н.Назар­баевлар сөзге шығып, тараўдағы нызамшылыққа киргизилген өзгерис ҳәм қосымшалар, сондай-ақ, исбилерменлик субъектлерине жаратып берилген жеңилликлер бойынша қатнасыўшыларға түсиник берип өтти. 

Атап өтилгениндей, 2018-жыл 12-апрельде Президентимиз тәрепинен қабыл етилген «Өзбекстан Республикасы мәмлекетлик бажыхана хызмети уйымлары жумысын түп-тийкарынан  жетилистириў илажлары ҳаққында»ғы Пәрманы қабыл етилди. Пәрманға муўапық, усы жылдың 1-июльинен баслап бир қатар жаңа тәртип-қағыйдалар енгизиледи. Атап айтқанда, товарларды бажыхана режимлерине жайластырыўда, сондай-ақ, сырт ел автотранспортларының Өзбекстан Республикасы аймағы бойлап ҳәрекетлениў маршрутларын өзгертиўге бажыхана уйым­лары тәрепинен берилетуғын рухсатнамалар бийкар етиледи. Сондай-ақ, сыртқы экономикалық жумыс қатнасыўшылары бажыхана брокерлерине мүрәжат етпестен бажыхана жүк декларацияларын Интернет тармағы арқалы реал ўақыт режиминде толтырыў ҳәм бажыхана уйымларына усыныў ҳуқықына ийе болады.

Бажыхана уйымлары исбилерменлик субъектлери тәрепинен усынылған мағлыўматлардың дурыслығы ҳәм олардың сыртқы саўда жумысының нызамлылығын тексериў мақсетинде товарлар ҳәм транспорт қураллары еркин айланысқа шығарылғаннан соң олардың бажыхана қадағалаўын әмелге асырады.

Сондай-ақ, бажыхана қоймаханаларында үш жылдан артық сақланып кия­тырған мал-мүлклер бажыхана уйымлары тәрепинен услап қалынады ҳәм олар үш ай даўамында талап етип алынбаған жағдайларда суд қарары тийкарында мәмлекет пайдасына өндириледи, соңынан белгиленген тәртипте Өзбекстан Республикасы Бас прокуратурасы жанындағы Мәжбүрий орынлаў бюросы тәрепинен сатылады ямаса жоқ етиледи.

Илаж соңында журна­листлер өзлерин қызық­тырған сораўлары бойынша қәнигелерге мүрәжат етип, тийисли жуўаплар алды.

А.ОРАЗОВ.

арнаўлы  хабаршымыз.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF