Еркин Қарақалпақстан Вести Каракалпакстана 07:38:32, 22.10.2018
Хош келипсиз! | RSS
Сайт мазмуны

Кириў усылы

ТАЯРЛЫҚ БАРЫСЫ ҚАЛАЙ?

Аппақ арзыў-нийетлер қушағында кеўиллери қайнаўытлаған жасларымыз әйне пайытта Жоқары оқыў орынларына кириў тест-сынақларына қызғын таярланып атыр. Әлбетте, олар өз күшине исенеди. Олардың ата-аналары, устазлары тилеклес болып, перзентлерине имканиятлар жаратып бермекте.

Өзбекстан Республикасы Президентиниң «Республика жоқары оқыў орынларының бакалавриатына кириў тест сынақларын өткериў тәртибин жетилистириў ҳаққында»ғы қарарына муўапық, 2018-2019-оқыў жылынан баслап тест сынақларын тапсырыў тәртиби өзгерди. Министрлер Кабинетиниң қарары менен «Өзбекстан Республикасы Жоқары оқыў орынларының бакалавриатына оқыўға қабыллаў ушын кириў тест сынақларын өткериў тәртиби ҳаққында»ғы Реже тастыйықланды.

Режениң орынланыўын тәмийинлеў мақсетинде Өзбекстан Республикасы Мәлимлеме технологиялары Министрлиги, Қарақалпақстан Республикасы Минис­трлер Кеңеси, Ишки ислер министрлиги, Денсаўлықты сақлаў министрлиги, Нөкис қаласы ҳәкимлиги, Жоқары оқыў орынлары менен биргеликте арнаўлы кесте тийкарында орынларда таярлықлар ҳәм ҳәр қыйлы семинарлар шөлкемлестирилмекте.

Жақында Нөкис Олимпия резервлери колледжинде пайтахтымызда жай­лас­қан академиялық лицей оқыўшылары қатнасыўында таярлық (репетиция) өткерилди. Оған жоқары оқыў орынларының оқытыўшылары ҳәм Қарақалпақстан Республикасы Халық билимлендириў министрлиги қәнигелери, орта арнаўлы билимлендириў мәкемелериниң директор ҳәм директор орынбасарлары қатнас­ты.

Таярлық даўамында абитурентлер 8.00 ден баслап ишке киргизилип, тест сораўларына белгиленген ўақыт даўымында жуўап берди. Сондай-ақ, абитуриентлер қатнасыўында бақлаў қурылмалары тексериўден өткерилип, кең түрде түсиндириў жумыслары алып барылды. Соны да айтып өтиўимиз керек, Мәмлекетлик тест орайының мағлыўматына қарағанда Қарақалпақстанда бы­йыл тест сынақлары 2 орында Олимпия ҳәм миллий спорт түрлери бо­йынша Нөкис жоқары шеберлиги мектебинде ҳәм Нөкис Олимпия резервлери колледжиниң спорт залларында өткерилиўи белгиленген.

 З.ЕРЕКЕЕВА.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF