Еркин Қарақалпақстан Вести Каракалпакстана 04:18:30, 19.08.2018
Хош келипсиз! | RSS
Сайт мазмуны

Кириў усылы

ҚЫЗҒЫН ӨТКЕН БЕЛЛЕСИЎ

Мәмлекетимизде ҳаял-қызлардың жәмийетлик-сиясий белсендилигин арттырыў, ҳуқықлары менен нызамлы мәплерин қорғаў, аналықты ҳәм балалықты ҳәр тәреплеме қоллап-қуўатлаў, оларды түрли тараўларда өз қәбилетин ҳәм имканиятларын жүзеге шығарыўы ушын шәраятлар жаратыў, сондай-ақ шаңарақ институтын беккемлеў бағдарында кең көлемли жумысларды әмелге асырыў мақсетинде Президентимиз Ш.Мирзиёев тәрепинен 2018-жыл 2-февраль күни қабыл етилген «Ҳаял-қызларды қоллап-қуўатлаў ҳәм шаңарақ институтын беккемлеў тараўындағы жумысты түп-тийкарынан жетилистириў илажлары ҳаққында»ғы Пәрманы елимиздеги барлық ҳаял-қызларымыздың жәмийеттеги ҳәм шаңарақтағы ролиниң артыўы, олардың нызамлы мәплериниң тәми­йинлениўи, социаллық-руўхый орталықтың раўажланыўына хызмет етеди.

Солай екен, усы пәрман тийкарында Шоманай районындағы «Айбүйир» мәкан пуқаралар жыйынында бир қанша жумыслар әмелге асырылып атыр. Аймақтағы жәрдемге мүтәж ҳәм майыплығы бар шаңарақларға барып, олардың ҳал-жағдайларынан хабар алынып жәрдемлер көрсетилмекте. Сондай-ақ, тараў қәнигелери менен биргеликте исбилерменлик жумысларын жолға қоймақшы болған жасларымызға, ҳаял-қызларымызға жол-жобалар ҳәм мәсләҳәтлер берилмекте. Жақында аймағымызда «Ақ жап» АПЖ, районлық «Мәҳәлле» қайырқомлық қоры, Жаслар аўқамының районлық бөлими, ӨзЛиДеП қәўендерлигинде ҳаял-қызлар  арасында спорт жарысы болып өтти.  Оған «Айбүйир», «Ақ жап» АПЖ, усы аймақлардағы 2 ҳәм 14-санлы мектеп оқытыўшылары ҳәм оқыўшылары, аўыллық шыпакерлик пункти хызметкерлеринен «Абдуллаев» атамасындағы командалары қатнасып өз-ара күш сынасты. Беллесиўде ҳаял-қызларымыз спорттың шахмат, шашка, волейбол, арқан тартысыў, футбол түрлери бойынша өзлериниң шаққанлығын ҳәм епшиллигин көрсетти.

—Таңлаўда қатнасыўшылардың жасы шекленбеген ҳалда спортқа қызығыўшылығы бәлент болған ҳаял-қызлар қатнасты. Әлбетте, олар арасында бундай жарыслардың өткерилиўи ҳаял-қызларымыздың жәмийетлик турмыста белсендилигиниң артыўына, шаңарақтағы орнының беккемлениўине, саламат турмыс тәризиниң жаратылыўына имканиятлар жаратады, - дейди «Айбүйир» мәкан пуқаралар жыйынының ҳаял-қызлар баслан­ғыш шөлкеминиң баслығы Мийригүл Байдуллаева.

Жарыс жуўмағында спорттың шахмат түри бойынша 2-санлы улыўма билим бериў мектеби муғаллими Ж.Ғаюпова, шашка бо­йынша усы мектеп оқыўшысы  О.Қайпанова, волейбол түринен «Айбүйир» жәмлеспеген жаслар топары, арқан тартысыў ҳәм футбол түрлеринен 2-санлы мектеп оқытыўшылары командалары жеңимпаз болып, оларға қәўендерлер тәрепинен таяр­ланған саў­ғалар тапсырылды.

З.ЕРЕКЕЕВА.

 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF