Еркин Қарақалпақстан Вести Каракалпакстана 04:19:17, 19.08.2018
Хош келипсиз! | RSS
Сайт мазмуны

Кириў усылы

РӘСМИЙЛЕСТИРИЎ 40 МИНУТТА

Өзбекстан Республикасы Министрлер Кабинетиниң 2018-жыл 10-майдағы 348-санлы қарары менен мәмлекетлик хызметлер орайлары арқалы мәмлекетлик ҳәм хожалық басқарыў уйымлары, жергиликли мәмлекетлик ҳәкимият уйымлары ҳәм де коммерциялық банклер тәрепинен көрсетилетуғын барлық түрдеги хызметлерден еркин пайдаланыўды тәмийинлейтуғын электрон санлы имза гилтиниң сертификатын бериў бойынша мәмлекетлик хызметлерди көрсетиўдиң ҳәкимшилик регламенти тастыйықланды.

Бул регламент пенен электрон санлы имза алыў тәртибине бир қатар өзгерислер киргизилди. Атап айт­қанда, Мәмлекетлик хызметлер орайлары арқалы электрон санлы имза гилтин дизимге алыў ҳәм электрон санлы имза гилтиниң сертификатын бериў мәмлекетлик хызметиниң мүддети 3 жумыс саатынан 40 минутқа қысқартылды.

Буннан тысқары, мүрәжат етиўшилер Мәмлекетлик хызметлер орайлары арқалы электрон санлы имза гилтин дизимге алыў ҳәм бул гилттиң сертификатын бериў бойынша районлық (қалалық) мәмлекетлик хызмет орайларына өзи келип яки қәлеген ўақыт даўамында онлайн тәризде Бирден-бир интерактив мәмлекетлик хызметлер порталы арқалы мүрәжат етиўи мүмкин. 

Электрон санлы имза гилтлериниң сертификатларын бериў ушын физикалық ҳәм юридикалық шахслардан ең кем айлық ис ҳақының 10 проценти муғдарында жыйым өндириледи, нызам ҳүжжетлеринде электрон санлы имза гилтлериниң сертификатларын бийпул алыў нәзерде тутылған жағдайлар буған кирмейди.

Электрон санлы имза алыў ушын физикалық ҳәм юридикалық шахслар қәлеген мәмлекетлик хызметлер орайына мүрәжат етиўи мүмкин. Бул хызметтен пайдаланыў ушын мүрәжат етиўшилердиң өзлери Мәмлекетлик хызметлер орайына келип яки қәлеген ўақытта онлайн режимде ислеўши Бирден-бир интер­актив мәмлекетлик хызметлер порталы арқалы мүрәжат етиўи ҳәм электрон түрде мәмлекетлик хызметлерден пайдаланыў ҳаққындағы сораўнаманы толтырыўы керек.

Ўәкилликли уйымның мәлимлеме системасында сораўнаманы көрип шығыўдың нәтийжелерине тийкарланып рәсмийлестирилген электрон санлы имза гилти сертификаты электрон ҳүжжет формасында Мәмлекетлик хызметлер орайына мәкемелер аралық электрон өз-ара байланысыў жолы арқалы, егер де мүрәжат етиўшиниң сораўнамасы ўәкилликли уйымға туўрыдан-туўры Бирден-бир интерактив мәмлекетлик хызметлер порталы арқалы келип түскен болса, мүрәжат етиўшиниң өзине усы портал арқалы автомат түрде жибериледи.

Электрон санлы имза жабық гилтиниң пароли ўәкилликли уйым тәрепинен сораўнамада көрсетилген мобиль телефон номерине смс-хабар түринде жибериледи.

Электрон санлы имза гилтиниң сертификатын алыў ушын Электрон санлы имза жабық гилтиниң ийеси Мәмлекетлик хызметлер орайы қәнигесине гилтлерди ҳәм сертификатын электрон ҳүжжет түринде жазып қойыў ҳәм сақлаў ушын өзге мағлыўматлар дерегин (флешканы) усынады.

Мәмлекетлик хызметлер орайы қәнигеси Электрон санлы имза гилтин ҳәм сертификатын Электрон санлы имза жабық гилтиниң ийесине бериў ўақтында төмендегилерди әмелге асырады:

Электрон санлы имза жабық гилти ийесиниң шахсын тастыйықлаўшы ҳүжжети (паспорт, әскерий билет, шофёрлық гүўаҳнамасы яки шахсын тастыйықлаўшы басқа ҳүжжет) тийкарында оның шахсын анықлайды;

қурамында дизимге алын­ған Электрон санлы имза гилтлери ҳәм электрон ҳүжжет түриндеги Электрон санлы имза гилтиниң сертификаты болған файлды мүрәжат етиўши тәрепинен усынылған өзге мағлыўматлар дерегине жазып қояды ҳәм файлдың жазылғанлығын тексереди;

Электрон санлы имза гилтиниң сертификаты қағаз ҳүжжет түринде талап етилген жағдайда еки нусқада басып шығарылады ҳәм ҳәр бир нусқасы Мәмлекетлик хызметлер орайы қәнигеси тәрепинен имзаланып, бир нусқасы Электрон санлы имза жабық гилтиниң ийесине бериледи.

Ўәкилликли уйым тәрепинен Электрон санлы имза гилтиниң сертификатын бериўден бас тартыўға төмендегилер тийкар болыўы мүмкин:

мүрәжат етиўши усынған сораўнамада натуўры яки бузып көрсетилген мағлыўматлардың бар екенлиги;

Электрон санлы имза гилтиниң сертификатын бериў ушын төлем әмелге асырылмағанлығы, нызам ҳүжжетлеринде Электрон санлы имза гилтлериниң сертификатларын бийпул алыў нәзерде тутылған жағдайлар буған кирмейди;

мүрәжат етиўшиниң ҳүжжетлерди зәрүр тәризде рәсмийлестирмей усыныўы.

Басқа тийкарларға көре, соның ишинде, Электрон санлы имза гилтиниң сертификатын бериў мақсетке муўапық емес деген себеплер менен бас тартыўға жол қойылмайды.

А.ОРАЗЫМБЕТОВ,

Мәмлекетлик хызметлер агент­лиги Қарақалпақстан Республикасы Басқармасы Тақыятас районы Мәмлекетлик хызметлер орайының Мәмлекетлик дизимнен өткериў ҳәм рухсат бериўши ҳүжжетлерди рәсмийлестириў хызметлерин көрсетиў бөлими баслығы.

 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF