Еркин Қарақалпақстан Вести Каракалпакстана 16:31:28, 23.10.2018
Хош келипсиз! | RSS
Сайт мазмуны

Кириў усылы

РАМАЗАН  АЙЫН   КӨТЕРИҢКИЛИК  ПЕНЕН   ӨТКЕРЕЙИК!

Жәннетмәкан журтымызды абат етиў, халықлар тынышлығы ҳәм абаданлығы жолында алып барылып атырған саўаплы ислер жыл сайын көбе­йип бармақта.

Усы жыл 11-май күни халқымыз ушын жақсылық, сақаўат, мийрим-шәпәәт нышаны есапланған мүбәрек Рамазан айының жәми­йетлик турмысымызда өз-ара дослық ҳәм аўызбиршилик орталығын және де беккемлеў бағдарындағы айрықша орнын ҳәм әҳмийетин есапқа алған ҳалда және муқаддес ислам дининиң мазмун-мәнисин, оның тынышлық, кеңпейиллик, шүкиршилик сыяқлы уллы идеяларын кеңнен үгит-нәсиятлаў, диний-ағартыўшылық қәдириятларымызды қәстерлеп сақлаў ҳәм улығлаў мақсетинде ҳәм бул әзиз байрамды жоқары кейпият, көтериңки руўхта өткизиў ушын ҳүрметли Президентимиздиң  «Мүбәрек Рамазан айын мүнәсип түрде өткериў ҳаққында»ғы қарары қабыл етилди.

Тарийхқа нәзер тасласақ, уламалар байрам куўанышында бир-бирине: Аллатаала еткен қурбанлықларымызды ҳәм  қурбанлықларыңызды ҳәм бул қутлы күнди бизлерге ҳәм сизлерге мүбәрек етсин, деп бир-бирин қутлықлайтуғын еди. Демек, буннан көринип турыпты, ҳәр бир инсан байрам қуўанышын биргеликте бөлисип, кеўиллери шадлыққа толып,  бир-бирин Рамазан айы  байрамы менен қутлықлап, жақсы тилеклерин билдириўи керек.

Динимиздеги ибадатларды бир талқылап көрсек, ҳәр бириниң тийкарында, әлбетте, халыққа пайда, қандай да бир жәрдем, жақсылық, қайыр-сақаўат көрсетиў жатады. Солай екен, Рамазан айының пазыйлетлерин санап таўысып болмайды. Аллатааланың ең ақырғы китабы, Ислам дининиң ең баслы дереги, инсанияттың тап қыяметке шекемги турмыслық бағдарламасы болған Қураны Кәримниң де усы айда назыл болғаны, сондай-ақ, Ислам тарийхында жүдә үлкен итибар­ға ийе ўақыялар көп болғаны себепли пүткил дүнья мусылманлары бул айды басқа айлардан ажыралып турыўшы теберик, ибадатларға толы, мағфират (кешириў) айы деп санайды.

Пайғамбарымыз алайҳиссалам «Ким Рамазан оразасын ийман менен саўап тилеген ҳалда тутса, оның барлық гүналары кешириледи» деп айтып өткен. Ким де ким бул мүбәрек Рамазан айына жетип келсе, өзи наўқас ямаса сапарда болмаса, ораза тутыў оның мойнына парыз есапланады.

Алҳамдулиллаҳ, бүгинги күнде дин тараўында жүргизилип атырған реформалар нәтийжесинде республикамыздағы барлық 50 мешитте таровиҳ намазлары оқылмақта. Быйыл 35 мешитте хатым қуранлар өткерилмекте. Оларда қырыққа жақын Қураны кәрим ҳапызлары Аллатааланың кәламын басынан ақырына шекем хатым етпекте. Мөмин-мусылманлар бул күнлердиң қәдирине жетип, Аллатаалаға шүкирлик етип, ибадатларын емин-еркин, тыныш әмелге асырып атыр.

Рамазан айында ким Аллаға жақынластыратуғын жақсылық етсе, буннан басқа айда орынлаған бир парыз әмел саўабына, ал, бир парыз әмелди ада еткен инсан басқа айда жетпис парызды ада еткен сыяқлы саўапқа ийе болады. Және бул ай — сабыр айы. Сабырдың жуўабы болса жәннет есапланады.

Аллатаала бул айда мөминниң ырысқын көбейтип береди. Рамазан айында кимде-ким бир оразадарға ифтарлық берсе, гүналары кешириледи, дозақ отынан өзин қутқарады ҳәм оразадардың әжири сыяқлы саўап­қа ийе болады.

Соны да айтыў керек, оразаның тек денсаўлықты сақлаў ушын ғана емес, ал, наўқасларды емлеў ушын да зәрүрлиги өзиниң илимий тастыйығын тапқан даўалаў усылы болып табылады. Ҳәзирги ўақытта кең тарқалған кеселликлердиң көпшилигин мусылман болмаған еллердиң медицина хызметкерлери ықтыярый ашлық жолы менен емлеп атыр. Илимий-изертлеўлер нәтийжесинде ораза бүгинги күнде көп тарқалған дәртлерге даўа екенлиги, адам саламат болайын десе, ҳәр жылы 28-30 күн ықтыярлы түрде аш қалыўы зәрүрлиги атап өтилген. Оразаға байланыслы бул ҳақыйқатлықлар буннан 14 әсир бурын Пайғамбарымыз Муҳаммад саллалаҳу алайҳи ва салламның: «Ораза тутыңлар, саламат боласызлар» (Имам Табароний рәўияты), деп айтқан ҳәдийси-шәриплериниң илимий тастыйығы болып табылады.

Бәршелеримиз бул мүбәрек айда әмелге асырылатуғын қайыр-сақаўат ислерин, яғный, жәрдемге мүтәж инсанлардың ҳалынан хабар алыў арқалы оларды ҳәр тәреплеме қоллап-қуўатлаў, зыярат орынларын абаданластырыў, шаңарақ ҳәм мәҳәллелерде меҳир-мүриўбет сезимлерин тиклеў, жасларымыздың ҳәр тәреплеме билим алыўына жетерли итибар қаратыў сыяқлы қайырлы ислерди әмелге асырыў арқалы бул айды ҳүрмет пенен көтериңки руўхта өткериўимиз керек.

Аллатаала Рамазан айын бәршемизге мүбәрек етип, бул айдан анадан жаңа туўылғандай, гүнәлардан жырақ болып шығыўымызды несип әйлесин!

 Шамсутдин БАЎАТДИНОВ,

Қарақалпақстан Республикасы Мусылманлар қазыятының қазысы.

 

 

 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF