Еркин Қарақалпақстан Вести Каракалпакстана 17:12:08, 20.06.2018
Хош келипсиз! | RSS
Сайт мазмуны

Кириў усылы

АКАДЕМИКТИҢ  ДИЙҚАН  ҚАРЫНДАСЫ

Бәҳәрдиң қубылмалы күнлери аўыл адамларын азы-кем екилениўге мәжбүрлегени менен «буннан жаманында да тойға барған» мийнет сүйгиш халқымызды бул аса қәўетерге салып атырған жоқ. Әсиресе, әзелден дийқаншылықта шыныққан айы­рым заманласларымыз қоңсы-қоба,аўыл-аймағына үлги болып, қыйтақ жерлерине мийўе-жемис ҳәм овощ-палыздың не бир түрлерин егип, үйлериниң әтирапын гүлзарға айландырған десек асыра силтеген болмаймыз.

«Бахытлы» мәкан пуқаралар жыйыны турғыны Феруза Ещанова да усындай мийнеткеш инсанлар тайпасына киреди. Балалығы «Жалпақ жап» бойындағы аўыллардың биринде өткен ол кишкенелигинен дийқаншылыққа бир ата жақын өсти. Буған оның әкеси Толыбай фельдшер (академик Турсынбай Ещановтың жигит ағасы) себеп болды.

— Әкемиз өз кәсиби менен бирге аўыл хожалығын да күтә жақсы көретуғын еди,- деп оны еске алады Феруза апа. — Ол аўылдағы үй алды бағымызға 47 түрли ҳәрқыйлы мийўе, жүзим нәллерин өсирип, оны әлпешлеп тәрбиялар еди. Сонлықтан болса керек, шаңарағымыздың барлығы да жердиң тилин түсинетуғын инсанлар болып жетилис­ти. Мен де бурын аўыл хожалығында жумыс иследим. Ҳәзир күйеўим Қайыпбай, улым Әмир, қызым Зийўар менен биргеликте 6 сотых қыйтақ жеримизге туқымнан егилген қызыл, болгар бурышы, помидор, баклажан, ләблеби, қыяр, клубника, асқабақ, палаўқабақ, ғарбыз, картошкаларымызды тәрбиялап атырмыз. Гүзде еккен пияз, чесногимиз болса, ҳәзир түплеп, март айынан баслап көк пиязды базарға шығарып сатып атырмыз.

Усы орында газета оқыўшыларына мағлыўмат ушын Хал­қабадта пийшемби ҳәм екшемби күнлери үлкен базар болатуғынлығын еслетип өтемиз.

— Бизлер жигирма жыл бурын қоныс басқан бул аймақ таза хожалықлар болғанлықтан, дийқаншылықты бурын онша түсинбейтуғын еди. Қоңсы-қоңсыдан тәлим алар дегениндей, көпшилигине өзим туқым тарқатып, жердиң обалына қалмаң, бир қарыс жер болса да бос жатпасын, деп егин егиў ҳәм оған қалай тәрбия бериў жолларын күйеўимиз бенен бирге үйретип жүрдик. Ҳәзир жаман емес. Бәри де ана-жердиң таўсылмас мол ғәзийне екенлигин түсинип, оннан жақсы пайдаланып атыр. Деген менен, жерге де өз ўақтында азығын бермесең, ол саған иймейди. Сонлықтан, ҳәр гүз сайын бир тележка қой-жанлықтың шириген қыйын сатып алып, төгин менен топырақты азықландырамыз. Бул бизлер жетистирген өнимниң тазалығы ҳәм сапасына жақсы тәсир етеди. Ҳүкиметимизге де рахмет, усындай тыныш ҳәм абадан турмысты жаратып бергени ушын. Биз буған бәрҳа миннетдар болып жасаўымыз керек, - дейди ол көкиреги толып-тасып.

Ҳақыйқатында да, «Мийнет түби — рәҳәт», «Еңбек етсең емерсең» дегендей, усындай иси көпке үлги заманласларымызды көргенде бизлердиң де кеўлимиз тасып қуўанышқа бөленеди.

— Рахмет, апа! - дедим оған кетеримде. Мениң бул гәпимди тастыйықлағандай үй дөгерегиндеги мийўе тереклериниң шақасы самал менен бир ырғалып қойды.

 

Ә.ОРАЗОВ,

арнаўлы хабаршымыз.

Кегейли районы.

 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF