Еркин Қарақалпақстан Вести Каракалпакстана 04:19:51, 19.08.2018
Хош келипсиз! | RSS
Сайт мазмуны

Кириў усылы

ИСБИЛЕРМЕНЛЕР МӘПЛЕРИН  ҚОРҒАЎ — ТИЙКАРҒЫ ЎАЗЫЙПАМЫЗ

2017-2021-жылларда Өзбекстан Республикасын раўажландырыўдың бес тийкарғы бағдарлары бойынша Ҳәрекетлер стратегия­сында экономиканы және де раўажландырыў ҳәм либералластырыў бойынша белгиленген ўазыйпалар елимиздиң финанс-экономикалық турақлылығын беккемлеўде, халқымыздың турмыс абаданлығын арттырыўда айрықша орын тутады. Бул бағдар бойынша да елимизде бир қатар илажлар әмелге асырылып, исбилерменлик субъектлери мәплери үстинлигин әмелде тәмийинлеў мақсетинде Президентимиздиң Пәрман ҳәм қарарлары шығарылмақта. 

Атап айтқанда, Өзбекстан Республикасы Президентиниң 2018-жыл 16-январь күни «Елимиздиң азық-аўқат қәўипсизлигин буннан былай да тәмийинлеў илажлары ҳаққында»ғы Пәрманы қабыл етилди. Бул өз гезегинде мәмлекеттиң азық-аўқат қәўипсизлигин және де тәмийинлеў, базарды сапалы, қәўипсиз ҳәм арзан азық-аўқат өнимлери менен толтырыў, халықтың сатып алыў имканиятларын беккемлеў, сыртқы экономикалық жумысты либералластырыў ҳәм саламат бәсекилик орталығын раўажландырыў, соның менен бирге тараўдағы бар болған системалы машқалаларға шек қойыўға тийкар жаратады. 2018-жыл 1-февралынан баслап усы пәрман талапларына муўапық Өзбекстан Республикасына азық-аўқат өнимлерин импорт етиў бойынша айырым хожалық жүргизиўши субъектлерине усынылған индивидуал бажыхана, салық ҳәм басқа жеңилликлер, сондай-ақ, басқа преференциялар бийкар етилди.  Атап айт­қанда, 2018-жыл 1-февралынан баслап тутыныў товарларын  Республикалық товар-шийки зат биржаларында сатыў ҳәм сатып алыўды шеклеў бийкар етилетуғыны, қумшекер ислеп шығарыўшылар 2019-жыл 1-январьға шекемги мүддетке импорт шийки заты тийкарында ислеп шығарылған көлемлери бөлегине қосылған қун салығын төлеўден азат етилип, көтере саўдаға лицензия алыўда ең кем айлық мийнет ҳақының 3500 есесинен кем болмаған муғдарда, соннан пул қаржылары ең кем айлық мийнет ҳақының 1200 есесинен кем болмаған муғдарда қәлиплестирилген устав фонды барлығы ҳаққындағы талап бийкар етилди.

Буннан тысқары, Өзбекстан Республикасы Президентиниң 2018-жыл 19-февраль күнги «Мәлимлеме технологиялары ҳәм коммуникациялары тараўын буннан былай да жетилистириў илажлары ҳаққында»ғы Пәрманы менен 2018-жыл 1-июнь күнинен баслап исбилерменлик субъектлери товарлар, жумыслар (хызметлер) экспорт етилгенлиги ушын экспорт шәртнамасын дүзбей ҳәм банк комиссиясы өндирилместен, Интернет тармағындағы электрон саўда майданшалары арқалы, Өзбекстан Республикасы Минис­трлер Кабинети тәрепинен белгиленетуғын дизим бо­йынша айырым товарлардан тыс­қары, товарлар, жумыслар (хызметлер) экспортын әмелге асырыў ҳуқықына ийе екенлиги белгилеп қойылды.

Сондай-ақ, усы Пәрманда исбилерменлик субъектлери тәрепинен электрон коммер­циядан пайдаланыў арқалы сатылатуғын товарлар айланысы олардың көлемине қарамастан, усақлап сатыў есапланатуғынлығы нәзерде тутылған.

Жуўмақлап айтқанда, булардың барлығы да экономиканың ҳәрекетлендириўши күши бол­ған исбилерменлик субъектлери мәплери үстинлигин әмелде тәми­йинлеў жумысын хошаметлеў, олардың ҳуқықлары ҳәм нызамлы мәплерин бузыў жағдайларына шек қойыў имканиятын жаратады.

Қабыл етилип атырған нызам ҳүжжетлериниң өз ўақтында орынланыўында өз үлесимизди қосыў, кең жәмийетшилик итибарына жеткериў бойынша үгит-нәсият жумыслары жүргизилмекте.

Е.УТЕПОВ,

Қарақалпақстан Республикасы Әдиллик министрлиги аға мәс­ләҳәтшиси.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF