Еркин Қарақалпақстан Вести Каракалпакстана 10:34:20, 25.05.2018
Хош келипсиз! | RSS
Сайт мазмуны

Кириў усылы

«НӨКИС ПОЛИМЕР»ЖОҚАРЫ ШЕКЛЕРДИ ГӨЗЛЕП

Бүгин Аралбойы регионы тез пәтлер менен раўажланып, заманагөй жаңа кәрханалар саны артып бармақта. Әсиресе, мәмлекетимиз Басшысының өткен жыл 20-21-январь күнлери республикамызда болған сапарынан соң бундай дөретиўшилик жумыслар және де пәт алды.

Президентимиз аймақ экономикасын раўажландырыў, социаллық шараятларды жақсылаў бойынша ис-илажлар бағдарламасын белгилеп берген еди. Бул бағдарламаға муўапық Аралбойында санаатты раўажландырыў бойынша улыўма көлеми 160 миллиард сумға жақын 242 жойбар әмелге асырылды ҳәм төрт мыңға жақын жаңа жумыс орынлары жаратылды. Атап айтқанда, пайтахтымызда «Нөкис Полимер» жуўапкершилиги шекленген жәмийети өндирислик кәрханасы иске қосылды. Нәтийжеде заводта жылына жоқары басымға шыдамлы 8 мың тонна полиэтилен қубырларын ислеп шығарыў имканияты жүзеге келди. Соның менен бирге, 95 адамның бәнтлиги тәмийинленди.

Ҳәзирги ўақытта кәрханада суўға мөлшерленген 16-630 миллиметрлик, тәбийғый газ ушын 63-315 миллиметрлик полиэтилен қубырлары, 50-63 ҳәм 75 миллиметрлик жалғаўшы қурылма материаллары ислеп шығарылып, ишки базарға жеткерип берилмекте. Өткен жылы буйыртпашылар тәрепинен 10,3 миллиард сумлық шәртнама әмелге асырылды. Өнимлеримиз тийкарынан республикамыз аймағындағы ҳәм Хорезм ўәлаятындағы қурылыс объектлеринде пайдаланылмақта.

Кәрханада жүргизилип атырған өндиристи гүзетер екенмен жаслардың заманагөй технологияларды меңгергенин көрип қуўа­ныш­қа толаман. Олардан Батыр Раҳимов жаңа технологияларды өзлестирген жигитлерден. Ташкент политехника институтын тамамлап, ҳәзир кәрханада цех баслығы болып ислемекте. Және Руслан Бердиев болса ҚМУ дың химия техноло­гиясы факультетинде билим алып, оператор ўазыйпасын атқарып келмекте.

Әлбетте, ҳәр қандай ис жолға түсип кетемен дегенше өзине жараса машқаласы болыўы тәбийғый. Бизиң кәрханамыз да ҳәзирги ўақытта экономикалық қыйыншылықлардан жырақ емес. Бирақ, соған қарамас­тан жәмийетимиз жоқары шеклерди гөзлеп жумыс алып бармақта. Буның ушын кәрханамыз хызметкерлерине барлық шараятлар жаратылған.

Султан  АННАҚИЛИЧЕВ,

«Нөкис Полимер» жуўапкершилиги шекленген жәмийети директоры.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF