Еркин Қарақалпақстан Вести Каракалпакстана 23:50:58, 19.10.2018
Хош келипсиз! | RSS
Сайт мазмуны

Кириў усылы

ҚАЙЫРҚОМЛЫҚ КӨРСЕТИЛДИ

Соңғы ўақытлары елимизде халықтың турмыс абаданлығын арттырыў, олар­ға және де қолайлы шараятлар жаратып бериў бағдарында бир қатар ибратлы ислер әмелге асырылмақта. Әсиресе, Екинши жәҳән урысы қатнасыўшыларына, сондай-ақ, бағыўшысынан айырылған жалғыз баслы қариялар, жетим-жесирлер, көп балалы кем тәмийинленген шаңарақларды материаллық ҳәм руўхый жақтан қоллап-қуўатлаўға республика ҳүкимети тәрепинен айрықша итибар қаратылып келинбекте.

Бундай қайырқомлық илажларға республикамызда ҳәрекет етип турған бирқанша шөлкемлер қәўендерлик жәрдемлерин көрсетиўде мүнәсип үлеслерин қоспақта.

Атап айтқанда, «Автотест» Нөкис жуўапкершилиги шекленген жәмийетиниң жәмәәт ағзалары 9-Май улыўмахалықлық байрам — еслеў ҳәм қәдирлеў күни мүнәсибети менен Тақыятас районындағы Қариялар ҳәм майыплар, урыс ҳәм мийнет нураныйлары санаторийи, соның менен бирге, Хожели районындағы  республикалық «Мүриўбет» майыплар ушын ҳаяллар интернат  үйинде болып, бул дәргайда жасап атырған кемкеўил инсанлардың ҳал-жағдайынан хабар алып,  майыплар арбашасын тапсырып, олардың алғысына миясар болды. Өз гезегинде илажда интернат үйиниң директоры Ким Лидия ҳәм басқалар сөзге шығып, көрсетилип атырған бундай ғамқорлықтан кеўли толып, Президентимизге, Республикамыз басшыларына ҳәм «Автотест» орайы баслығы З.Бабаназаровқа өзлериниң шексиз миннетдаршылықларын билдирди.

— Бул жерде республикамыздың барлық ўәлаятларынан 18 жастан жоқары болған I ҳәм II топар майыплары ҳәм руўхый жақтан кеселленген наўқаслар емленбекте, - дейди усы интернаттың емлеў ислери бойынша директор орынбасары Надира Пирназарова. — Илайым елимизде тынышлық, парахатшылық, өз-ара татыўлық болсын. Халқымыз арасында усындай қайырқом инсанлардың қатары көбейе бериўин тилеймиз...

 А.ОРАЗОВ,

арнаўлы хабаршымыз.

СҮЎРЕТТЕ: илаждан көринис.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF