Еркин Қарақалпақстан Вести Каракалпакстана 21:30:08, 21.07.2018
Хош келипсиз! | RSS
Сайт мазмуны

Кириў усылы

БАЛЫҚШЫЛЫҚ ТАРАЎЫН ЖЕДЕЛ РАЎАЖЛАНДЫРЫЎҒА  БАЙЛАНЫСЛЫ ҚОСЫМША ИЛАЖЛАР ҲАҚҚЫНДА

Өзбекстан Республикасы Президентиниң Қарары

Балықшылық тараўы азық-аўқат қәўипсизлигин тәмийинлеўдиң стратегиялық бағдарларынан бири болып есапланады. Соңғы ўақытлары көрилип атыр­ған илажлар себепли елимиз экономикасының қурамында балықшылықтың үлеси избе-из артып бармақта.

Соның менен бирге, балықшылық тараўында елеге шекем көплеген кемшиликлер ҳәм маш­қалалар сақланып қалмақта, оларды нәтийжели шешиўде исшеңликти және де арттырыў, инвестицияларды тартыў, балық жетистириў ушын алдынғы технологияларды енгизиў, экспорт потенциалын арттырыў, жаңа жумыс орынларын жаратыў имканиятын береди.

Балықшылық тараўын буннан былай да раўажландырыў ушын шараятлар жаратыў, кадр­ларды таярлаў ҳәм қайта таярлаў системасын жетилистириў, илимий-инновациялық изертлеўлердиң ҳәм қолланбалардың сапасын арттырыў, олардың нәтийжелерин әмелиятқа кеңнен енгизиў мақсетинде:

  1. Өзбекстан Республикасы Экономика министрлиги, Аўыл хожалығы министрлиги, Жеке меншик кәрханаларға көмеклесиў ҳәм бәсекиликти раўажландырыў бойынша мәмлекетлик комитети, Ташкент ўәлаяты ҳәкимлиги ҳәм «Өзбекбалықсанаат» ассоциациясының Ташкент ўәлаяты Төменги Шыршық ра­йоны ҳәкимлигине суд қарары менен берилген мүлк ҳәм жер участкалары, соның ишинде, суў бассейнлери тийкарында «Балық ислеп шығаратуғын» еркин экономикалық зонасын (кейинги орынларда «Балық ислеп шығаратуғын ЕЭЗ» деп аталады) шөлкемлестириў ҳаққындағы усыныслары мақуллансын.
  2. Төмендегилер «Балық ислеп шығаратуғын» ЕЭЗның тийкарғы ўазыйпалары етип белгиленсинF

өндиристи, жасалма суў бассейнлерин балықландырыўды буннан былай да раўажландырыў ҳәм балықшылық хожалықларын тәмийинлеў ушын балықтың жаңа ҳәм сыналған түрлерин ықлымластырыў арқалы  нәсилли балық шабақларын жаратыў;

нәсилли балық личинкаларын жетистиретуғын заманагөй инкубациялық    цех жумысын шөлкемлестириў, балық шабақларын ислеп шығарыў көлемин арттырыў, бар балық шабақларын жетистиретуғын суў бассейн­лерин модернизациялаў ҳәм қайта оңлаў;

өзиниң мүтәжлигин ҳәм балықшылық хожалықлары ушын толық қунлы және жоқары белоклы азықларды ислеп шығарыў бойынша заманагөй қуўатлықларды жаратыў арқалы азықлық базасын беккемлеў, дән ҳәм дәнли егинлерди егиў жолы менен бийдай ҳәм сояға болған өз талапларын қанаатландырыў;

инновациялық ҳәм заманагөй интенсив технлологияларды кеңнен енгизиў, соның ишинде, ҳәўиз (садок) усылында, жабық суў айланба системасы қурылмаларында балық жетистириў және жасалма суў бассейнлериниң өнимдарлығын арттырыў есабынан балық аўлаў көлемлерин көбейтиў;

биринши гезекте халықтың талапларын қанаатландырыў, сондай-ақ, соңын ала қоңсы еллерге экспорт етиў ушын балықларды қайта ислеў ҳәм балық өнимлерин ислеп шығарыў (консерва, икра, балық уны ҳәм басқалар) бойынша заманагөй комп­лекслерди шөлкемлестириў;

суўдың гидрохимиялық қурамын лаборатория усылында тал­қылаў, балықларды кеселликлерден қорғаў, сондай-ақ, балық кеселликлерин анықлаў, оларды емлеў илажларын көриў;

балық жетистириў, аўлаў ҳәм қайта ислеў процесинде инновациялық идеяларды, технологияларды ҳәм қолланбаларды енгизиў бойынша илимий-изертлеў жумысларын, сондай-ақ, қәнигелик бағдары бойынша билим алатуғын билимлендириў мәкемелери студентлери ушын балықшылық тараўында әмелият өткериўди шөлкемлестириў.

Өзбекстан Республикасы Жер ресурслары, геодезия, картография ҳәм мәмлекетлик кадастр бойынша мәмлекетлик комитети Ташкент ўәлаяты ҳәкимлиги ҳәм «Өзбекбалықсанаат» ассоциациясы менен биргеликте бир ай мүддетте «Балық ислеп шығаратуғын» ЕЭЗ қурамындағы жер участкаларының шегараларын анық белгилесин.

  1. «Балық ислеп шығаратуғын» ЕЭЗның жумыс ислеў мүддети соңын ала созылыў имканияты менен 30 жылды пайда етеди;

жумыс ислеў мүддети даўамында «Балық ислеп шығаратуғын» ЕЭЗ аймағында айрықша салық, бажыхана ҳәм валюта режимлери әмел етеди;

«Балық ислеп шығаратуғын» ЕЭЗның жумысы Еркин экономикалық зоналар ҳәм киши санаат зоналары ҳәкимшилик кеңеслериниң жумысын муўапықластырыў бойынша Республикалық кеңес тәрепинен муўапықластырылады;

«Балық ислеп шығаратуғын» ЕЭЗның оператив басқарыў уйы­мы Дирекция болып есапланады;

Дирекцияның жумысынан түскен дәраматлар ҳәм нызам ҳүжжетлери менен қадаған етилмеген басқа да дәреклер оның жумысын қаржыландырыў дәреклери болып есапланады;

Дирекцияны «Өзбекбалықсанаат» ассоциациясы баслығы тәрепинен Өзбекстан Республикасы Министрлер Кабинети менен келисилген ҳалда лаўазымға тайынланатуғын ҳәм лаўазымнан азат етилетуғын директор бас­қарады;

Дирекция Еркин экономикалық зоналар ҳәм киши санаат зоналары ҳәкимшилик кеңеслериниң жумысын муўапықластырыў бойынша Республикалық кеңес қарарлары ҳәм «Балық ислеп шығаратуғын» ЕЭЗ тәрепинен ислеп шығылған бас режелер бойынша мақулланған инвестициялық жойбарларды жайластырады ҳәм «Бир айна» принципи бойынша инженерлик-телекоммуникация инфраструктурасы тармақларына жалғаныўға барлық зәрүр рухсатнамалар берилиўин шөлкемлестиреди.

Дирекция пүткил жумыс ислеў дәўиринде салықлар ҳәм мәмлекетлик мақсетли қорларға мәжбүрий ажыратпалар төлеўден азат етиледи.

Ташкент ўәлаяты ҳәкимлиги бир ай мүддетте Төменги Шыршық районы ҳәкимлигине судтың қарары менен берилген мүлк, жер участкалары, соның ишинде, суў бассейнлериниң Дирекцияға тапсырылыўын тәмийинлесин.

  1. Өзбекстан Республикасы Министрлер Кабинети бир ай мүддетте Дирекция жумысын шөлкемлестириў ҳаққында қарар қабыл етсин.
  2. «Балық ислеп шығаратуғын» ЕЭЗ қатнасыўшыларына Өзбекстан Республикасы Президентиниң 2016-жыл 26-октябрьдеги ПП-4853-санлы «Еркин экономикалық зоналардың жумысын жеделлестириўге ҳәм кеңейтиўге байланыслы қосымша илажлар ҳаққында»ғы Пәрманының 3, 4 ҳәм 5- бәнтлери әмел етилиўи енгизилсин.
  3. Балықшылық тармағын раўажландырыў мақсетинде Өзбекстан Республикасы Тоғай хожалығы мәмлекетлик комитети балансында болған тәбийғый суў бассейнлери турақлы түрде айрықша пайдаланыў ушын «Өзбекбалықсанаат» ассоциа­циясына берилсин.

Тәбийғый суў бессейнлериниң ижара төлемлеринен келип түскен қаржылар толық көлемде «Өзбекбалықсанаат» ассоциа­циясының Балықшылықты раўажландырыў қорына қаратылатуғыны белгиленсин.

  1. Өзбекстан Республикасы Министрлер Кабинети:

Аўыл хожалығы министрлиги жумысын шөлкемлестириў ҳаққындағы қарар жойбарын киргизиўде министрликтиң орайлық аппарат структурасы қурамында 5 штат бирлигинен аз болмаған Балықшылықты раўажландырыў басқармасын шөлкемлестириў, соның ишинде, усы басқармаға «Өзбекбалықсанаат» ассоциациясының алдына қойылған ўазыйпаларды әмелге асырыўда ҳәр тәреплеме көмеклесиў ўазыйпасын жүклеўди нәзерде тутсын;

2018-2019-оқыў жылынан баслап Өзбекстан Республикасы Жоқары билимлендириў мәкемелеринде балықшылық тараўы бағдарларында бакалаврларды таярлаў бойынша қабыллаў квотасын кеминде еки есеге арттырыўды нәзерде тутсын;

Ташкент мәмлекетлик аграр университетинде 2018-2019-оқыў жылынан баслап «Балықшылық» бағдары бойынша кеминде 6 дан ибарат магистратура курсын шөлкемлестирсин.

  1. Төмендегилерге бағдар­ланған Республикада 2018-2023-жылларда балықшылық тараўын жедел инновациялық раўажландырыўға байланыслы илажлар бағдарламасы қосымшаға муўапық тастыйықлансын;

қымбат баҳалы балық түрлерин ҳәм шабақларды интенсив жетистириў ушын питомник ҳәм нәсилшилик жумысларын мәмлекетлик-жеке меншик шериклик шәртлеринде жетилистириў;

балық өнимлерин (консерва, икра, балық уны ҳәм басқалар) ислеп шығарыўды кеңейтиў;

аквакультураны раўажландырыў, жер ҳәм суў ресурсларынан нәтийжели және ақылға уғрас пайдаланыў бойынша илажларды әмелге асырыў;

 балықшылық тараўындағы илимий-изертлеў жумысларын буннан былай да раўажландырыў;

кадрларды таярлаў, қайта таярлаў ҳәм олардың маманлығын арттырыўды жетилистириў;

балықшылық тараўында экс­порт потенциалын арттырыў;

балықшылықты раўажландырыў ушын азықлық базасын көбейтиў, балықты пайдаланыў мәдениятын, сондай-ақ, «Өзбекбалықсанаат» ассоциациясының балықшылық тараўын басқарыў ҳәм муўапықластырыўдағы ролин және де арттырыў;

балықшылық хожалықларының материаллық-техникалық тәмийинлениўин беккемлеў ушын шараятлар жаратыў.

Өзбекстан Республикасы Министрлер Кабинети:

Бағдарламаның өз ўақтында ҳәм сапалы орынланыўын тәми­йинлеў бойынша министрликлер ҳәм ведомстволардың өз-ара бирге ислесиўин ҳәм олардың жумысының муўапықластырылыўын;

ҳәр айда Бағдарламаның орынланыўы сын көзқарастан көрип шығылыўын ҳәм бар маш­қалаларды нәтийжели шешиў илажлары көрилиўин тәмийинлесин.

  1. Өзбекстан Республикасы Жер ресурслары, геодезия, картография ҳәм мәмлекетлик кадастр бойынша мәмлекетлик комитети «Өзбекбалықсанаат» ассоциациясы, басқа да мәпдар министрликлер ҳәм ведомстволар менен биргеликте 2018-жыл 1-ноябрьге шекемги мүддетте:

жер ҳәм суў бассейнлеринен мақсетсиз пайдаланып атырған тәбийғый ҳәм жасалма суў бассейнлерин хатлаўдан өткериў және оларды товар балықларды ҳәм балық шабақларын жетистириўге тартыў илажлары көрилиўин;

балықшылық хожалықлары жасалма ҳәм тәбийғый суў бассейнлериниң өнимдарлығын кадастр жағынан баҳалаған ҳалда бирден-бир реестр жаратылыўын тәмийинлесин.

  1. Өзбекстан Республикасы Инновациялық раўажланыў министрлиги, Қаржы министрлиги, Аўыл хожалығы министрлиги, Инвестициялар бойынша мәмлекетлик комитети, «Өзбекбалықсанаат» ассоциациясының Қарақалпақстан Республикасы, Бухара, Ташкент ҳәм Ферғана ўәлаятларында балықшылық хожалықларына ихтиопатологиялық хызмет көрсетиў ушын лабораториялар шөлкемлестириў ҳаққындағы усынысына келисим берилсин.

Қарақалпақстан Республикасы Министрлер Кеңеси, Бухара, Ташкент ҳәм Ферғана ўәлаятлары ҳәкимликлери 2019-жыл  1-майға шекемги мүддетте лабораториялардың толық жумыс ислеўин, заманагөй үскенелер менен тәмийинлениўин және маман кадрлар менен толықтырылыўын тәмийинлесин.

  1. «Өзбекбалықсанаат» ассоциациясы жанында балықшылық мәдениятын раўажландырыўдың әҳмийетли мәселелерин қамтып алатуғын, соның ишинде, миллий ҳәм шет елли илимий ҳәм әмелий инновациялық жетискенликлерди, жаңадан баслайтуғын ҳәм жумыс алып барып атырған балықшылар ушын балық жетис­тириў технологияларын дурыс шөлкемлестириў және ел ишинде ҳәм оның сыртында жүз берип атырған балықшылық тараўындағы әҳмийетли ўақыяларды сәўлелендирип баратуғын «Балықшылық» журналы шөлкемлестирилсин.
  2. «Өзбекбалықсанаат» ассоциациясы, Өзбекстан Республикасы Аўыл хожалығы минис­трлиги, Суў хожалығы минис­трлиги, Жоқары ҳәм орта арнаўлы билимлендириў министрлигиниң Арнасай аўыл хожалығы ҳәм транспорт кәсип-өнер колледжи және Төменги Шыршық агроэкономика кәсип-өнер колледжи жанында балықшыларды таярлаў және балықшылық хожалығы хызметкерлериниң маманлығын арттырыў курсларын шөлкемлестириў ҳаққындағы усыныслары мақуллансын.
  3. Сыртқы ислер министрлиги Өзбекстан Республикасы Суў хожалығы министрлигине балық жетистириў, оларды қайта ислеў ҳәм таяр балық өнимлерин ислеп шығарыўдың заманагөй технологияларын үйрениў ҳәм енгизиў мәселелеринде шет мәмлекетлердиң жетекши илимий-изертлеў институтлары менен ҳәр тәреплеме бирге ислесиўди жеделлестириўде көмеклессин.
  4. «Ипотека-банк» АКИБ ға балық шабақларын жетистиретуғын суў бассейнлерин ҳәм инкубация цехларын шөлкемлестириў және олардың жумыс ислеўин тәмийинлеў, балық жетис­тириўдиң заманагөй техноло­гияларын ҳәм усылларын енгизиў, экспортқа бағдарланған ҳәм бәсекиге шыдамлы балық өнимлерин ислеп шығарыў бойынша технологиялық процесслерди басқышпа-басқыш қәлиплестириў ушын Дирекцияға бес жыл мүддетке, еки жыл жеңилликли ўақыт пенен Өзбекстан Республикасы Орайлық банкиниң қайта қаржыландырыў ставкасы муғдарынан аспайтуғын кредитлер бериў усыныс етилсин.
  5. «Өзбекбалықсанаат» ассоциациясы Әдиллик министрлиги ҳәм басқа да мәпдар ведомстволар менен биргеликте бир ай мүддетте нызам ҳүжжетлерине усы қарардан келип шығатуғын өзгерислер ҳәм қосымшалар ҳаққында Өзбекстан Республикасы Министрлер Кабинетине усыныслар киргизсин.
  6. Усы қарардың орынланыўын қадағалаў Өзбекстан Республикасының Бас министри А.Н.Ариповқа, Өзбекстан Республикасы Президентиниң Мәмлекетлик кеңесгөйи Р.Р.Иноятовқа ҳәм Өзбекстан Республикасының Бас прокуроры О.Б.Мурадовқа жүкленсин. 

Өзбекстан Республикасы  Президенти Ш.МИРЗИЁЕВ.

Ташкент қаласы, 2018-жыл 6-апрель.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF