Еркин Қарақалпақстан Вести Каракалпакстана 18:55:10, 15.12.2018
Хош келипсиз! | RSS
Сайт мазмуны

Кириў усылы

ТӘРБИЯЛАНЫЎШЫЛАРДЫҢ  СҮННЕТ ТОЙЛАРЫ

Қарақалпақстан Республикасы Денсаўлықты сақлаў министрлигине қараслы Тақыятас районындағы «Балалар үйи»ниң бес тәрбияланыўшысының сүннет тойлары болып өтти.

Усы мүнәсибет пенен өткерилген илажда  Тақыятас районының ҳәкими Фархад Алламбергенов, Қарақалпақстан Республикасы Денсаўлықты сақлаў министри Данияр Ҳаджиев, Тақыятас районының прокуроры Абат Жумамуратовлар шығып сөйлеп, жыйналғанларды тәр­бияланыўшылардың сүннет тойлары менен қутлықлады. Қуўанышлы тойлары өткерилип атырған балалар — Ал­лаяр Базарбаев, Меҳриддин Равшанов, Алибек Жаббарбергенов, Аврам Еримбетов ҳәм Элдар Байрамбаевлардың келешекте елимизге белгили инсанлар болып жетисиўине тилеклеслик билдирди. Ҳәр бир балаға «Өзсанаат­қурылысбанк»тиң районлық филиалынан 3 миллион сумнан ашылған аманат дәптершелери салтанатлы жағдайда тапсырылды.

Өзбекстан Республикасы Президентиниң усы жыл 14-март­тағы «Өзбекстан Республикасының мәмлекетлик қәўипсизлиги системасын жетилистириў ҳаққында»ғы Пәрманы менен қайта шөлкемлестирилген Өзбекстан Республикасы Мәмлекетлик қәўипсизлик хызмети қәўендерлигинде 2015-жылы Тақыятас районындағы «Балалар үйи»ниң имараты ири оңлаўдан шығарылып, тәрбияланыўшыларға барлық қолайлы шараятлар жаратып берилди.

— Тәрбияланыўшыларымыздың сүннет тойларын ҳәр жылы көтериңки руўхта өткериў дәстүрге айланбақта,-дейди «Балалар үйи»ниң бас шыпакери Анжела Өмирова. — Бүгинги илаж­ға район ҳәкимлиги, минис­трликлер менен ведомстволардың, ҳуқық қорғаў уйымларының, кәрхана, мәкемелердиң басшылары, жәмийетлик шөлкемлердиң ўәкиллери өзлериниң саў­ғалары менен қатнаспақта. Буның ушын оларға шексиз миннетдаршылығымызды билдиремиз...

Усы күни тәрбияланыўшы­ларға Қарақалпақстан Республикасы Мәмлекетлик қәўипсизлик хызмети, Прокуратура, Денсаўлықты сақлаў министрлиги, ра­йон ҳәкимлиги, қәўендер мәкемелердиң атынан баҳалы саўғалар тапсырылды.

Республикамыз көркем-өнер шеберлериниң рәңбә-рең концерт бағдарламасы балалардың қуўанышына қуўаныш бағышлады. Өзбекстан ҳәм Қарақалпақстанға хызмет көрсеткен артист Мақсет Өтемуратов, Қарақалпақстанға хызмет көрсеткен артист Раджив Атаджанов, «Ниҳол» сыйлығының ийеси Гүлназ Өтепова ҳәм басқа да талант ийе­лери, Қарақалпақ мәмлекетлик қуўыршақ театры артистлери, Хожелидеги 1-санлы «Меҳрибанлық үйи»ниң «Таң жулдызлары» ансамбли ағзалары,  «Балалар үйи»ниң тәрбияланыўшылары тәрепинен атқарылған қосық ҳәм аяқ ойынлар илаж қатнасыўшыларында айрықша тәсир қалдырды.

 Қарақалпақстан  хабар агентлиги.

М.Ҳабибуллаевтың түсирген сүўрети.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF