Еркин Қарақалпақстан Вести Каракалпакстана 09:11:08, 23.07.2018
Хош келипсиз! | RSS
Сайт мазмуны

Кириў усылы

«АРАЛ»  ЖЕҢИЛИС  ПЕНЕН  БАСЛАДЫ

Газетамыздың өткен санларының биринде хабарлағанымыздай, 6-апрель күни футбол бойынша Про-лига (бурынғы биринши лига) командалары арасында XXVII Өзбекстан чемпионаты старт алды. Про-лиганың «А» зонасында қатнасып атырған Нөкистиң «Арал» командасы дәслепки турда өз майданында Ферғананың «Истиқлол» жәмәәтин қабыл етти.

Ойыннан алдын чемпионаттың салтанатлы ашылыў мәресими болып, онда Қарақалпақстан Республикасы Министрлер Кеңесиниң Баслығы, республика Футбол федерациясының президенти Қ.Сариев стадионға жыйналған барлық футбол ышқыпазларын ҳәм ҳәр еки команда ағзаларын жаңа мәўсимниң ашылыўы менен қызғын қутлықлап, чемпионат ойынларында оларға табыслар тиледи. Буннан соң Өзбекстан ҳәм Қарақалпақстан Республикаларының мәмлекетлик гимнлери сести астында чемпионат байрағы көтерилди.

Ушырасыўға келетуғын болсақ, оның дәслепки минутларында-ақ, есап ашылды. 6-минутта «Истиқлол» ағзасы Риза Айвазовтың алыстан жоллаған тобы Эльдар Шухратбеков қорғап атыр­ған «Арал» дәрўазасының торынан орын алды. Көп өтпей, ушырасыўдың бас төрешиси Фирдавс Норсафаров өз жәрийма майданшасы ишинде қол менен ойнағаны ушын «Арал» дәрўазасына пенальти белгиледи. Оны анық әмелге асырған Абдухолиқ Қурбанов есаптың 0:2 болыўын тәмийинледи. Командалар усы есап пенен тәнеписке шығып кетти.

Екинши таймда нөкисли футболшылар қанша ҳәрекет етпесин, мий манлар дәрўазасына тек бир ғана топ (Наўрыз Қайыпов) өткериўге еристи. Қорғаныс тактикасын шебер қоллана билген Сергей Лебедев шәкиртлери усылайынша Нөкистен үш упай алып кетти.

Ертең «Арал» Үргениште «Хорезм» командасы менен ойнаса, 20-апрель күни өз майданында Термиздиң «Сурхан» клубын қабыл етеди.

 С.ЖАНИЕВ.

СҮЎРЕТТЕ: ушырасыўдан көринис.

 М.ҲАБИБУЛЛАЕВтың түсирген сүўрети. 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF