Еркин Қарақалпақстан Вести Каракалпакстана 19:00:05, 16.10.2018
Хош келипсиз! | RSS
Сайт мазмуны

Кириў усылы

РУЎХЫЙ-АҒАРТЫЎШЫЛЫҚ  МӘСЕЛЕЛЕРИНЕ БАҒЫШЛАНДЫ

Көпшиликке мәлим, 2017-жыл 28-июльде Өзбекстан Республикасы Президентиниң «Руўхый-ағартыўшылық жумыслардың нәтийжелилигин арттырыў ҳәм тараўды раўажландырыўды жаңа басқыш­қа көтериў ҳаққында»ғы қарары қабыл етилген еди.

Онда руўхый-ағартыўшылық үгит-нәсият жумысларының мазмунын түп-тийкарынан жақсылаў ҳәм олардың көлемин кеңейтиўге айрықша итибар қаратылған. Усы қарар талапларының орынланыўын тәмийинлеў ҳәм миллий қәдириятларымызды, мәнаўиятымызды кең түрде үгит-нәсиятлаў мақсетинде жақында Елликқала районында «Руўхый-ағартыўшылық жумыслардың нәтийжелилигин арттырыў ҳәм тараўды  раўажландырыўды жаңа басқышқа көтериў» атамасында семинар шөлкемлестирилди. Оған республика руўхый-ағартыўшылық орайы ҳәм оның қала ҳәм районлық бөлимлери хызметкерлери, профессор-оқытыўшылар,  ғалаба хабар қураллары ўәкиллери қатнасты.

Илажды район ҳәкиминиң орынбасары Р.Матчанов басқарып барды. Онда, Өзбекстан Республикасы Олий Мажлиси Сенаты ағзасы, Өзбекстан Қаҳарманы Қ.Хожаниязов, Республика руўхый-ағартыўшылық орайы Қарақалпақстан бөлими баслығының орынбасары Ш.Аяпов, Қарақалпақ мәмлекетлик университети  доценти Ж.Ҳәкимниязов, Нөкис мәмлекетлик педогогикалық институтының аға оқытыўшысы Қ.Мәмбетов ҳәм басқалар сөзге шығып, елимизде жүргизилип атырған социал-экономикалық реформалар, қабыл етилип атырған ҳуқықый ҳүжжетлер ҳәм быйылғы «Жедел исбилерменлик, инновациялық идеялар ҳәм технологияларды қоллап-қуўатлаў жылы» Мәмлекетлик бағдарламасының мазмун-әҳмийетин халықтың кең қатламына жеткериўде пикир-усынысларын билдирди.

— Семинарды өткериўден гөзленген тийкарғы мақсет — тараў хызметкерлериниң билим ҳәм ис-тәжирийбелерин арттырыў ҳәм өз-ара пикир алысыў, қалаберди мәдений естелик орынларына саяхат етиў болып табылады, - дейди Республика руўхый-ағартыўшылық орайы Қарақалпақстан бөлими баслығы Қ.Юсупов. — Бундай илажлардың шөлкемлестирилиўи жумыс нәтийжелилигиниң артыўына тийкар жаратады. 

Күнниң екинши ярымында қатнасыўшылар райондағы Археология ҳәм тарийх музейи ҳәм Топыраққала естелик орынларына саяхат етти.

А.ОРАЗОВ,

арнаўлы хабаршымыз.

Елликқала районы.

 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF